Mbrëmjen e së shtunës, në Gjonaj të Hasit, me ndarjen e çmimeve për ruajtësit me fanatikë të folklorit burimor, u mbyll edicioni i 29 i festivalit “Hasi jehon”.

I nisur në vitin e largët 1975, si festival i shoqërive kulturo artistike të Rajonit të Hasit dhe i quajtur dasma hasjane, sot festivali “Hasi jehon” është shndërruar në dasmë gjithëshqiptare. Këtë e dëshmon pjesëmarrja e organizmave kulturorë nga e gjithë gjeografia shqiptare dhe këtë e dëshmon edhe fituesi i edicionit të 29.

Juria në përbërje Sami Piraj, Dilaver Kryeziu, Hisen Dida dhe Shaqir Hasi, çmimin “Malësori” për programin më burimor ia ndau Ansamblit “Mati” nga Bureli i Shqipërisë.

Çmimi “Malësorja iu nda ShKA “Fushë Kosova” nga Fushë Kosova, ndërsa çmimi “Lahuta” iu nda Ansambli autokton “Rugova” nga Rugova. Çmimi Nazmije Hoxha: Vlora Duraku nga Krusha e Madhe.

Përpara ndarjes së shpërblimeve, në përmbyllje, drejtori i festivalit “Hasi jehon” Haziz Hodaj tha se vitin e ardhshëm mbahet edicioni i 30, prandaj do të ketë angazhim të shtuar që ky përvjetor të shënohet me një organizim shumë më të mirë. “ Ju premtoj se edhe vitin e ardhshëm do të mbahet festivali që ta rrumbullakojmë në mënyrë sa më madhështore 30 vjetorin e këtij festivali, që është njëri ndër festivalet më te vjetra jo vetëm në Kosovë. Në emër të jurisë Sami Piraj tha se “festivali Hasi jehon ka arritur ti krijojë konturat e një manifestimi jashtëzakonisht të rëndësishëm të ruajtjes dhe kultivimit të vlerave të trashëgimisë të cilat janë bartur brez pas brezi si identitet kombëtarë”. Ai tha se juria nuk e kishte të lehtë por shtoi se vendimet i kanë peshuar me elementet e trashëgimisë.

Përveç tri çmimeve kryesore juria ndau edhe këto çmime:

Instrumentisti më i dalluar : Baki Xhaferi nga ShKA “Anadrinia” nga Dejni i Rahovecit
Orkestri më i mirë : Ansambli “Mati” nga Burreli
Grupi i rapsodëve: Grupi polifonik nga Gjirokastra
Rapsodi më i dalluar: Selajdin Miftari
Rituali më objektiv: Ansambli “Romaja”
Kostumet me autoktone : Ansambli “Romaja”
Loja popullore : Ansambli “Rapsha” nga Tuzi
Koreografia më e dalluar: “Shqiponja” nga Shkupi
Treshja më e mirë e valltarëve: Muhamet Sinani, Myzafer Lutfiu, Fejsal Shaqiri nga Ansambli Bresana
Valltarja e dalluar: Shkurte Dauti nga Ansambli “Kruma” nga Shqiperia
Valltari i dalluar: Zekirija Kadriu nga ShKA “Bajram Shabani” nga Kumanova