Teatri “Oda” ka marrë një iniciativë që të gjitha të hollat që do të mblidhen nga biletat e shitura për shfaqjet që do të mbahen gjatë muajit prill, do të dedikohen për shërimin e aktorit Lulzim Rexha, i cili është diagnostifikuar me një formë të rrallë të kancerit, që njihet si “Ewing Sarcoma”.

Më 5 prill do të mbahet premiera e shfaqjes “Fajet i ka Bill Gates”, shfaqje e cila do të jepet edhe me 6 prill.

Më 11 prill do të mbahet shfaqja “Shef Lumturimi” nga Lirak Çelaj, më 15 prill do të mbahet shfaqja “Antigonat” nga Sofokliu dhe më 16 dhe më 23 prill do të mbahet sërish “Shef Lumturimi”.

Ndërsa, më 25 prill do të dhurohet shfaqja “Arbri” me regji dhe tekst nga Lirak Çelaj, kurse më 29 dhe 30 prill do të mbahet shfaqja “Charles III” nga Jeton Nezira me regji të Agon Myftarit.

Për aktorin është hapur edhe një “GoFundMe”, ku të gjithë mund të dhurojnë aq sa kanë mundësi, për të grumbulluar paratë për trajtimin e tij, që është duke e vazhduar në Gjermani. / KultPlus.com