Producentja e serialit ‘Rrushe’, Doresa Rexha, ka reaguar pas diskutimeve të shumta që janë bërë pas titrimit të këtij seriali nga televizioni ‘Top Channel’, përcjell KultPlus.
Rexha nëpërmjet një postimi në Facebook ka thënë se ky titrim është bërë që t’ua mundësojnë ndjekjen edhe personave që nuk dëgjojnë apo kanë probleme me dëgjim.
Në vijim gjeni postimin e plotë:
Përshëndetje të gjithë shqiptarëve,
Si producente dhe aktore në serialin “Rrushe”, fillimisht dua ta falënderoj gjithë audiencën shqiptare kudo në botë për vlerësimin e mirë që i ka bërë e po i bën serialit “Rrushe”, prodhim i GjirafaStudios! Kjo është shumë motivuese për mua dhe për ekipin që të vazhdojmë me planifikimin për realizimin e Sezonit të Dytë të serialit.
Duke parë debatet që ka ngjallur titrimi i serialit “Rrushe” në Top Channel, mund të them që arsyeja kryesore pse kemi vendosur të kemi titrim ka qenë ofrimi i mundësisë që serialin të mund ta përcjellin dhe ta shijojnë edhe personat që nuk mund të dëgjojnë apo personat me dëgjim të dëmtuar. Veç kësaj, ata që e kanë parë serialin, e kanë vërejtur që për hir të origjinalitetit, në serial, përveç gjuhës dialektore, përdoren edhe lokalizmat, zhargoni, “slang”-u, etj., që jo domosdo kuptohet nga të gjithë, prandaj është menduar që titrimi për transmetim në Top Channel të bëhet sa më afër gjuhës standarde, në mënyrë që çdo detaj i dialogjeve të kuptohet nga gjithë audienca shqiptare, siç është praktikë në shumë vende të botës me diversitet gjuhësor.
Unë besoj që diversiteti gjuhësor veç na pasuron më shumë si komb, nuk na ndan.
Uroj e shpresoj që së shpejti ta kemi Sezonin e Dytë të serialit “Rrushe” para publikut shqiptar, pse jo bashkëprodhim mes Kosovës dhe Shqipërisë! Ndërsa Sezonin e Parë mund ta ndiqni çdo të martë nga ora 21:00 në Top Channel.
P.S Ju kërkoj ndjesë gjitha mediave të cilat më kanë kontaktuar këto ditë mirëpo për shkak angazhimeve e kam pasur të pamundur të paraqitem./KultPlus.com
Sot mbushen 24 vjet kur më 25 maj 1998, forcat serbe hynë në Lybeniq të Pejës, duke vrarë e masakruan nëntë banorë të Lybeniqit, e më vonë edhe burrat e tjerë të fshatit.
Gjenocidi i kryer në këtë vendbanim ndaj popullsisë se pafajshme shqiptare më 25 maj 1998 dhe më 1 e 7 prill 1999, është njëri nga krimet me të mëdha që kanë kryer forcat policore, ushtarake e para ushtarake serbe në Kosovë.
Drejtuesi i Departamentit të Historisë Bashkëkohore në Institutin e Historisë, Shkodran Imeraj, ka thënë kohë më parë se drejtësia vendore dhe ajo ndërkombëtare kanë dështuar në ndjekjen dhe dënimin e autorëve të masakrave që u kryen në Lybeniq gjatë viteve 1998-1999.
Sipas Imerajt, gjenocidi që kryen forcat ushtarake, policore e paramilitare serbe kundër banorëve shqiptarë të Lybeniqit, është gjenocidi më i madh që është kryer kundër popullsisë shqiptare në historinë e fshatit Lybeniq. / KultPlus.com
Ngjarja e luftës në Afganistan nga ushtria amerikane me talebanët është tematika e këtij filmi i cili synon të përçojë te shikuesit një mesazh të fortë vëllazërimi dhe sakrificës për mbijetesë. Filmi është i bazuar në realitetin e luftës në Afganistan, transmeton KultPlus.
Një ushtar amerikan, rreshteri i grupit , ndodhet ne Afganistan për luftën kundër talibanëve. Papritmas, përkthyesi i tyre vritet nga talibanët dhe kështu që e zevendësojnë me një të ri. Fatkeqësia më e madhe është kur gjatë hulumtimit për bazën minore të talibanëve, të dyja grupet, amerikanët dhe talibanët, ndeshen ndërmjet tyre. Nga ushtria e amerikanëve mbijetojnë vetëm rreshteri Klinll dhe përkthyesi afgan, Ahmedi.
Të jesh ushtar nuk është e lehtë. Kjo vlen sidomos kur gjendesh në mori problemesh, sfida të cilat bëhen edhe më të vështira kur je në një territor të huaj dhe larg familjes, të dashurëve tuaj. E as të jesh përkthyes, bashkëpuntor i armiqve të armiqve tuaj. Punë që kërkon guxim dhe veprim me rrezikshmëri të madhe
7 tetor, si shpagim per sulmet terroriste të 11 shtatorit te Amerikes, 1300 trupa amerikane u dërguan në Afganistan. Në dhjetor të 2011 ky numër u rrit në 98 000 trupa amerikanë të dërguar. 50 000 përkthyes afganë u punësuan nga ushtria amerikane, me marrëveshjen për të pasur të drejtën të aplikonin për vizë të emigracionit dhe për tranfserim në Amerikë.
30 gusht 2021. Forcat e Armatosura të SHBA-ve kryen tërheqjen e tyre nga Afganistani. Kështu i dhanë fund një fushate të gjatë 20-vjeçare. Një muaj më vonë talibanët e morën kontrollin e plotë. Më shumë se 300 përkthyes dhe familjet e tyre u vranë, për bashkëpunimin e tyre me amerikanët. Mijëra të tjerë janë në arrati.
E të gjitha këto ndërlidhje, marrëveshje, zotime, e lufte për mbijetesë, përçohen në filmin ‘The Covenant’./ KultPlus.com
Sam Smith ka anuluar koncertet e ardhshme në Birmingham dhe Glasgow me këshillën e mjekëve, pasi iu desh të ndalonte koncertin e së mërkurës në Mançester vetëm pas katër këngëve për shkak të një dëmtimi të kordave vokale, shkruan BBC, transmeton KultPlus.
Një zëdhënës i yllit tha në Instagram se mjekët rekomanduan një “pushim të plotë vokal”.
“Nëse vazhdon të këndojë, do t’i bëjë dëm të përhershëm zërit”, shpjeguan ata. “Nëse pushon pak, do të mund të performojë sërish”.
Këngëtari tha se rimbursimet janë në dispozicion.
Ai së fundi u tërhoq nga një koncert në Glasgow, për arsye shëndetësore, dhe e riplanifikuan atë për të enjten më 25 maj, ndërsa data e Birminghamit ishte riorganizuar gjithashtu për të shtunën e ardhshme.
Një Smith që kërkon falje shpjegoi më herët në Instagram se është kontraktuar nga një virus disa javë më parë, përpara pjesës evropiane të turneut të tij, por kishte filluar përsëri të ndihet keq në fillim të shfaqjes së të mërkurës.
“Gjatë këngës sime të tretë, vura re diçka që nuk shkonte me zërin tim. U luta që vetëm zëri im të zgjohej për shfaqjen, por në këngën e katërt munda të ndjeja se diçka nuk shkonte vërtet.”
“Sinqerisht jam i thyer në zemër që nuk munda ta përfundoja shfaqjen sonte për të gjithë ju. Ju dua të gjithëve. Më falni më falni.”
Mbajtësit e biletave do të mund të marrin paratë e tyre për të tre koncertet e anuluara tashmë në pikën e blerjes./ KultPlus.com
Organizata joqeveritare ‘TOKA’ e cila ofron programe edukative dhe inovative për të rinjtë, këtë vit do të realizojë për herë të parë ‘Ditën e Solidaritetit’, përcjell KultPlus.
Kjo ditë do të shënohet më 3, 5 dhe 10 qershor, ku ‘TOKA’ së bashku me 25 biznese partnere do të përkrahë nismat rinore për shëndet mendor dhe fëmijë me nevoja të veçanta.
Thirrja për vullnetarë do të jetë e hapur deri në fund të muajit maj dhe të drejtë aplikimi kanë personat e moshës 16-30 vjeçare që jetojnë në Prishtinë, Ferizaj, Kaçanik dhe Hani i Elezit.
Klikoni KËTU për të mësuar më shumë detaje./ KultPlus.com
Pse s’vjen o dit’e mirë Pse vallë nuk vjen? Gjer kur në errësirë? Mos Zoti të pëlqen?
As hidhe gardhë, Dhe shpejto pakë O dit’e bardhë, Dhe jakë,jakë
Se të pres, Nuk vdes
Jak’o dit’e uruar Që lind nga perendon, At’an e ke ndrituar E ne pse na harron
Dritëz’e jetës Edhe e motit Dhe se vertetës, Dhe gaz i zotit,
Ndritna E zgjohna.
Kjo poezi që hyn në mesin e poezive të tjera të njohura si “Fyelli”, “Bilbili”, “Fjalët e Qiririt”, “Jeta”, e shumë poezi të tjera kanë luajtur një rol të rëndësishem në simbolikën e mendësisë shqiptare.
Ajo çka vërejmë në poezitë e tij janë dhimbja, mërgimi, largimi, malli e vuajtja e autorit, brenga e autorit dhe zjarri i fshehur brenda tij që Naimi e përçon te ne përmes poezisë. / KultPlus.com
Romani “Time Shelter” i shkrimtarit bullgar Georgi Gospodinov është fituesi i çmimit ndërkombëtar “Booker” për vitin 2023.
Fituesi u shpall nga kryetarja e jurisë, novelistja franceze-marokene Leila Slimani gjatë një ceremonie në Londër.
Gospodinov e ndan çmimin me përkthyesen e romanit, Angela Rodel.
“Time Shelter” është romani i parë që fiton çmimin, i botuar fillimisht në bullgarisht, dhe gjithashtu libri i parë bullgar i nominuar.
Çmimi, i cili ndahet në mënyrë të barabartë midis autorit dhe përkthyeses, jepet çdo vit për një roman ose përmbledhje tregimesh në çdo gjuhë që është përkthyer në anglisht dhe botuar në BM ose Irlandë.
“Time Shelter”, paraqet një ‘klinikë për të kaluarën’, duke ofruar një trajtim premtues për të sëmurët nga Alzheimer, ku çdo kat riprodhon një dekadë në detaje të vogla, duke i kthyer pacientët pas në kohë.
Por, shumë shpejt e kaluara fillon të pushtojë të tashmen./ atsh / KultPlus.com
Mirëpritja e personave me aftësi të kufizuara në asete të trashëgimisë kulturore, baraz me vizitorët tjerë duhet të pranohet si detyrë e vërtetë e përgjegjësi dhe Ministria e Kulturës, Rinisë dhe Sportit po angazhohet që kjo të ndodhë.
Lidhur me këtë qëllim, një grup i personave me aftësi të kufizuara vizituan muzeun ‘’Nënë Tereza” dhe Katedralen “Zonja Ndihmëtare” në Prizren, për të parë për së afërmi hapësirat dhe për të identifikuar bashkërisht pengesat që mund të adresohen për frekuentimin tyre.
Këto aktivitete me synim të vetëdijësimit dhe veprimeve konkrete, po mundësohen në kuadër të projektit ‘’Nuk ka trashëgimi kulturore pa ne!’’, implementuar nga HANDIKOS, në bashkëpunim me CHwB Kosova, mbështetur nga MKRS. / KultPlus.com
Si shumica e ikonave më të mëdha pop, Tina Turner, e cila vdiq të mërkurën në moshën 83 vjeç, kishte më shumë se një jetë.
Ajo filloi si një këngëtare R&B dhe si një kërcimtare e pakapërcyeshme, që bashkë me bashkëshortin e saj Ike, bëri shfaqjen më të emocionueshme në skenë, anëtare e James Brown. Pastaj ajo u bë një heroinë rok, që këndoi në turne me Rolling Stones dhe shërbeu si Rregjina e Acidit për grupin The Who. Dhe në fund ajo u bë e mbijetuara përfundimtare – gruaja e abuzuar që e braktisi burrin e saj dhe, pa kërkuar falje, mori një kurorë vetëm për vete, shkruan The New York Times, transmeton KultPlus.
Këtu janë disa nga momentet më të mëdha muzikore të Tina Turner, në regjistrim dhe në film.
Hitet e hershme R&B të Ike dhe Tina janë momente elektrizuese të fuqisë muzikore të papërpunuara, por retrospektivisht ato gjithashtu janë thellësisht të shqetësueshme në përmbajtjen e tyre lirike. Singlli i parë i duetit paraqet vokalin e shënuar të Tinës dhe e lë të këndojë për një marrëdhënie të trazuar në të cilën burri i saj e keqtrajton dhe “më bën të buzëqesh edhe pse zemra ime vuan”, megjithatë ajo ende premton të “bëj çdo gjë që ai dëshiron”. Fjalët janë shkruar nga Ike Turner, i cili ka kredi të vetme si autor i këngëve.
Tekst më i çuditshëm dhe i pakëndshëm: Tina pranon jo dashurinë, por adhurimin dhe thotë se në këmbim, “vetëm pak vëmendje, ti e di, do të më ndihmojë të kaloj”. Qarja e thellë e Tinës mbi një linjë basi kërcuese ishte tingulli më i seksit dhe më i pakontrolluar në muzikë në atë kohë, por është pothuajse e pamundur të dëgjosh këto këngë tani pa nxirë fytyrën nga spektakli i tmerrshëm që Tinë më vonë do të përshkruante për martesën e saj me Ike.
Hiti më i madh i viteve të hershme të Ike & Tina – ai shkoi në vendin e dytë në tabelën R&B të Billboard dhe u rendit në Top 20 pop – është një rutinë më e lehtë për një çift që ngulmon në problemet e tyre. Përsëri, epo. Por të paktën këtë herë kënga nuk ishte e Ike. Ai u shkrua nga Rose Marie McCoy së bashku me Joe Seneca dhe James Lee, dhe dyshja R&B Mickey & Sylvia u përfshinë në regjistrim.
Phil Spector e kishe parë drejtpërdrejtë këtë shfaqje me një energji të lartë. Ajo regjistroi ketë këngë të shkruar nga Jeff Barry dhe Ellie Greenëich,në bashkëpunim më labelin, Philles. Kjo këngë cilësohet si dështim, gjë që bëri që albumi që mban të njëjtin titull, të vonohej të dilte në treg për 3 viteve.
Këngë tjetër kemi Ike dhe Tina Turner, me “Proud Mary”, 1971
Për të prezantuar këtë hit, Tina u shpreh: “Ne kurrë nuk bëjmë asgjë të këndshme dhe të lehtë. Ne e bëjmë gjithmonë mirë dhe ashpër.”
Tina si kantautore e vlerësuar tregon për herë të parë historinë e saj, duke treguar edukimin e saj në fshatin Tennessee, ku tregon se shkonte në fushë gjatë ditëve të javës. Kënga tregon një përfytyrim, duke mos imagjinuar kurrë një jetë përtej thjeshtësisë së qytetit të vogël.
Këngë që ishte pjesë e versionit filmik “Tommy”,ku Tina luan rolin e ”ciganës’ .Ajo përdor seks dhe drogë për të kuruar djalin. Tina pas kësaj, del si simbol i seksit dhe famës botërore. Pak kohë pas kësaj ajo u largua nga Ike.
Kjo këngë doli kur Tina ishte diku 40 vjeçare dhe marka e saj ishte mbijetesa. Këngët ne albumin “Privat Dancer”, u shkruan kryesisht nga burrat, por u përshtaten në mënyrë të përkryer me rolin e një gruaje të pavarur që nuk heq dorë nga të qenurit vetëm. Kjo këngë tregon historinë e një gruaje me zemër të thyer, e cila dhe pse tundohet ka frikë të provojë dashurinë përsëri.
U shkrua nga Holly Knight dhe u publikua nga grupi i saj Spider. Paraqet një kërkesë të sigurtë dhe sfiduese për një burrë. Ajo lëshon vargun e vrullshëm “Should I ?”,pra “Duhet unë ?”
Këngë e regjistruar fillimisht nga Bonnie Tyler. ”The best” është këngë lavdërimi për një të dashur. Mirëpo nëse mbylli sytë është kënaqësi për vete. Ashtu siç shprehet Tina:” “Ti je thjesht më i miri, më i mirë se të gjithë të tjerët”. / KultPlus.com
Një holandez 40-vjeçar, i cili ka qenë i paralizuar që nga viti 2011, mund të ecë përsëri duke përdorur një “urë digjitale” midis trurit dhe palcës kurrizore.
Truri i tij tani mund të flasë drejtpërdrejt me pjesën e palcës kurrizore që kontrollon lëvizjen, duke e lejuar atë të qëndrojë dhe të ecë natyrshëm. Pajisja u zhvillua nga një grup neurokirurgësh dhe neuroshkencëtarësh nga Universiteti Teknik i Lozanës në Zvicër. Është hera e parë që kjo teknikë novatore, e përshkruar në revistën Nature, është testuar mbi një pacient, por tashmë është e qartë se është hapur një rrugë e re në fushën e rehabilitimit.
“Ndihem si një fëmijë që mëson të ecë përsëri”, tha për BBC, Gert-Jan Oskam. 40-vjeçari holandez ishte 29 vjeç kur në vitin 2011 teksa punonte në Kinë mbeti viktimë e një aksidenti të rëndë me biçikletë, i cili e privoi atë nga përdorimi i këmbëve dhe krahëve.
“Kam qenë në gjendje të qëndroj me këmbët e mia, kam mësuar të eci natyrshëm dhe mund të kontrolloj lëvizjet dhe forcën time”, tha Gert-Jan në konferencën për shtyp të organizuar nga Nature.
Pajisja përbëhet nga dy implante elektronike: i pari vendoset mbi zonën e trurit, i dyti mbi pjesën e palcës kurrizore. Kjo strukturë artificiale, duke vepruar si një urë, lejon kalimin e impulseve elektrike midis neuroneve dhe fibrave nervore, duke lejuar trurin të komunikojë me palcën kurrizore, e cila kontrollon lëvizjen e këmbëve. Qëllimi është të munden njerëzit e paralizuar të lëvizin përsëri në mënyrën më të natyrshme të mundshme, duke përshtatur ritmin e tyre edhe në terrene të pabarabarta, pa humbur ekuilibrin.
Sistemi në bazën e urës digjitale është ende i rëndë. 64 elektroda regjistrojnë sinjalet e korteksit sensorimotor duke përdorur frekuenca që inteligjenca artificiale ka lejuar të identifikojë, më pas sinjalet përkthehen në sinjale elektrike dhe transmetohen në palcën kurrizore, ku merren nga 16 elektroda dhe deshifrohen në kohë reale, pa pasur nevojë për kompjuter për këtë funksion.
Ky rezultat u mundësua nga grupi kërkimor i Universitetit Politeknik të Lozanës i drejtuar nga Gre’goire Courtine, i njëjti që në shkurt 2022 kishte eksperimentuar me një sistem elektrodash që mund të kontrolloheshin me një tabletë, e cila dërgonte stimuj elektrike në muskujt në mënyrë të programuar. “Qasja e re është krejtësisht e ndryshme,” tha Courtine në konferencën për shtyp. “Është një urë digjitale, ajo që ne kemi vendosur midis trurit dhe palcës kurrizore. Nuk është një stimulim i thjeshtë, por një ndërfaqe që bën të mundur një bisedë të drejtpërdrejtë midis trurit dhe palcës kurrizore”.
U deshën pesë minuta për të kalibruar pajisjen, e cila mbeti e qëndrueshme dhe efikase për më shumë se një vit, edhe kur burri ishte në shtëpi pa mbikëqyrjen e studiuesve.
“Qëllimi ynë i radhës është të kemi sisteme shumë të vogla dhe ne presim që teknika të ketë zhvillime të jashtëzakonshme falë miniaturizimit”, vuri në dukje Courtine. Paralelisht, studiuesit po punojnë për të vazhduar eksperimentimin, i cili në fazën tjetër përfshin përfshirjen e tre personave të paralizuar. / KultPlus.com
Një atmosferë dasme ku kënga kishte pushtuar çdo cep të shtëpisë ishte shfaqja e parë që ju dha publikut, por përkundër faktit që filmi po niste me një moment gëzimi siç është ai i dasmës, diçka e pazakonte po ndodhte njëkohësisht dhe këtë detaj publiku e vëren qysh në minutat e parë.
Pak lot e dy fytyra të rënduara, ishin ato të çiftit që po kurorëzonin dashurinë e tyre. Këtë ndjesi e përforconte edhe më shumë muzika shoqëruese në film dhe pamjet vizuale të cilat të jepnin ndjesinë e diçkaje misterioze dhe shpesh t’i rriste bebëzat e syrit e t’i përshpejtonte të rrahurat e zemrës.
Është kjo përshtypja e parë të cilën ta jep filmi “I fshehur” me skenar dhe regji të Arsim Fazlija i cili dje u dha premierë në Cineplexx në Prishtinë, shkruan KultPlus.
“I Fshehur” është një film i shkëlqyeshëm që nxjerr në pah një histori bazuar në ngjarje të vërtetë. Ky film dramatik përshkruan rrugën e një çifti të martuar të cilët përballet me një problem të pazakontë, i cili në shkencë njihet si fenomen parapsikologjik, ndërsa në kontekstin fetar, quhet pushtim nga demoni. Nëpërmjet skenarit tërheqës dhe regjisë me shije të veçantë, Arsim Fazlija përshkruan me imtësi dhe ndjeshmëri sfidat që përjetojnë personazhet kryesorë. Ndërsa paraqet një çift të dashuruar që me profesion ishin mësues, filmi gradualisht ndërthuret me momente tensioni dhe frike, duke krijuar një atmosferë e cila shton misterin dhe shkakton ankth te publiku.
Përshkrime të bukura vizuale dhe interpretim i jashtëzakonshëm:
Një aspekt i veçantë i filmit ishte edhe paraqitja e dy interpreteve kryesorë të filmit, të cilët dhanë një performanca të jashtëzakonshme. Ata përjetësojnë me një mjeshtëri të rrallë, shqetësimin, vuajtjen dhe shpresën e çiftit të martuar, duke sjellë emocionet në një nivel të thellë. Nora (Gresa Pallaska), gruaja e shqetësuar, që në sytë e burrit dukej një e çmendur, luajti me ndjeshmëri dhe pasion duke e bërë publikun të futet thellë personazhit të saj, ndërsa Dini (Naser Rafuna), ishte bashkëshorti i cili përjetoj një transformim dramatik, por që fajin gjithmonë e kërkonte dikund tjetër, në këtë rast tek Nora.
Interpretimi i tyre i fortë bëri që audienca t’i bashkëngjitet emocionalisht personazheve dhe të ndihet pranë tyre gjatë udhëtimit të tyre të vështirë.
Në aspektin vizual, “I fshehur” përdor vështrimin artistik të kamerës dhe teknikat kinematografike për të krijuar një atmosferë të errët dhe të shtrembër. Imazhet e shtrembëruara dhe dritat e errëta përcjellin mjeshtërisht tensionin dhe përshkruajnë ndjesinë e një botë të çoroditur dhe të pushtuar nga forcat misterioze. Pa harruar, elementet e dizajnit të tingujve dhe muzikën e kompozuar mirë që shtojnë ndjeshmërinë dhe intensitetin emocional të secilës skenë.
Dialogu i thellë dhe sfida midis shkencës dhe besimit fetar:
Filmi ofron edhe një pasqyrë interesante të ndërveprimit midis shkencës dhe besimit fetar. Ai shpalos debatet e ndërlikuara në lidhje me shpjegimin e ngjarjeve.
Dialogu i thellë dhe i mprehtë midis personazheve ndihmon në zgjidhjen e konfliktit të tyre të brendshëm dhe zhvillimin e historisë.
Rrëfimi i bazuar në një histori të vërtetë:
Bazuar në një histori të vërtetë, “I fshehur” na jep një perspektivë të rrallë dhe të fuqishme mbi sfidat e jetës reale dhe forcën e dashurisë dhe besimit në përballje me të keqen e papritur.
“I fshehur” është një film i rëndësishëm dhe emocionues që na fton të shqyrtojmë thellësisht sfidat e jetës dhe ndikimin e besimeve fetare në përballje me fenomene të pazakonta.
Megjithëse filmi eksploron temat e pushtimit nga demoni dhe fenomeneve parapsikologjike, ai nuk pretendon të japë përgjigje të qarta dhe të definojë çfarë është e vërteta. Përkundrazi, filmi na inkurajon të mendojmë dhe të vlerësojmë kuptimin e ndryshëm që secili prej nesh mund të ketë mbi këto çështje të kompleksuara.
Në film luajnë aktorë nga Kosova dhe Maqedonia e Veriut si: Naser Rafuna, Gresa Pallaska, Bajrush Mjaku, Adrian Aziri, Ilire Vinca, Vebi Qerimi, Hamdi Rashiti, Muzafer Etemi, Bashkim Ramadani, Teuta Ajdini, Ajete Rexhepoviq, Hysen Binaku, Mendim Murtezi, e shumë aktorë të tjerë.
Një pjesë e këtyre aktorëve si dhe regjisori e producentja e filmit, menjëherë pas shfaqjes mbajtën një konferencë për media.
Fillimisht fjalën e mori producentja e filmi, Drita Mamuti Fazlija e cila u arsyetua edhe për mungesën e aktorëve kryesorë të filmit në këtë konferencë, dukë thënë se për arsye të angazhimeve të aktorëve dhe zgjatjes së premierës së filmit në Kosovë, ata nuk janë prezent.
Më shumë rreth konceptit të skenarit dhe regjisë, foli Arsim Fazlija i cili fillimisht falënderoi të pranishmit, dhe tutje tregoi se qëllimi kryesor i tij ka qenë që filmi më shumë të bazohet në lojën e aktorëve e jo në skenat vizuale e pikat e tjera.
“Ajo që më ka intriguar më tepër që t’i qasem kësaj teme si ide, është përshtypja që më ka lënë se si një person kalon në karakter tjetër, gjë që shkenca e quan si karakter i shumëfishtë, ndërsa feja si xhindosje. Unë pasi e kam parë rastin që është ngjarje e vërtetë, kam bërë hulumtime dhe jam takuar me psikologë, psikiatër e teologë dhe e kam parë sa shumë telefonata kanë për raste ë tilla, e aty e kam kuptuar se sa është i përhapur në shoqërinë tonë ky problem, thuajse u xhindos gjithë qyteti dhe kjo më ka lënë shumë përshtypje”, u shpreh regjisori duke vazhduar tutje të tregoi se edhe me ekipin e filmit kur e ka diskutuar si problem të gjithë e kanë njohur, por sipas tij ky është një problem që të gjithë e mbajnë të fshehur, askush nuk e flet, prandaj edhe filmi titullohet “I fshehuri”.
“Ne nuk ja kemi vënë pikën që të themi është problem psikologjike, psikiatrik apo fetar, ne thjesht jemi marr me problemin me të cilin ballafaqohet një çift në këtë rast. Këtu gjithashtu e kemi trajtuar edhe çështjen se pse njeriu zgjedhe të shkoj te hoxha përderisa ka psikiatër e psikologë. Ndoshta kjo ndodhë sepse njeriu gjithmonë është i prirur të gjej rrugën më të shpejtë. Ky është realiteti jonë”, u shpreh regjisori.
Ndërsa aktori Bajrush Mjaku tregoi përshtypjet e tij të para pas leximit të skenarit si dhe foli për lojën e dy aktorëve kryesorë në film.
“Unë pasi e kam lexuar skenarin jam intriguar, pasi kjo temë është e njohur në familjet tona dhe mendoj që janë të rrallë çiftet bashkëshortore që në fillimet e tyre nuk kanë mosmarrëveshje, ndoshta jo deri në këtë pikë, por ka. E mirë është të shërohen, nuk ka rëndësi ku e gjejnë shërimin. Filmi ka një qasje shumë serioze dhe jam i lumtur që jam pjesë e këtij filmi“, th Mjaku i cili krejt për fund shtoi edhe disa fjalë të mira për aktorët kryesorë të filmit e në veçanti për Gresa Pallaskën të cilën e vlerësoi si një aktore shumë dimensionale dhe të jashtëzakonshme.
Filmi “I fshehur” nga sot do të shfaqet në Cineplexx të Maqedonisë së Veriut, Kosovës dhe Shqipërisë.
Filmi është financuar nga Agjencioni i Filmit të RMV në vitin 2018. Incizimi i filmit filloi po në 2018-n dhe ka zgjatur deri në fillimin e vitit 2019. Premiera e mbyllur (për shkak të Covid-19) u dha në 2021, e më pas filmi ka udhëtuar në festivale ndërkombëtare, të vendit ku edhe ka marrë disa çmime. / KultPlus.com
Pasioni, dashuria për profesionin dhe puna e palodhur ishin ato që shtynë përpara artisten e madhe Margarita Xhepën që të arrinte majën e karrierës, pavarësisht vlerësimit të ulët monetar.
Që në fëmijëri, Xhepa kujton se poezia e shkrimtarit të madh Naim Frashëri, ishte indicia e rrugëtimit të saj kinematografik…
“Poezia më ka ngjitur në skenë për herë të parë…më ka bërë përshtypje vargu i Naim Frashërit, “Shqipëri o nëna ime”, isha fare e vogël në bankat e shkollës, kur nisa ta interpretoj, dhe që nga ajo kohë, e kam dashur dhe do e dua gjithmonë poezinë….poezia është forca e fjalës. Mendoj se sot, marrëdhëniet njerëzore janë tronditur paksa, dhe në çdo poezi gjej plot ngjarje”, thotë aktorja.
Pa para, net pa ngrëne e pa gjumë, kështu e kujton Xhepa vështirësinë e suksesit…
“Ka vështirësi ç’është e vërteta, unë e krahasoj me jetën tonë, kur shoh disa filma them shyqyr që i kam bërë, nuk kemi fituar gjë por ishte pasioni i madh për punën. Ne kemi punuar pa para, sot janë të prirur më tepër të dhënë mbas fitimit. Është dashuri për profesionin. Janë xhiruar filma që punohej më orë të tëra pa u ankuar, shumë sakrificia, kemi fjet edhe pa ngrënë, nëpër dëborë, me filmin e fundit kemi qëndruar 8-9 orë në dëborë, të gjithë gra”, rrëfen ajo.
E teksa sot arti nuk ka më ‘fuqinë e dikurshme’, Xhepa bashkëpunimin me plejadën e vjetër të aktorëve e quan ‘koha e të mëdhenjve’.
“Po të them 3 emra do të gaboj, por edhe 13 emra po të të them, prapë do të gaboj, ishte koha e të mëdhenjve…ishin aktorë të zgjedhur, që vinin me pasion të madh dhe në emër të artit. Ajo kohë nuk e di nëse do të ekzistoj më, ndihmonin njërit-tjetrin, bashkëpunim i ngushtë. Më mungojnë tani, kam nostalgji të madhe për atë kohë, për ato aktorë që mbeten të pa vdekshëm në memorien e aktorit”, shprehet e madhja Margarita Xhepa.
I vetmi peng i artistes, ishte roli nga antikiteti…
“Kisha peng të luaja mbretëreshën e trojanit, te Euripidi, por një regjisor grek ma besoi dhe ishte rol i pjekurisë time artistike dhe fituam disa çmime, ai peng mu realizua”.
Xhepa ka një mesazh për të rinjtë sot: “Të rinjtë duhet të kenë dashuri përgjegjësi, të mos mendojnë direkt anën materiale, por mbi të gjitha të provojnë të bëjnë diçka cilësore dhe gjithçka vjen vetë, i ftoj ta duan artin, të mos kënaqen më pak.” / KultPlus.com
Emra të njohur të botës së muzikës dhe fansa i kanë bërë nderimet e saj këngëtares legjendare, Tina Turner e cila ndërroi jetë një ditë më parë në Zvicër në moshën 83-vjecare.
Beyonce e quajti yllin e hiteve “The Best” dhe “What’s Love Got To Do With It” si mishërimin e “pasionit dhe forcës”. “Ajo ishte me të vërtetë një interpretuese jashtëzakonisht e talentuar,” shkroi në rrjetet sociale Mick Jagger.
“Ishte frymëzuese, e ngrohtë, bujare dhe plot humor. Më ndihmoi shumë kur isha i ri dhe unë këtë, nuk do ta harroj kurrë,” shtoi ylli i Rolling Stones.
Sir Elton John e cilësoi Tina Turner një “legjendë totale në rekord dhe në skenë”. “Ne kemi humbur një nga performueset më emocionuese dhe elektrizuese që mund të ekzistojnë. Ajo ishte thjesht e paprekshme,” u shpreh këngëtari i madh.
Familja Obama e lavdëroi atë për “faktin që i këndoi të vërtetës si përmes gëzimit, ashtu edhe përmes dhimbjes. Atyre iu bashkua presidenti aktual i SHBA-së Joe Biden, i cili vuri në dukje sakrificat e këngëtares që e nisi jetën si bijë fermeri, ndërsa përshëndeti “talentin e saj të rrallë, që vjen një herë në brez”.
Lëvdata të mëdha patën për këngëtaren e ndjerë edhe Mariah Carey dhe Oprah Winfrey, të cilat e vunë theksin veç të tjerash tek forca e saj për të kapërcyer vite të tëra abuzimi në familje.
E pagëzuar si Mbretëresha e Rock ‘n’ Roll-it, zëri i Turner është krahasuar me një uragan, e po kështu edhe performanca e saj skenike ishte e pashoqe. E lindur në Tenesi dhe e rritur në kishë, këngëtarja preku majat e famës në vitet 1960.
Fillimisht në një grup me të shoqin Ike Turner, pas ndarjes ajo gjeti suksesin e saj të madh si artiste solo me hite, duke përfshirë What’s Love Got To Do With It, Let’s Stay Together, Steamy Windows, Private Dancer dhe temen e James Bondit, GoldenEye.
Shumë prej homazheve iu referuan faktit që ajo arriti t`i largohej abuzimeve të bashkëshortit. Organizata e bamirësisë Women’s Aid zgjodhi pikërisht njërën nga këngët e Tina Turnerit për t`i bërë këngëtares këtë përshkrim: Ajo gjithmonë do të jetë thjesht më e mira./shqip/ KultPlus.com
Ylli i “Rock and Roll”, Tina Turner, ka ndërruar jetë në moshën 83-vjeçare. Këtë lajm e ka konfirmuar dje zëdhënësi i saj. Në një deklaratë u tha se:
“Tina Turner, ‘Mbretëresha e Rock’n Roll’-it ka ndërruar jetë sot e qetë në moshën 83-vjeçare pas një sëmundjeje të gjatë në shtëpinë e saj në Kusnacht afër Zyrihut, Zvicër. Me të, bota humbet një legjendë muzikore dhe një model”.
Ylli i lindur në Shtetet e Bashkuara të Amerikës ishte një nga këngëtaret më të pëlqyera të rrokut, e njohur për praninë e saj në skenë dhe një varg hitesh, duke përfshirë The Best, Proud Mary, Private Dancer dhe What’s Love Got To Do With It.
Por çfarë ndante Turner me fansat e saj dy muaj para se të ndërronte jetë?
83-vjeçarja ka bërë një postim të trishtë në “Instagram”, ku foli për problemet e saj shëndetësore.
Në Ditën Ndërkombëtare të Veshkave, më 9 Mars, Turner zbuloi se e vuri veten në ‘rrezik të madh’ duke mos e marrë seriozisht diagnozën e saj të hipertensionit të vitit 1978.
“Veshkat e mia janë viktima të faktit që nuk e kuptoja se presioni i lartë i gjakut duhej të ishte trajtuar me mjekësi konvencionale”, shkroi Turner, duke shtuar: “E kam vënë veten në rrezik të madh duke refuzuar të përballem me realitetin që kam nevojë për terapi të përditshme, të përjetshme me medikamente”.
Këngëtarja me famë botërore vdiq të mërkurën në shtëpinë e saj në Zvicër, pas një sëmundjeje të paspecifikuar. Mbetet e paqartë nëse veshkat e saj kontribuuan drejtpërdrejt në vdekjen e saj.
“Për një kohë të gjatë besova se trupi im ishte një bastion i paprekshëm dhe i pathyeshëm”, shkruante ndër të tjera në postimin e saj të muajit mars.
Ndërkohë në një intervistë rrëqethëse me “The Guardian” nga prilli, Turner zbuloi se nuk kishte frikë nga vdekja.
Ndërsa e pyetur se si do dëshironte që të kujtohej, ylli i muzikës përgjigjej:
“Si Mbretëresha e Rock ‘n’ Roll-it. Si një grua që u tregoi grave të tjera se është në rregull të përpiqen për sukses sipas kushteve të tyre”.
Dy anëtarë të ABBA kanë këmbëngulur që ikonat suedeze të popit nuk do të performojnë në festivalin e ardhshëm të Eurovision.
Në një intervistë për t’u transmetuar në Britani të enjten, Björn Ulvaeus dhe Benny Andersson, e përjashtuan mundësinë që të performonin në finalen e festivalit, pavarësisht se Suedia do të organizojë Eurovision-in në vitin që përkon me 50-vjetorin e fitores së ABBA në Eurovision me këngën e famshme “Waterloo”.
Kombi nordik do të organizojë festivalin pasi këngëtarja suedeze Loreen fitoi konkursin e këtij viti.
“Unë nuk dua,” tha Benny Andersson. “Dhe nëse nuk dua unë, as të tjerët nuk duan. Është e njëjta gjë për të katërt ne. Nëse dikush thotë jo – është jo.”
Ulvaeus shtoi: “Ne mund të festojmë 50-vjetorin pa qenë ne në skenë.”
Grupi ABBA – që përbëhet edhe nga Agnetha Faltskog dhe Anni-Frid Lyngstad – fitoi famë ndërkombëtare pas suksesit të tyre në Eurovision në 1974.
Hite të tjera globale përfshijnë “Dancing Queen”, “Super Trouper”, “Money, Money, Money” dhe “Knowing Me, Knowing You”.
Programi “Kosova, shtet i xhudos” po realizohet me plot rezultate dhe punë konkrete. Përveç komponentës, “Xhudo në shkolla – xhudistët e rinj”, që ka për qëllim të zhvillojë masovizimin dhe integrimin e dispilinës së xhudos në të gjitha shkollat dhe komunat e Kosovës, çertifikimit të trajnerëve, xhudistët elitarë tash janë zyrtarisht pjesë e FSK-së.
Demonstrimin e parë si pjesë e FSK-së e realizuan në ceremoninë e fillimit të ushtrimit më të madh ndërkombëtar ushtarak, “Defender Europe ’23” që u mbajt në Prishtinë./ KultPlus.com
Diva amerikane Tina Turner u shua dje në Zvicër dhe bashkë me të edhe një pjesë e adoleshencës dhe rinisë sonë. Brezi i sotëm s’ka se si ta kuptojë që kur vdes një këngëtar i madh, për brezin tonë është një lajm që nuk kalon aq lehtë. Bashkë me këtë humbje, për brezin tonë ka vdekur diçka edhe nga jeta jonë.
Brezi i sotëm nuk e kupton këtë lidhje për një arsye shumë të thjeshtë: Aso kohe ishte e ndaluar ta dëgjoje Tina Turner dhe këdo që në skenat dhe stadiumet e botës çonte në këmbë një rini të tërë, por ne në Shqipëri na ndrydhnin duke na e ndaluar me arsyetimin se ajo muzikë ishte e degjeneruar.
Por, nga ato pak gjëra që i kuptonim qartë në atë kohë ishte se këta këngëtarë jo vetëm nuk ishin si na thoshin, por duke i ndjekur me ato mundësi që kishim, na i jepnin jetës sonë grimca lumturie. Më kujtohet si tani që në vitin 1986 e dëgjonim fshehurazi këngën e sapo dalë të Tina Turner “We don’t need another hero” teksa nga Tirana drejt Voskopojës si klasë bëmë gati një udhëtim biblik.
Nuk e di ku ndodhet sot shoku i klasës Mond Çomo, por i lindur në New York si fëmijë i prindërve diplomatë në OKB, bisedat me të për amerikanët e muzikës kapërcenin çdo lloj kënaqësie tjetër të asaj moshe. E dëgjonim fshehurazi këngën “Steamy windows”, “Private dancer” e shumë të tjera për të ardhur te kryekënga “The best” që në refren Tina e madhe e këndonte “Simply the best”, ndërkohë që radioja ime “Adriatik” ishte kthyer në një qendër zeri në miniaturë në oraret 12.55, 13.40 dhe 16.00 me hit parade te RAI UNO.
Ishte fat që pas disa vitesh ai dreq regjim u rrëzua dhe nuk ishim më të ndaluar ta dëgjonim Tinën dhe të gjithë plejadën e saj. Ishim me fat që Tina e vijoi karrierën me po atë nivel dhe në 1997 ajo nxori nga repertori i saj kryeveprën e kryeveprave të saj në një bashkëpunim me Eros Ramazzotin me këngën “Cose della vita”. Një duet të cilin fjalët e veta Eros i këndoi në italisht dhe Tina në anglisht, një gjë shumë e rrallë që një këngë të këndohet njëkohësisht në dy gjuhë.
Prandaj, me vdekjen e Tina Turner për ne nuk vdiq vetëm një këngëtare. Ajo është tashmë pjesë e atij kostelacioni yjesh që nuk jetojnë më që nga Michael Jackson, Whitney Houston, Leonard Cohen, Freddie Mercury, Laura Branigan. Dhe në këtë kostelacion Tina ishte simply the best. Dëgjojeni këtë këngë, veçanërisht ju të brezit të ri. Mund të na e merrni në çdo gjë, por në muzikë kurrën e kurrës. Jemi me fat që jemi rritur me këta galaktikë. Sepse jemi rritur me “Simply the best”. / KultPlus.com
Kur përmendim rëndësinë dhe madhështinë e letërsisë shqipe, pavarësisht kohës apo rrethanave, Naim Frashëri mbetet gjithmonë një nga figurat qendrore dhe më të rëndësishme të saj, shkruan KultPlus.
25 maji i vitit 1846 shënon ditën kur skenës sonë letrare i shtohet një nga emrat më të mëdhenj të saj. Emër ky që vazhdon të jetë i përmendur në secilin tekst shkollor, librat e të cilit ndodhen në çdo bibliotekë të vendit dhe shkrimet e tij lexohen nga secila gjeneratë.
“Fillimisht edukator i popullit, pastaj poet”, kështu shprehet studiuesi Eqrem Qabej për Naim Frashërin.
Kjo jo vetëm për shkak të veprimtarisë së tij të përpilimit të teksteve shkollore por për arsye se pothuajse në secilin krijim të tij, ai jep mesazhe mbi të mirën, të dobishmen e të moralshmen dhe ka qëllim kryesor edukimin e brezave të rinjë.
Nga krijimtaria e tij, ja vlen të përmenden disa nga krijimet e tij si: “Bagëti e bujqësi”, e cila paraqet një nga kryeveprat e romantizmit shqiptar, një poemë me karakter kryesisht himnizues mbi Shqipërinë dhe shqiptarët.
“Lulet e verës” është një tjetër vepër tejet e rëndësishme e cila paraqet një nga përmbledhjet më të bukura me poezi. Poezitë janë të tematikave të ndryshme, ku përfshihet tema atdhetare, tema filozofike dhe ajo e dashurisë. Kjo e fundit dallohet sidomos në ciklin “Bukurija”, ku edhe e shohim më së miri Naimin si poet dhe njëkohësisht dalin në pah pikëpamjet e tij rreth panteizmit.
“Istori e Skënderbeut” paraqet tenativën e poetit për të krijuar një ep kombëtar. Për krijimin e kësaj vepre mbështetet në veprën e Marin Barletit dhe aty trajton jetën e heroit tonë kombëtar.
Për portretin letrar të Naim Frashërit ka kaq shumë për të thënë. Ai mbetet një nga përkthyesit, intelektualët dhe shkrimtarët të cilin historia e letërsisë shqipe nuk do t’i harroj kurrë.
Ndoshta vetë Naim Frashëri me veprën e tij, është prova se pavdekshmëria ekziston. Kjo pasi ky poet, me krijimtarinë e tij jeton në kujtesën e çdo lexuesi shqiptar dhe jo vetëm, të secilit brez dhe ndihmon në ndërtimin e vetëdijes kombëtare, gjetjen e identitetit kombëtare dhe atdhedashurinë. / KultPlus.com
Iniciativa për heqjen e emrit të Heroit Kombëtar Hasan Prishtina nga Universiteti i Prishtinës ka nxitu reagime të ashpra nga student të po këtij Universiteti, që nga publikimi i kësaj iniciative, studentet nuk po gjejnë qetësi, ata kanë organizuar një peticion me anë të cilit po kërkojnë që të mos hiqet emri “Hasan Prishtina” nga Universiteti i Prishtinës e po ashtu po kërkojnë edhe shkarkimin e Rektorit Qerim Qerimi.
Mbështetje të fuqishme organizimit të studenteve iu është dhënë nga Fondacioni “Hasan Prishtina”, nuk kanë munguar as reagimet e personaliteteve të ndryshme si nga jeta akademike, shkrimtarëve, historianëve, opinionistëve, politikanëve si dhe shumë kategorive të tjera nga jeta publike nga të gjitha trojet shqiptare dhe nga mërgata.
Se fundi studentët e Universitetit të Prishtinës, me sloganin “MOS MA PREK HASAN PRISHTINËN” kanë vendosur mbishkrime në muret dhe rrugët e kampusit të Universitetit të Prishtinës “Hasan Prishtina” si shenjë kundërshtimi ndaj propozimit për heqjen e emrit “Hasan Prishtina” nga Universiteti i Prishtinës. Kundërshtime të ashpra ndaj nismës për heqjen e emrit kanë ardhur edhe nga Fondacioni “Hasan Prishtina” të cilët kanë paralajmëruar se do të përdorin të gjitha mjetet ligjore dhe demokratike për ta penguar këtë nisme dashakeqëse.
Në përfundim të peticionit, Fondacioni “Hasan Prishtina” së bashku me studentë e UP-së kanë organizuar mbrëmje argëtuese për studentët, kjo mbrëmje do të mbahet në Qendrën e Studentëve këtë të enjte me 25.05.2023, organizatorët kanë paralajmëruar se për argëtimin e studenteve do të kujdeset Ganja & ProBand, me ç’rast do të ketë pije falas dhe befasi të tjera. Aksionin e tyre kundër ndryshimit të emrit të Universitetit të Prishtinës “Hasan Prishtina “, studentet e kurorëzojnë me një mbrëmje argëtuese. / Express / KultPlus.com
Ura e Kushovës ka përfunduar dhe është e aksesueshme edhe nga automjetet. Kjo urë është një prej shumë investimeve të kryera në Gramsh, që përveçse u shërben banorëve të zonës, shkurton edhe distancën për shumë turistë që duan të vizitojnë Ujëvarën e Sotirës.
Ndërtimi i kësaj ure është i një rëndësie të madhe pasi lehtëson maksimalisht jetesën në këtë zonë.
Fshati Kushovë i Gramshit njihet edhe për fushat e mbjella me livando, një bimë aromatike, e cila gjen përdorim të gjerë në industrinë kozmetike.
Lehtësitë do të krijohen kryesisht për banorët e zonës dhe biznesin e tyre, por edhe për ata që do të duan të vizitojnë natyrën e bukur të Kushovës.
Ndërkohë, investimi i kryer në Kushovë, shkurton distancën me ujëvarën e famshme të Sotirës, e cila buron nga mali i Tomorit dhe rreth 22 kilometra larg Gramshit.
Në verilindje të Tomorit, ndodhet burimi i madh që vjen nga një e çarë gjatësore në shkëmbin gëlqeror të thepisur. Lartësia e rënies së ujit varion nga 5 m, deri 20 m lartësi. Peisazhi i shpatit ku uji del, në mes të pyjeve e pemëve të lisit, është i mrekullueshëm. Zhurma e ujit mund të dëgjohet shumë larg.
Bota bimore rreth ujëvarës është tepër e pasur, me pemë bliri, lofate, frashëri, lisi e deri edhe te gështenja e egër që është e rrallë në gjendje të egër. / atsh / KultPlus.com
Kushtrim Gara, udhëheqës i Njësisë së Komisionit Qeveritar për Persona të Zhdukur thotë se lokacionet ku dyshohet se ka varreza masive në territorin e Serbisë, mbeten sfiduese për t’u arritur.
Gara thotë se grupet punuese të formuara në dialogun e viteve 2003-04 vazhdojnë të mbeten aktive, mirëpo nuk po ka aq përgjigje konkrete në raport me kërkesat e palës kosovare.
“Në kuptim të komunikimit, ju e dini nga 2004 funksionon një grup punues si mekanizëm dialogues mes Kosovës dhe Serbisë, i formuar në atë kohë si rezultat i dialogut për çështje praktike, apo dialogut të Vjenës, pra po flas për dialogun 2003 e 2004. Edhe tani ky grup punues është funksional në kuptim të takimeve, komunikimit, këmbimit të informatave, edhe pse nuk ka takim të nivelit në kuptim të grupit sepse Serbia nuk ka reflektu ende në kërkesën e Qeverisë së Kosovës për të bërë një zëvendësim te udhëheqësi i grupit apo delegacioni i tyre, megjithatë në kuptim të ekipeve profesionale, nëngrupeve punuese, ekipe analitike, vazhdojnë takimet e rregullta. Por gjithmonë ka pasë kërkesë nga familjet që të shkohet përtej atyre takimeve. Pra në raport me kërkesat e vazhdueshme të palës tonë, të kemi përgjigje pak më konkrete të palës serbe, po aludoj në përgjigje që mund të vijnë bazuar në informatat e arkivave të tyre”, ka thënë Gara.
Gara thotë se marrëveshja e fundit me Serbinë, jep shpresë se mund të sigurohen më shumë informata nga arkivat e Serbisë.
“Prandaj ka qenë kërkesë e vazhdueshme e familjeve që përkundër ekzistimit të këtyre mekanizmave, takimeve të shumta, çështja e personave të zhdukur të bartet si prioritet në takimet e Brukselit. Është një nga çështjet që është trajtu edhe në takimet e fundit, edhe nga Marrëveshja e Ohrit dhe Brukselit. Në qoftë se ka çështje që klasifikohet apo trajtohet si çështje me prioritet të veçantë pa dyshim është çështja e personave të zhdukur. Prandaj edhe këto zhvillimet e fundit janë shpresë për familjet, në mënyrë të veçantë kjo mundësia për të siguru më shumë informata nga arkivat e institucioneve të Serbisë…Nga kjo përvojë sigurisht që në arkivat e institucioneve të Serbisë vazhdojnë të jenë informata mbi bazën e të cilave ne do të mund të siguronim ose të kenim më shumë progres në këtë proces”, ka deklaruar Gara në Tëvë 1. / KultPlus.com
Kryeministri Edi Rama ka ftuar në episodin e tij të radhës në Podcast,”FLASIM”, këngëtaren Elhaida Danin.
Rama ka ndarë në facebook momente nga biseda me këngëtaren Dani lidhur me ardhjen për herë të parë në Shqipëri të spektaklit më të shikuar në Evropë, “Notre-Dame de Paris”, me muzikën e Riccardo Cocciante dhe spektaklin e Luc Plamondon.
“Me Elhaida Danin, yllin shqiptar që mahniti italianët e ne bashkë, kur fitoi Voice of Italy, e cila është e ftuara e Podkastit FLASIM me rastin e ardhjes në Shqipëri për të sjellë në skenë Esmeraldën e NOTRE-DAME DE PARIS më 28 Maj në Air Albania Stadium”, shprehet Rama.
Kryeministri thekson se “pas shumë, e shumë, e shumë herësh, ëndërruar dhe të tentuar vjen në Shqipëri Notre-Dame De Paris” në Tiranë .
Këngëtarja Dani shprehet se “është diçka që më bën krenare sepse e meriton ky vend. Është 360 gradë një histori dashurie, hakmarrje, lirie. Kërkon liri. Populli do të dashurohet në mënyrë të jashtëzakonshme sepse të ndryshon jetën”.
Elhaida Dani, e cila është në një nga rolet kryesore në këtë shfaqje, apelon që ky spektakël nuk duhet humbur për asnjë arsye në botë. / atsh / KultPlus.com
Ajo që ka mbetur pas nga Frojdi, i cili ishte baba i filizofisë janë studimet e tij në këtë fushë shkencore, veprat si dhe thëniet e famshme.
Frojdi doli i pari me idenë se mendja është e ndarë në tri pjesë: Id, Ego dhe Superego.
Sipas Frojdit, Uni ose Ego është vija e parë e mbrojtjes së vetes nga tjetri, duke u përpjekur të balancojë dy ekstremet, Id dhe Superego.
Idetë e tij radikale mbi mendjen e njeriut transformuan psikologjinë dhe mbeten kontradiktore edhe në ditët e sotme.
KultPlus ju sjell thënie nga Sigmund Frojdi:
Qytetërimi zuri fill kur një person i zemëruar hodhi fjalën në vend të gurit.
Sa i guximshëm bëhet njeriu, kur është i sigurtë se e duan.
Një qytetërim që lë një numër kaq të madh të pjesëtarëve të tij të pakënaqur dhe i çon ata në revoltë nuk e ka merituar dhe nuk e meriton të ekzistojë.
Njeriu nuk ia arrin t’i eleminojë komplekset e tij, por pajtohet me to: ato ligjërisht e drejtojnë veprimtarinë dhe sjelljen e tij në botë.
Të jesh tërësisht i ndershëm me veten është një ushtrim i mirë.
Fëmijët janë krejtësisht egoistë; ata i ndiejnë nevojat e tyre intensivisht dhe përpiqen mizorisht që t’i kënaqin.
Ëndrrat janë shpesh më të thella kur ato duken më të çmendura.
Nëse dikush ka qenë i përkëdheluri i padiskutueshëm i nënës së tij ai ushqen gjatë jetës një ndjenjë triumfuese, besimin në sukses, i cili jo rrallë sjell me vete suksesin.
Iluzionet na mbisundojnë ne, sepse ato na kursejnë në dhimbje dhe na lejojnë të shijojmë kënaqësinë në vend të saj. Prandaj ato duhet t’i pranojmë pa ankime kur ato nganjëherë përplasen me realitetin përballë të cilit shndërrohen në thërrime.
Njerëzit janë më moralë se sa mendojnë dhe shumë më tepër imoralë se sa përfytyrojnë.
Sa kemi përparuar. Në Mesjetë do të më kishin djegur në turrën e druve. Tani ata mjaftohen të djegin librat e mi.
Kur njerëzit më kritikojnë, unë e di se si të mbroj veten. Por unë jam i pafuqishëm përballë lëvdatave.
Një pjesë e madhe e asaj që është e vërtetë brenda nesh nuk kuptohet; dhe ajo që kuptohet, nuk është e vërtetë. / KultPlus.com
E ka parë kush Aurorën, motërzën time, vallë? Ajo është nusja ime, ndaj atë dua ta kem prapë. Ne po kërcenin bashkë. Pastaj erdhi murlani Dhe ma mori të ngratit. E pra unë e di se ç’pati: Ajo është e bukur tejet, Dhe gjithë prej ajri! Shtatin kaq latuar e flatrat kaq praruar Dhe në skaje flatrat sipër Plot me lajlelulexhingëlamingël! “”
Seç ia behu Aurora mu tek unë flakërimë, Qull e lagur, krahët thyer, e pafrymë. “Oh Zot!” thirri ngjethshëm, me ankth e drojë, “Ç’kohë janë, vallë, këto që ne jetojmë! Vetëm hidhërim dhe pikëllim miliona herë, Dhe frikë, dhe zemërim dhe vuajtje paprerë! Papritur në çast: Rashë në lum sakaq. Dhe po të mos ishte mrekullia vetë Pra, më s’do kishe dëgjuar për mua në kët jetë; Dhe unë nuk do të isha ulur më atje. – Çfarë mendoni se ka ndodhur, de?
Dy njerëzushë shumë të bukur pak të bardhë, sa unë kurrë nuk kam parë të tillë kaq të bardhë, U ngjitën deri në lum me mamanë e tyre krah për krahu bashkë.
Unë nuk e di si quheshin dhe kush ishin vallë. Në kokë në vend të flokëve ata kishin ar, Dhe gojë të vogël! – Gojë të vogël! Të thashë ty! Për gjiri! Dhe në sytë e tyre ata manushaqe kishin. – Papritmas, gruaja e bukur mua m’u vërvit zëçjerrë: “Ah, pa shihni atje në ujë,” bërtiti ajo, “kafsha e mjerë! Si përpëlitet dhe përplaset nëpër shtjellë Dhe me brirëthit lutet e kërkon ndihmesë! ”
Dhe djemtë e mirë kishin një fletë në duar E me të katra për tek unë u çapëluan Gati me një frymë. Ata mua më shtynë Dhe në breg me butësi edhe kujdes më nxorrën mua.”
“Dhe të ndriçoi ideja T’i falënderosh nga zemra?”
“Oh, nuk arrita dot ta shqiptoj falenderimin, do pranuar hapur: Në frikë dhe përshtjellim e pashë veten të kapur! ”
” E pra, kjo shihet qartë me sy! – Uluni për pak çaste Tek këto manushaqe Dhe thani kockat mirëfilli Nën këto rreze dielli. Më pas fluturojmë për në shtëpinë e njerëzve Dhe iu trokasim shpëtimtarëve të jetës tënde. Ty të pëlqen në gojët e tyre të vogla të shuash etjen. Por kryesorja, ata sytë e saj të manushaqtë I puth unë tashmë vetë, njëzet e katër herë pa ndarë. Ajo e ka merituar atë. Mos jini ziliqarë! “./KultPlus.com
