Stacion – Qendra për Art Bashkëkohor Prishtinë ka shpallë vendimin e jurisë të çmimit ‘Artistët e së nesërmes’ 2017 për zgjedhjen e finalistëve të këtij çmimi, shkruan KultPlus.

Juria e çmimit ‘Artistët e së nesërmes’ 2017, në përbërje Charles Esche, Erëmirë Krasniqi, Nataša Petrešin, Adrian Deva dhe Renaud Proch, ka zgjedhur tre finalistët e çmimit ‘Artistët e së nesërmes’ 2017 nga njëmbëdhjetë aplikimet. Juria ka vendosur që si bazë për vendimin dhe vlerësimin t’i ketë kriteret e praktikave të fuqishme inovative dhe ndërdisiplinore.
Finalistët e zgjedhur dallojnë shumë njëri nga tjetri në format shprehëse dhe përvojën e tyre, por kanë të përbashkët ambicien për të prodhuar vepra vizuelisht imponuese, politikisht të lokalizuara apo të kontekstualizuara.

Finalisti i parë është Meriton Maloku i cili befasoj jurinë me vizionin e tij të angazhuar për temat më imponuese të përditshmërisë sonë aktuale.

Finalistja e dytë është Enesa Xheladini, praktika e theksuar vizuele e së cilës merr formën e fletoreve dhe skicave për skulpturat dhe instalacionet publike, që vijnë nga praktika e saj arkitekturore.

Finalisti i tretë është Jetullah Sylajmani i cili në veprat e tij merret me çështjet civilizuese si resurset, lufta dhe demokracia, në një mënyrë vizuelisht ambicioze.

Juria është kureshtare për të parë përkthimin e këtyre praktikave në formatin e ekspozitës të finalistëve të çmimit ‘Artistët e së nesërmes’ 2017 dhe të garës për çmimin.

Juria vlerëson angazhimin dhe punën e të gjithë artistëve që kanë aplikuar për çmimin ‘Artistët e së nesërmes’ 2017 dhe i inkurajon të gjithë artistët e rinj të Kosovës që të vazhdojnë punën e tyre në art bashkëkohor dhe të vazhdojnë të konkurrojnë për këtë çmim të rëndësishëm edhe në edicionet e tjera.

Ky çmim i rëndësishëm i pavarur organizohet nga Stacion – Qendra për Art Bashkëkohor Prishtinë në bashkëpunim me Residency Unlimited (RU) në Nju Jork dhe mbështetet nga The Trust for Mutual Understanding në Nju Jork, Raiffeisen Bank Kosovë dhe Ambasada e SHBA në Kosovë./ KultPlus.com