Vjollca Duraku
Foto: Adi Beqiri

Opera “King Lear” e William Shakespeare me kompozim nga Zoe Hippius është dhënë mbrëmë në sallën e Amfiteatrit të Bibliotekës Universitare, në kuadër të Prishtina International Vocal Festival, shkruan KultPlus.

“King Lear” erdh si operë e shkruar në dy akte për solistë dhe orkestër virtuale me elemente të një rrjeti nervor, e cila u jetësua përmes aktrimit dhe këndimit fantastik të solistëve: Ismet Vejseli- tenor, Elonë Sadiku-soprano, Dea Xhemaili- mexosoprano, Elona Alshiqi-soprano, Harris Bajraktari-bariton, Shinasi Ramadani- Rizah Jahaj- tenor, Rigon Begolli-bariton dhe Lurni Krasniqi- aktor.

E tërë ngjarja u zhvillua në errësirë pothuajse të plotë, duke u përshtatur me tonin e errët dhe dëshpërues të vetë tragjedisë së Wiliam Shakespeare, e cila konsiderohet si një ndër veprat më të mëdha të letërsisë të shkruar ndonjëherë.

Opera bazohet në historinë e Mbretit Lir ( britanik), i cili tenton të ndajë mbretërinë dhe pasurinë të tre vajzave të tij, e cila pasohet nga tradhëti, lojëra e komplote për pushtet dhe ambicie personale edhe të djemve të Earl-it të Gloucesterit.

Fytyrat e ngjyrosura të solistëve paraqisnin maskat përmes së cilave individët vendosin për të ardhur deri te pushteti duke fshehur fytyrën e vërtetë. Ndërsa interpretimi me veshje të zakonshme paraqiste një shmangie nga shfaqja klasike duke i dhënë operës elemente moderne. Shfaqja përfundon me vdekjen e disa prej personazheve kryesore.

Pas shfaqjes, në një prononcim për KultPlus, kompozitorja Zoe Hippius tha se është ndarë e kënaqur me performancën e solistëve.

“Jam shumë e lumtur sepse sot ishte premiera ime. Për herë të parë e kam provuar veten si skenariste, dhe kjo gjë sonte më pëlqeu shumë. Dëshiroj që të vazhdoj më tutje. Të gjithë këngëtarët ishin të mrekullueshëm. Edhe stafi më kanë ndihmuar shumë. Jam habitur se si për një kohë të shkurtër janë përgatitur, janë koncentruar dhe e kanë përcjellë tërë pasionin e tyre te publiku. Niveli i këndimit dhe aktrimi ishte i lartë”, ka thënë kompozitorja Hippius, duke shpresuar që ta pëlqejë edhe publiku.

“Kemi përdorur orkestër elektronike. Kënga e parë edhe e fundit kanë qenë me program kompjuterik, pjesa tjetër është elektronike. Jam inspiruar nga tragjedia e Shekspirit, Mbreti Lir. E gjitha është se si ti mundesh të përceptosh një harmoni të mesjetës që më ka inspiruar mua, që është pjesë e një stili jo shumë të zakonshëm. Uroj që ta pëlqejnë njerëzit”, ka thënë Hippius.

Ndërsa, tenori Ismet Vejseli tha se kjo operë për të ka qenë sfiduese, porse një bashkëpunim i shkëlqyer me kolegët profesionist solli rezultatin e mbrëmjes.

“Është hera e dytë që performoj në muzikë moderne. Është shumë e vështirë edhe vokalisht por edhe muzikalisht. Unë e kam pasur rolin kryesor të King Lir-it. Ka qenë shumë e vështirë ta përgatitësh, mirëpo provat kanë qenë shumë intensive, kemi kaluar shumë mirë me kolegë të cilët janë të gjithë të talentuar, dhe mendoj që rezultatin e patëm shumë të mirë”, ka thënë tenori Vejseli duke shprehur edhe një mesazh për audiencën vendore.

“Audienca duhet ta kuptojnë që muzika moderne dhe kompozitorët e tashëm duhet t’i respektojmë dhe t’i dëgjojmë, jo vetëm kompozitorët e vjetër që i performojmë në të gjitha shtëpitë e operave, sepse dhe muzika moderne i ka vlerat e saj. Muzika historikisht është vlerësuar pas disa vitesh, dhe duhet të jemi të parët që e vlerësojmë këtë operë”.

Kurse, sopranoja Elona Alshiqi e cila është artiste e re ndau përvojën e saj për krijimin e kësaj opere.

“Ka qenë hera e parë që kam marrë pjesë në një operë. Provat për këtë shfaqje i kemi nisur disa ditë më parë. Ka qenë pak e vështirë për ta sjellë këtë shfaqje në këtë skenë të vogël, në këto kushte, por sidoqoftë ja kemi dalë mbanë me anë të Zoe-it, drejtorit Syla dhe në përgjithësi me mbështetjen e gjithë stafit. Sonte përjetuam emocione të paharruara”, ka përfunduar sopranoja Elona Alshiqi.

Koncerti i radhës “Young Generation” i Prishtina International Vocal Festival do të mbahet më 18 tetor, në ora 19:00, në Amfiteatrin e Bibliotekës Universitare/ KultPlus.com