Muaj: Prill 2018

Edvin Susuri animator i javës në Anibar

Posted on by Kult Plus

Thirrja e Anibar për filma të animuar për vitin 2018 mbyllet me datën 30 prill.

Sivjet mbahet edicioni i nëntë i këtij festivali ndërkombëtar të filmit të animuar ndërsa nis nga 13-19 gusht në Pejë.

“Përgjatë muajit prill, ne do të shfaqim disa nga punët e animatorëve kosovarë për të ndarë thirrjen e festivalit me animatorët. Këtë javë po ju prezantojmë punën e Edvin Susurit. Edvini ka përfunduar Fakultetin e Arteve në Universitetin e Prishtinës. Ai punon si animator dhe ilustrues në 2VO dhe Undesignate. Në edicionin e tetë të festivalit Anibar ai ka qenë pjesë e jurisë së studentëve të Anibar të mentoruar nga Maros Brojo”, thuhet në njoftim.

Për tu njoftuar me punët nga Edvini: edvinsusuri.dribbble.com dhe www.edvinosawrr.tumblr.com Për të qenë pjesë e festivalit ju lutem lexoni rregullat dhe dërgojeni filmin përmes platformës www.filmfreeway.com

“Vijnë vaporat moj nanë bregut të detit” (VIDEO)

Posted on by Kult Plus

“Vijnë vaporat” është një këngë mjaft e njohur që është kënduar nga shumë këngëtarë e është dëgjuar në ambiente të ndryshme, shkruan KultPlus.


Sot KultPlus e sjellë këtë këngë me tekst, të kënduar nga grupi i njohur Corona.

Vijnë vaporat moj nanë bregut të detit
O dilni shifni moj nanë asqerte e mbretit
O dilni shifni moj nanë asqerte e mbretit

Disa kjajshin moj nanë disa knojshin
O ka nji letër moj nanë vilajt e çojshin
Ani ka nji leter moj nanë vilajt e çojshin

Ka nji letër moj nanë çojnë vilajte
O për shtat vjet o moj nanë te na presin gratë
O për shtat vjet o moj nanë te na presin gratë

Mos na pritshin moj nanë për shtatë vjet
O ne ti marrin moj nanë burrat pleq
Ani ne ti marrin moj nanë burrat pleq

Burra pleq o moj nanë e pleq të vjetër
O ishalla vjen o moj nane naj dever tjetër
O ishalla vjen o moj nanë naj dever tjetër

Dever tjetër moj nanë dert o i ri
O ishalla kthehen moj nanë djemtë në shpi
Ani ishalla kthehen moj nanë djemtë në shpi

139 vite nga lindja e Aleksandër Moisiut

Posted on by Kult Plus

Aleksandër Moisiu, lindi më 2 prill të vitit 1879 në Trieste dhe vdiq më 23 mars të vitit 1935 në Vjenë, ishte aktor austriak me origjinë shqiptare.

Në moshën 19 vjeçare shkon në Vjenë, ku me ndihmën e Jozef Kainc iu përkushtua aktrimit. Më 1898 e nisi karrierën e vet si kompars (aktorë që luajnë rol të vogël) në Burgtheatër. Pastaj vijuan angazhime në teatër në Pragë dhe Berlin. Në Berlin Aleksandër Moisiu u pranua në seminarin e Max Reinhardt me të cilin shkoi në turne në Petersburg (1911). Atje u dallua për rolin e Edipit. Pas këtij suksesi ai u angazhua në shumë vende të Evropës dhe Amerikës Veriore.

Fusha e veprimit të Moisiut përmblidhte të gjithë spektrin e literaturës evropiane të teatrit, duke filluar që nga tragjedia antike greke e deri te koha moderne. Shumë të njohura u bënë interpretimet e tij të Hamletit, të Edipit, të Jedermann dhe të Fedja në veprën e Leon Tolstoit “Kufoma e gjallë”. Ai luajti po ashtu edhe rolet kryesore në premierat e pjesëve teatrale të Hauptmann-it (“Der weiße Heiland“), të Wedekind-it (“Frühlings Erwachen”) dhe të Hofmannsthal-it (“Jedermann”).

Në vitin 1920 ishte i pari që në Lojërat Festive të Salzburgut (Salzburger Festspiele) luajti rolin kryesor në “Jedermann”.

Moisiu vlerësohej shumë nga publiku i tij për shkak të zërit të tij të bukur si dhe për angazhimin e tij emocional. Ai llogaritej sidomos në vitet para fillimit të Lufta e Parë Botërore si një nga aktorët më të mëdhenj në hapësirën gjermanofolëse. Në periudhën mes dy luftërave ishte shumë kohë në turne. Në Berlin aktronte në këtë kohë vetëm si mysafir. Stili i tij i aktrimit llogaritej këtu si i vjetëruar dhe nuk mund të matej më me zhvillimet teatrore si ai i ekspresionizmit, apo teatri politik i Brecht-it apo i Piscator-it.
Prej vitit 1910 e deri më 1935 mori pjesë në 10 produksione të filmave, 8 prej tyre ishin filma pa zë.

Në vitin 1935, pak kohë para vdekjes së tij, Moisiu kërkoi shtetësinë e Shqipërisë si dhe atë të Italisë. Shqipëria refuzoi këtë kërkesë, kurse Italia ia dha shtetësinë Moisiut, kur ai ishte i shtrirë në shtratin e vdekjes.

Ai vdiq më 23 mars të vitit 1935 në Vjenë. Ai është i varrosur në varrezat e komunës së Morcote-së, pranë qytetit Lugano në kantonin e Tessin-it në Zvicër./ KultPlus.com

Radio zvicerane promovon solo albumin e Elina Dunit (FOTO)

Posted on by Kult Plus

Këngëtarja dhe kompozitorja e njohur shqiptare, Elina Duni, po rikthehet fuqishëm me një album të ri muzikor.

Albumi i saj i ri solo titullohet ”Partir” ndërsa Radio Kombëtare Zvicerane, ka përgatitur një event të veçantë transmetimi për promovimin e këngëtares me rastin e lansimit të këngëve të saj më të reja.

Për gjithë transmetimin e projektit më të ri të muzikantes shqiptare është përkujdesur gazetari i njohur zviceran Arnaud Robertin për të cilin vet Elina Duni ka shprehur mirënjohje.

Brenda ”Partir”, ka këngë në gjuhën shqipe, melodi të cilat janë dhe duke u transmetuar në radio kombëtare të Zvicrës, njofton Klan Kosova.

“Partir” mund ta keni në duart tuaja nga 13 prilli në Zvicër ndërsa në pjesën tjetër të Europës dhe SHBA-së, mund ta gjeni atë nga 27 prilli./ KultPlus.com

Nënat

Posted on by Kult Plus

Poezi e shkruar nga Azem Shkreli.

Ato lahen në gazin
tonë e në lotët e tyre.

Bëhen rojë murane
te krojet e shtera të gjirit.

Në ballin tonë për herë
u bëjnë dritë shejt gishtat.

Ditët na i prarojnë dhe rrugët
me nga një bekim më t’mirin.

Me rrëmetën e krrusur t’moteve
na ruajnë nga hijet e liga.

Një ditë shkojnë si të shkonin,
të mos vijë më vdekja.

E s’na kërkojnë asgjë,
pos një grusht dhe mbi krye.

Shkojmë. E sa herë vdes nënë,
vdes nënëmira ime.

Malala përfundon vizitën në Pakistan (FOTO)

Posted on by Kult Plus

Fituesja e Çmimit Nobel për Paqe, Malala Yousafzai do të kthehet prapë në Britani, pas vizitës katërditore në Pakistan.

Kjo ka qenë hera e parë që Yousafazai ka vizituar vendlindjen prej kur militantët talibanë e kanë qëlluar në kokë më 2012. Malala dhe familja e saj kanë arritur mëngjesin e sotëm në Aeroportin Ndërkombëtar Benazir Bhutto, prej ku janë nisur në Londër, transmeton rel.

Malala, 20 vjeçare ka udhëtuar për herë të parë në Pakistan prej kur është sulmuar për shkak të fushatës së saj për edukimin e vajzave, gjë që kundërshtojnë talibanët. Nobelistja atë kohë ishte 15 vjeçare dhe menjëherë ishte dërguar në Angli për trajtim. Aktualisht Malala është studente në Universitetein Oxford ndërsa më 2014 ka fituar Çmimin Nobel për Paqe.

Derisa ishte në Pakistan ajo ka vizituar edhe vendin ku është rritur në veriperëndim të Pakistanit, Swat Valley. Ajo është shprehur jashtëzakonisht e lumtuar kur ka vizituar shokët dhe fqinjtë e saj duke deklaruar se “ende më duket si ëndërr që jam në mesin tuaj”.

Gjatë këtij udhëtimi Malala është takuar edhe me kryeministrin pakistanez, Shahid Khaqan Abbasi. Ajo ka thënë se synon të kthehet sërish në Pakistan pasi të përfundojë studimet në Britani./ KultPlus.com

Orkestra e Filharmonisë së Kosovës interpretoi në këmbë, një pjesë e publikut iu bashkua atyre (FOTO)

Posted on by Kult Plus

Gili Hoxhaj

Edicioni i 13-të i Festivalit DAM po vazhdon t’i shërbejë plot tinguj e befasi publikut të Prishtinës. Në mbrëmjen e katërt të këtij festivali, publiku ishte mbledhur tek Salla e Kuqe e Pallatit të Rinisë për të dëgjuar koncertin e Orkestrës së Filharmonisë së Kosovës, pranë të cilëve për të tretën herë erdhi dirigjenti amerikan Gregory Charette.

Rrugëtimi i mbrëmshëm muzikor u hap me veprën e kompozitorit nga Prishtina, Blond Krasniqi. Orkestra e Filharmonisë me dirigjentin amerikan arritën ta zbërthejnë këtë vepër e cila do të mirëpritej me duartrokitje prej publikut. Koncerti do të kulmonte me interpretimin e Lisa Sahatçiut. Orkestra po mirëpriste një nga solistet më të reja në moshë, e vet ardhja e saj në skenë e përcjellë me buzëqeshje ngjalli duartrokitjet e publikut. Në çdo zbërthim të veprës, sa herë që duart e saj preknin tastet e pianos dëshmonin se Lisa Sahatçiu ishte një emër premtues ani pse numëronte vetëm 13 vite jetë. Ndonjëherë të dy duart e saj përplaseshin njëherazi sa në njërën anë, sa në tjetrën anë të pianos duke ngjallur një magji tingujsh. Lisa Sahatçiu rrëmbeu duartrokitjet më të forta të mbrëmjes. Për ta sjellë para publikut veprën e Camille Saint, ajo tha se i janë dashur gati shtatë muaj përgatitje. Ajo tha se vepra që interpretoi mbrëmë është një nga veprat më të vështira që ajo ka luajtur deri më tani por kjo e inspiron që edhe më tutje ta sfidoj vetën në vepra të tjera.

“Këtë vepër kam filluar ta praktikoj që nga muaji i shtatorit, këtë vepër e kam zgjedhur së bashku me mësuesen time dhe ka qenë një sfidë e madhe për ta zgjedhur e në të njëjtën kohë edhe për ta praktikuar. U ndjeva mjaft mirë pasi që dhe publiku ishte mjaft i madh dhe kjo ishte hera ime e parë që po interpretoja me Filharmoninë e Kosovës”, tregoi Sahatçiu për KultPlus.

Për dirigjentin amerikan Gregory Charette interpretimi i saj ishte fantastik përkundër moshës që ajo ka. Ai tha për KultPlus se pianisten e re, e pret një e ardhme shumë e ndritur.

Menjëherë pas saj në skenë erdhi flautistja Eklejda Zajmi – Gorani. Ajo do të qëndronte për jo pak kohë para publikut ku do të interpretonte “Koncert për flaut dhe orkestër, Op.39” të Lowell Libermann. Rrethuar nga tingujt e orkestrës, tingujt në sallë shpesh do të përqendroheshin tek tingulli i flautës. Flautistja Zajmi- Gorani tregoi se nata e mbrëmshme i ka falur një eksperiencë të mrekullueshme ndërkohë që tregoi për KultPlus, se ajo numëron gati një vit pritje për ta luajtur këtë vepër.

“Është një vepër që më ka dhënë impresionon, vepër kontoperane, ka shumë kërkesa për instrumentin e flautit por për mua ka qenë shumë sfiduese dhe më ka pëlqyer se si kompozitori Libermann e ka trajtuar orkestrën, solistin dhe vendosjen e tingujve në flaut”, u shpreh ajo.

Përkundër dy interpretimeve të mahnitshme, pas një pushimi të shkurtër Orkestra e Filharmonisë së Kosovës do të kthehej por jo në pozicionet e zakonshme. Ata do të qëndrojnë në këmbë për të dhënë gjysmë orë interpretim të një prej veprave më të njohura të Terry Riley. Vepra “In C”, e punuar për ansambël të madh daton që nga viti 1964 dhe e ka dominuar muzikën moderne për shumë vite. Vet vepra si e tillë bëri që Orkestra e Filharmonisë për gjysmë ore të sjellë një lojë plot gjallëri për publikun, një pjesë e të cilëve do t’u bashkohej atyre. Derisa të gjithë interpretonin në instrumentet e tyre, ata lëviznin nga një pjesë, në pjesën tjetër të sallës të rrethuar nga publiku në katër anët.
Përveç kësaj, ata do të shkëmbenin instrumentet në mes vete e në disa raste edhe me pjesëtarët e audiencës duke i bërë publikun pjesë të interpretimit. Dirigjenti Charette përsëri do të ndodhej përballë orkestrës por tanimë në piano, aty ku do t’u bashkoheshin edhe fëmijë që kishin ardhur në koncert. Ai tregoi për KultPlus se për herë të parë ishte takuar me publikun prishtinas me anë të këtij festivali dhe kjo e bën të ndihet si të kthehet në shtëpi.

“Çdo herë që unë vij, ne me orkestrën planifikojmë një koncert të tillë. Java e kaluar ishte shumë e stresuar pasi që vepra është e tillë që kërkon shumë improvizime dhe nuk ka dirigjent pasi që unë luaj në piano dhe në fund mund të them se jam i kënaqur me këtë performancë, jo vetëm me interpretimin por edhe me mënyrën e reagimit të publikut pasi që disa nga pjesëmarrësit na u bashkuan, ne themi se kjo nënkupton “ne i thyem muret”, kështu që ne i thyem muret sonte” u shpreh dirigjenti Charette.

Festivali ndërkombëtar DAM sonte do të sjellë koncertin e radhës “Klubi 90” i cili fillon nga ora 18:30 ku do të interpretojnë solistë të rinj për të vazhduar në ora 20:00 me koncertin “Upriver”, ku do të interpretoi Armel Dupas nga Franca. Të dy koncertet mbahen ne Amfiteatrin e Bibliotekës Universitare. / KultPlus.com

Si u dekoruan vezët në festën e Pashkëve (FOTO)

Posted on by Kult Plus

Ide kreative nga më të ndryshmet u panë gjatë ditës së djeshme në mbarë botën.

Dje u festuan Pashkët, dhe tradita për dekorimin e vezëve ende mbahet gjallë.

Në rrjetet sociale kanë qarkulluar fotografi nga më të ndryshmet se si janë festuar Pashkët, ndërsa disa medie kanë listuar edhe fotografitë e vezëve të dekoruara.

Në formë kaktusi, vezë të lyera me ngjyra të ndryshme, ombre, në formë akulloresh e të tjera, janë këto vetëm disa nga dizajnet e bukura që dje janë realizuar./ KultPlus.com

Përkujtohen dëshmorët e 81-tës

Posted on by Kult Plus

Me rastin e 27-vjetorit të rënies në ballë të demonstratave të vitit 1981, të dëshmorëve Naser Hajrizi dhe Asllan Pireva, sot më 2 prill, në ora 12:00, do të bëhen homazhe në nderim të jetës dhe veprës së tyre.

Homazhet do të mbahen te vendi i rënies, pllaka përkujtimore afër objektit të Qeverisë, ndërsa më pas do të vazhdohet te varret e dëshmorëve në lagjen Arbëria, në Prishtinë./ KultPlus.com

Sot feston datëlindjen aktorja Margarita Xhepa

Posted on by Kult Plus

Aktorja e madhe shqiptare Margarita Xhepa, sot feston datëlindjen, shkruan KultPlus.

Margarita Xhepa, lindi më 2 prill të vitit 1932 në Lushnje. Ajo njihet si një nga Zonjat e Mëdha të Teatrit Shqiptar. Nga viti 1950 u aktivizua si artiste probiste në Teatrin Popullor (sot Teatri Kombëtar) dhe njëkohësisht studioi në Liceun Artistik, Dega e Dramës.

Ka krijuar mbi 150 role në teatër, midis të cilëve mund të përmendim: Majlindën tek “Majlinda” (Xh. Broja), Dafina tek “Lumi i vdekur” (dramatizim nga K. Velça i romanit me të njëjtin titull të Jakov Xoxës), Filja tek “Cuca e maleve” (Loni Papa), Zonja Mëmë tek “Kush e solli Doruntinën” (dramatizim nga Edmond Budina e Pirro Mani i romanit me të njëjtin titull të Ismail Kadaresë), Nëna “Përballë vetes” (Ruzhdi Pulaha) etj.

Ka qenë njësoj e suksesshme në rolet e dramaturgjisë botërore, si Ofelia tek “Hamleti”, Vajza e dytë tek “Mbreti Lir”, Dado tek “Romeo e Xhulieta”, Mbretëresha Margaret tek “Rikardi i III”, të Shekspirit.

Në maj 2004 u rikthye në skenën e Teatrit Kombëtar, për të shkëlqyer në dramën “Streha e të harruarve”, një tjetër sukses në karrierën e saj 50-vjeçare. Margarita Xhepa, sot mbush 86 vite./ KultPlus.com

Rita Ora uron Pashkët (FOTO)

Posted on by Kult Plus

Si shumë këngëtare e artiste tjera, edhe Rita Ora realizoi disa fotografi si “lepurushe”.

Dje në mbarë botën u festua dita e Pashkëve, ku pati edhe urime nga më të ndryshmet.

Edhe këngëtarja shqiptare me famë botërore, Rita Ora, përveç urimeve ka postuar disa fotografi.

“Urime Pashkët”, ka shkruar Ora në Instragram./ KultPlus.com

Elvana Gjata sjell sekuenca nga klipi i këngës së re

Posted on by Kult Plus

“Off Guard” është kënga e re nga Elvana e Gjata të cilën ka paralajmëruar se do ta publikojë më 6 prill.

Në rrjetet sociale ajo ka publikuar disa sekuenca nga kjo këngë që vjen me videoklip, transmeton Koha.net.

“Off Guard” vjen në bashkëpunim me reperin e mirënjohur amerikan Ty Dolla Sign.

“Pothuajse është këtu ‘Off Guard’ në bashkëpunim me Ty Dolla Sign, publikohet më 6 prill. E emocionuar që bota ta dëgjojë”, ka shkruar këngëtarja shqiptare.
https://www.instagram.com/p/BhCPm60lJ2t/
Përndryshe Ty Dolla Sign deri më tani ka pasur bashkëpunime me yje të tjerë të muzikës, përfshirë këtu The Weeknd e Wiz Khalifa, me të cilët ka sjellë “Or Nah”. E një muaj më parë kishte sjellë këngë “Psycho” në bashkëpunim me Post Malone.

Fotografi italian bën fotografi artistike me mbeturinat e detit shqiptar te Rana e Hedhun (FOTO)

Posted on by Kult Plus

Fotografi italian Tiziano Cristofori, i cili kishte ardhur për të kaluar disa ditë si turist në Shqipëri, nuk mundi t’i rezistonte tundimit për të bërë disa shkrepje.

Cristofori-t duket se i ka bërë shumë përshtypje “Sheshi Skënderbej” në Tiranë, të cilin e ka kapur nga një këndvështrim mjaft interesant.

Por edhe më mbresëlënëse duket aftësia e fotografit italian për të shndërruar edhe të metat e Shqipërisë në një art të bukur dhe plot pozitivitet.

Në fakt, gjatë ndalesës së tij te Rana e Hedhun në Shëngjin, fotografi italian ka mbledhur çka mundur nga mbetjet plastike dhe jo vetëm që nxjerr në breg deti ynë, i “furnizuar” më së keqi nga çfarë vazhdojmë të hedhim fatkeqësisht prej shumë vitesh në lumenj, duke realizuar një kolazh shumëngjyrësh, të përmbledhur në një fotografi mjaft tërheqëse. s.k./ KultPlus.com

Rrëfimi

Posted on by Kult Plus

Poezi e shkruar nga Fahredin Gunga.

Pse më shikon si të huejin? A nuk më njeh?

Sëbashku a si vorrosëm tifusarët e natës

dhe mëngjezet buzëkuqe bashkë me ta?

E hapa zemrën dhe rafal të ri për këngë

ia derdha syve të tokës naive, tokës llahuse –

tokës që era gjak kaherë nuk po i vjen.

Më thuej, pra, o vlla i im i dashtun –

vlla i djersës sime, i dallëndysheve të mija –

pse më këqyr si të huejin? A nuk më njeh

ende?

“I vetmi gabim i vërtetë është ai prej të cilit ne nuk mësojmë asgjë”

Posted on by Kult Plus

Dhjetë thënie inspiruese nga Henry Ford:

“Dështimi është vetëm mundësia që të fillosh edhe njëherë në mënyrë më të mençur”

“Miku im më i mirë është ai i cili e nxjerr më të mirën nga unë”

“Mos e gjej gabimin, por gjeje ilaçin; gjithsecili mund të ankohet”

“I vetmi gabim i vërtetë është ai prej të cilit ne nuk mësojmë asgjë”

“Jeta është një varg i përvojave, ku secila prej tyre na bënë më të mëdhenjë, edhe pse kjo është e vështirë për tu kuptuar. Sepse bota ishte ndërtuar për ta zhvilluar karakterin, prandaj ne duhet ta mësojm se pengesat dhe shqetësimet të cilat i durojmë, na ndihmojnë në marshimin tonë përpara”

“Një biznes që nuk bënë asgjë tjetër përveç parasë, është një biznes i varfër”

“Paratë nuk e ndryshojnë njeriun, ato vetëm e demaskojnë atë. Nëse një njeri për nga natyra është vetiak, arrogant ose lakmitar, paratë vetëm i shpërfaqin këto, kjo është e gjitha”

“Nuk ke nevojë të mbash ndonjë pozitë për të qenë një lider”

“A dëshironi ta dini shkaktarin e luftës? Është kapitalizmi, lakmia, uria e ndyrë për dollarë. Largojëni kapitalistin dhe do ta largoni edhe luftën nga toka”

“Një idealist është personi që i ndihmon të tjerët të jenë prosperues”

Mungesa e zhvillimit në Shqipëri sipas Mehdi Frashërit

Posted on by Kult Plus

Shkruan Roland Sylejmani.

Mehdi Frashëri, ndonëse ishte doktoruar për politikë e ekonomi në Universitetin e Stambollit, në veprën e tij “Probleme Shqiptare” vjen në rolin e sociologut, duke diagnostifikuar disa prej problematikave thelbësore që sipas tij e rëndojnë Shqipërinë, të cilat e pengojnë funksionimin e rregullt të saj. “Probleme Shqiptare” është një analizë përplot informacione mbi sjelljet dhe mendësinë e shqiptarëve në tentativën e tyre për zhvillim dhe ndërtim të një shteti të qëndrueshëm, i cili s’po arrin të realizohet dot sipas Mehdiut.

Qysh në hyrje të kësaj vepre shtrohet nevoja e domosdoshme për t’i gjetur një përgjigje mungesës së zhvillimit të ambientit fizik të Shqipërisë. Duke marrë shembullin e sociologut ai vendosë të jap një diagnozë në lidhje me shkaqet që e kanë lënë prapa zhvillimin e Shqipërisë. “Probleme Shqiptare” më shumë mund të konsiderohet si një program politiko-ekonomik për zhvillimin e Shqipërisë. Ai bënë ndarjen e problemeve në disa shkaqe, të cilat duhet ndërlidhur për të dekonstruktuar funksionimin e një shoqërie të tërë. Për fat të keq, shumë prej problematikave të cilat i shtron Mehdiu, si një mënyrë emergjente për të ndërhyrë në riparimin e tyre, i gjejmë edhe sot e kësaj dite në Republikën e Shqipërisë.

Në këtë shkrim, unë kam analizuar vetëm tre nga shkaqet që Mehdiu i paraqet si problematike.

Shkaqet gjeografike
Kur u referohet shkaqeve gjeografike, konstaton se parakusht që të zhvillohet një qytetërim është e domosdoshme të jenë të përshtatshme kushtet gjeografike. Ai përshkruan Parisin dhe Vjenën, si dy qendra të mëdha të zhvilluara pikërisht për shkak se të dyja shtrihen buzë lumenjve të mëdhenj siç janë Sena dhe Danubi. Sipas tij prania e lumenjve ndihmon në krijimin e kushteve për ngritje dhe zhvillim të shpejt.
Shqipëria, ndonëse ka katërmbëdhjetë lumenj në 350 km përgjatë territorit të saj, që do të thotë se është një vend i cili ka burime të mjaftueshme me ujë, vë në dukje se problem kryesor qëndron te malet e mëdha e të rrepta të cilat ndajnë zonat fushore të Shqipërisë duke penguar krijimin e kushteve për ngjizjen e një vendbanimi të madh e të sigurt.
Për të ilustruar këtë problem të madh gjeografik, ai tregon shembujtë e Tiranës me Elbasanin, qytete të cilat në vijë ajrore janë shumë afer me njëra tjetren, por të cilat ndahen në mënyrë të prerë nga malet e rrepta të Krrabës, gjithashtu mali i Dajtit ndan Tiranën me Matin dhe pamundëson një komunikim të rregullt mes tyre.

Shkaqet historike
Aspekti historik është një nga ato që merr dimension qëndror në këtë vepër. Shqipëria shihet si target i fuqive pushtuese, sa herë është dashur të sulmohet. Brigjet e detit, prania e saj e madhe në det e bënte Shqipërinë vendin e parë të sulmit. Skenderbeun e vendosë në qendër të asaj që rilindas e quajnë si periudhën e motit të madh. Nëse analizojme veprat e autorëve të rilinjës kombëtare shqiptare, të gjithë nga ata idealistë kanë ndonjë punim ose vepër e cila u kushtohet kohës së Skëndërbeut. Mehdiu për dallim nga ideologët e rilindjes, thekson luftën e Skenderbeut si një luftë ndonëse është mbeshtetur në mbrotje të krishterimit ajo është bërë për të mbrojtur qytetrimin perëndimor i cili qe pushtuar nga Perandoria Osmane.
Konvertimin e shqiptarëve në muhamedan e sheh si një formë poshtëruese për të arritur sundim më të lehtë në këto vise. Për ata të cilët përqafonin islamin kishte benificione dhe të mira materiale, shmangie nga taksat që përcaktonte perandoria. Në këtë pikë Mehdiu flet me cinizëm në raport me të qenit pragmatik, si shembull përmend faktin se në atë periudhë, nëse në një familje shqiptare kishte tre vëllezër, i madhi merrte riskun e të konvertuarit në mysliman, ndërsa dy të tjerët mbesnin të krishterë. Kjo pastaj sillte edhe gjëra interesante në sjelljet e përditshme të te konvertuarve. “Bie fjala në katunde thjesht muhamedane festohen ditët e shenjtorëve më me rëndësi si Shën- Gjergji dhe Shën Mitri ashtu edhe ditët e shenjtorëve që kanë qenë mbrojtësit e atij katundi si Shën – Kolli e Shën – Pjetri e të tjerë. Gjithashtu gratë muhamedane, kur zënë farën e kosit ose kur bëjnë brumë për të gatuar, pa i ditur shkakun, bëjnë shenjën e kryqit.”

Shkaqet shoqërore
Në këtë pjesë, Mehdiu sulmon shpenzimin e kohës së lirë nga ana e shqiptarëve. Sipas tij, mungesa e salloneve për vallëzim, sallave për lexim, bibliotekave, hapsirave të tjera për dëfrim, është një problem shumë i madh i cili stagnon zhvillimin e shoqërisë shqiptare në Shqipëri dhe dëmton shpenzimin e kohës së lirë nga ana e qytetarëve.
Të gjitha këto po i kontribuojnë krijimit të një gjendje aspak komode për të zhvilluar individualizmin e shqiptarit, përmes të cilit do të niste përparimi i shoqërisë. Një theks tjetër që e plotëson krahas mungesës së ambienteve publike, është edhe mënyra se si ndërtohen raportet brenda familjes. Ai konsideron se bashkëjetesa në një kulm të shumë anëtarëve të familjes paraqet një problematikë të madhe: “Nën një strehë jetojnë vëllezër, por nganjëherë, edhe kushërinjtë të martuar jetojnë së bashku, dhe shumë herë një prej këtyre përpiqet e djersin për të gjithë familjen. “ element i fortë i cili shkakton ndjenjën e pasigurisë tek anëtarët e tjerë të familjes./ KultPlus.com

Letra e dashurisë që Theodore Roosvelts ia ka shkruar bashkëshortes së tij, Edith Roosvelt

Posted on by Kult Plus

Theodore Roosvelt ka shërbyer si president i SHBA-së që nga viti 1933 deri në fund të jetës së tij. Ai ishte i martuar me Edith Roosvelt e cila solli mjaft ndryshime si zonja e parë e shtetit, shkruan KultPlus.


Sot ju sjellim një letër që presidenti Roosvelt, ia kishte shkruar bashkëshortes së tij, Edith Roosvelt, në përvjetorin e martesës, më 20 maj 1943. Në këtë letër Roosvelt e kujton ditën e martesës me Edith dhe për rrugëtimin e tyre deri në atë ditë.

“E dashur Bunny!
E di se çfarë është kjo? Një letër për përvjetorin e martesës. Unë mendoj se duhet të mbërrijë në kohën e duhur. A të kujtohet ajo ditë e nxehtë qershori para tridhjetë e tre vitesh? Kisha e tejmbushur me njerëz, babai me atë jelekun e mrekullueshëm me pika blu, turmat në rrugë, velloja jote e bardhë, mamaja jote me një prej atyre kapelave të mrekullueshme. Dhe, a e mban mend si ishte bota atëherë, e vogël dhe e rregullt, një rend ndryshe. Gjërat kanë ndryshuar shumë që atëherë. Asgjë s’ka ndodhur ashtu siç e imagjinonim se do të ndodhte përveç fëmijëve tanë. Ne s’e menduam asnjëherë se do t’i binim botës kryq e tërthor. Ne nuk e menduam kurrë se profesionet dhe interesat tona do të shkonin aq larg. Ne nuk e menduam kurrë se tridhjetë e tre vjetori i martesës sonë do të na gjente të zhytur në Luftën tonë të Dytë me mua sërish në front. Epo e dashur, duhet thënë se ne kemi jetuar sipas pjesës më të rëndësishme të ceremonisë “Në të mirë e në të keq, në pasuri e varfëri deri sa vdekja të na ndajë”.
Me shumë, shumë dashuri,
Th. R./ KultPlus.com

“Paqja është me ju” është mesazhi i pashkëve të këtij viti

Posted on by Kult Plus

Dhjetëra qytetarë morën pjesë në meshën e ditës së Pashkëve në Katedralen “Nënë Tereza” në Prishtinë, që për mesazh ka pasur paqen në mes njerëzve.

Don Fatmir Koliqi, e cili e udhëhoqi meshën e ditës së Pashkëve tha se mesazhi që këtë vit ipeshkvi i Kosovës ka zgjedhur është po i njëjti me mesazhin e parë të cilin Jezusi u sjellë apostujve, “paqja me ju”.

Koliqi: Mesazhi më i bukur të cilin Jezusi i ringjall na e ka dhënë është paqja me ju.

“Pas meshës së ditës së sotme që e patëm dhe mesazhi më i bukur të cilin Jezusi i ringjall na e ka dhënë është paqja me ju, ajo paqja që duhet ta kemi të brendshme, një paqe të shpirtit. Është një festë e cila të krishterët, por edhe mesazh për të gjithë njerëzit vullnet mirë që mos të kemi frik për të dhuruar paqen, për të dhuruar dashuri njëri tjetrit. Ashtu siç ishte edhe mesazhi i ipeshkvit mbrëmë që kur të na mungoj ajo dashuria e brendshme, dashuria njerëzore atëherë fillon të ndjehet një zbrastësi dhe ato zbrastësi gjithmonë mund të krijojnë shqetësime dhe ankthe tek njerëzit. Ne si kishë dëshirojmë që të ju ofrojmë të gjithëve se Jezusi është një plotësim i asaj dashurie dhe asaj paqeje të cilën shpesh herë ndoshta na mungon edhe në mesin tonë”, tha Koliqi.

Njëri nga pjesëmarrësit në meshën e Pashkëve ishte edhe David Beqiri. Ai tha se kjo festë do të thotë ngadhënjim i dritës ndaj errësirës.

Beqiri: Festa e Pashkëve është festa kryesore katolike.

“Festa e Pashkëve është festa kryesore katolike që simbolizon ditën e ringjalljes së Zotit tonë Jezus Krishtit, është festa e ngadhënjimit të dritës ndaj errësirës, është festa e ngadhënjimit të së mirës ndaj së ligës. Po ashtu, është një festë e cila kremtohet me një traditë të gjatë ndër shqiptarë si festa më e vjetër, festa e dashurisë ku të gjithë besimtarët katolik, por edhe qytetarët e besimeve të tjera urojnë njëri tjetrin këtë festë duke ju dëshiruar mbarësi, paqe me njëri tjetrin”, tha Beqiri.

Festa e Pashkëve në Kosovë po festohet në mënyra të ndryshme. Një meshë tjetër është mbajtur edhe në Prizren në Katedralen “Zoja Ndihmëtare” e udhëhequr nga imzot Dodë Gjergji.

Po sonte në Kishën “Shën Ndout” në Ulpianë mbahet një meshë tjetër ndërsa në orën 19:00 në Katedralen “Nëna Terezë” do të bëhet pritja solemne për Pashkë e organizuar nga Ipeshkvi i Kosovës./ KultPlus.com

Porosija

Posted on by Kult Plus

Nga poema “Loja e eshnave” nga Fahredin Gunga.

Mos shkelni
në hirin e eshtrave
të dorës për respekt të lotit –

mos shkelni
në hirin e eshtrave
të etshëm për shiun e prillit –

të etshëm për shiun e prillit –
të ngujuar ndërmjet nofullave
të fëmijëve pa va,

mos shkelni
në hirin e eshtrave –
se ngjallen ujqit e fjetur,

se ngjallen
erërat e çmendura,
se ngjallen ujqit e fjetur,
se ngjallen
erërat e çmendura

mos shkelni në hirin eshtrave
ju lutem,
si për lulen e bardhë,
si për fëmijërinë time
të varur në udhëkryq.

Sot bëhen 21 vite nga vdekja e poetit Fahredin Gunga

Posted on by Kult Plus

Fahredin Gunga lindi në Mitrovice më 1936. Ai ishte njëri nga poetët më të shquar të poezisë bashkëkohore shqiptare, të brezit që u shfaq nga fundi i viteve të ’50-ta dhe brenda viteve të ’60-ta, shkruan KultPlus.

Brezi të cilit i takonte poeti Fahredin Gunga, ishte i përbërë nga Azem Shkreli, Ismail Kadare, Rrahman Dedaj, Dritëro Agolli, Din Mehmeti, Fatos Arapi, Ali Podrimja, Adem Gajtani, Hivzi Sylejmani e të tjerë.

Gunga e ka nisur vargimin poetikë që nga libri i parë me poezi “Pëshpëritjet e mëngjesit” (1961), duke i mbetur besnik deri te librat e fundit “Mallkimet zgjuara” dhe “Kepi i shpresës së mirë” të viteve të 80-ta.

Sot bëhen 21 vite nga vdekja e poetit Fahredin Gunga, i cili e la këtë botë më 1 prill të vitit 1997./ KultPlus.com

“Kur jam kan ni vakt i ri, e kam pas ni çifteli” (VIDEO)

Posted on by Kult Plus

Grupi Super 700, të themeluar në vitin 2003 nga Ibadet Ramadani dhe Michael Haves në Berlin të Gjermanisë na kanë befasuar të gjithëve më këngën “Kur jam kânë nji vakt i ri”.

Grupi i përbërë prej gjermanëve e këndojnë këngën “Kur jam kanë një vakt i ri” me një theks më ndryshe nga që jemi mësuar ta dëgjojmë.

Antarët e grupit janë: Ibadet Ramadani, Jan terstegen, Michael Haves, Sebastian Schmidt.

Po sjellim tekstin e plotë të kësaj kënge folklorike shqiptare:

Kur jam kan ni vakt i ri
E kam pas ni çifteli
Kange e lojna dhe mahi
Me t’u shkri zemra tuj ndi

Oj lum lum oj lumi une

O nji syzez e kam pas kojshi
Shume marak tuj knu me m’ni
Dite per dite m’rrinte karshi
Ni dite m’thirri me i shku n’shpi

Oj lum lum oj lumi une

O une i mjeri kesh mashtru
N’shpi t’syzezes ni dite jam shku
Mire jam ule jam rehatu
Ja kem nis me knu e me lu

Oj lum lum oj lumi une

O sa u bona pak rahat
Kisi n’der rak tak tak
Shpejt e shpejt jam dal n’hajat
Aty ish kane ni shtrige plake

Fort po sillka me lagraç
Desh ma thej njonen kopaç
Oj mejr mjer oj mjeri une

O shpejt e shpejt jam dal n’oborr
Gati m’hangen ni qen qorr
Turr e vrap jam dal te koshi
Aty ish ma i madh sharofi

Shpejt e shpejt jam dal n’sokak
Gati m’hanger ni minak
Oj mjer mjer o i mjeri une

O shpejt e shpejt jam dal ne baçe
E jam ndal te molla lalçe
Kam kthy kryt me kqyr nihere
O ish kon dal syzeza n’dere

Ma e mire se lul pranvere
More djal hajde najhere
Oj lum lum lum lum oj lumi une

Shqipëria, befasia që ia vlen të vizitohet

Posted on by Kult Plus

Për të aplikuar filozofinë e turizmit të qëndrueshëm fillojmë të zbulojmë Shqipërinë, këtë vend befasues, ende pak i njohur dhe larg turizmit masiv, shkruan faqja e njohur turistike italiane e internetit “GoodTrekking.it”.

Kombi për vite ka qenë nën regjimin komunist (nga viti 1946 deri në vitin 1990) dhe shumë bunkerë të dukshëm në të gjithë territorin e dëshmojnë. Për të kujtuar këtë periudhë të historisë ushtarake dhe jetën e përditshme të njerëzve, u ndërtua një bunker muze BUNK’ART 2 pranë zonës së këmbësorëve të Tiranës, e cila rindërton ngjarjet e Ministrisë së Brendshme të Shqipërisë nga viti 1912 deri në 1991 dhe zbulon sekretet dhe tmerret e saj.

Një tjetër simbol është Blloku, lagja e modës e qytetit me restorante, bare, dhe kafene që dikur ishte zonë “e ndaluar” dhe e paarritshme në të cilën diktatori Enver Hoxha jetonte me anëtarët e vet dhe ku është akoma ish-rezidenca e tij e banimit.

Shtëpitë me ngjyra pastel që i japin një atmosferë të gëzuar kryeqytetit janë një kontrast i këndshëm; ato janë rilyer në sajë të një projekti rizhvillimi nga ish-kryetari i bashkisë, Edi Rama.

Nuk ka qendër të vërtetë historike, por nuk mungojnë edhe vendet interesante siç janë Sheshi Nënë Tereza, Xhamia Ethem Beut dhe Sheshi Skënderbej (hero kombëtar) ku ndodhet monumenti i tij, i hipur mbi kalë, Teatri, Biblioteka Kombëtare dhe Kulla e Sahatit.

Me përmirësimin e kohës, njerëzit shëtisin në parqet e panumërta të qytetit, që janë pjesë e programit të Gjelbër, po me iniciativën e Edi Ramës, i cili ka krijuar hapësira të gjelbra.

Nëse shkojmë më tej në veri, arrijmë në Krujë, një qytet piktoresk mesjetar, simbol i rezistencës anti-osman, të vendosur në shpatet e malit me një pamje spektakolare të luginës poshtë dhe detit Adriatik, ku në ditë të qarta mund të shihni Ostuni (Puglia).

Ndër atraksionet e ndryshme, përveç pazarit të vjetër, ekziston edhe kalaja, brenda mureve të saj, muzeu Skënderbej dhe një fshat mesjetar i banuar ende.

Pranë, nga një rrugë e paasfaltuar, mund të arrini në shpellën mbresëlënëse të Bektashinjve.

Në “tokën e shqiponjave” ka ende shumë për të parë, siç është Berati, qyteti i një mbi një dritareve, pjesë e Trashëgimisë Botërore të UNESKO-s, ose Durrësi, kryeqyteti i portit më të vjetër në Mesdhe, ose Pogradeci, ndodhet në brigjet e liqenit të Ohrit me ujin kristal të qartë dhe sigurisht … detin e mrekullueshëm!

Shqipëria ka pësuar disa sundime, ajo e Perandorisë Osmane, ajo e Mbretërisë së Italisë dhe më në fund ajo e Partisë Komuniste, tani është një republikë, jo larg prej nesh, që ia vlen të vizitohet./ KultPlus.com

“Sikur Hana” të mërkurën në Muzeun e Kosovës

Posted on by Kult Plus

Më 4 prill me fillim nga ora 19:30, në Muzeun e Kosovës, hapet ekspozita “Sikur Hana”, shkruan KultPlus.

Ekspozita e realizuar nga Die Morina dhe Zgjim Zyba, na sjellë loken Hanë dhe plot gra të tjera të cilave nuk u ka munguar aspak guximi.

“Në këtë ekspozitë na ipet mundësia të hyjmë nën të dukshmen e gruas dhe të marrim kuptimin e thellë të saj, të fshehtën që ne duam ta shohim. Të përzgjedhësh rrugën dhe të ndjekësh atë kërkon guxim. Lokes Hanë dhe plot grave tjera nuk u ka munguar aspak guximi”, thuhet në njoftimin e ekspozitës./ KultPlus.com

Bebe Rexha sjell këngë me Ne-Yo (VIDEO)

Posted on by Kult Plus

Ylli i muzikës R&B ka lansuar këngën e re në bashkëpunim me këngëtaren Bebe Rexha dhe Stefflon Don.

Kënga mban emrin “Push Back”.

“Më pëlqen kur një grua di si të lëvizë. Më pëlqen kur një grua është e pavarur, ka zemër dhe mendje. Është rahat me trupin e saj. Dhe, kur të lëshohet muzika ajo është e gatshme për lëvizje. Ajo u tregon sa me vetëbesim dhe rahat është. “Push Back”, flet për këto gra”, ka thënë Ne-Yo, transmeton Koha.net.

Kënga, gjithashtu pritet të futet në albumin e radhës që quhet “Good Man”, dhe pritet të lansohet më 8 qershor 2018./ KultPlus.com