Regjisori Fisnik Maxhuni e ka përfunduar dokumentarin ‘Zvicra’.

Kërkimi për identitetin në Zvicër kësisoj mban vulën e regjisorit Maxhuni.

Dokumentari i cili ka nisur të xhirohet para dy vitesh, asokohe kur dy vëllezër nga Kosova po luanin kundër njëri tjetrit në EURO 2016, duket edhe më aktual sidomos këtyre ditëve duke marrë parasysh lojën Zvicër-Serbi dhe ndëshkimin e FIFA ndaj Xherdan Shaqirit e Granit Xhakës.

“Me anë të këtij dokumentari mësuam se identiteti përbëhet nga shumë elemente, por edhe se identiteti nuk është term përjashtues – nëse je zvicran kjo nuk do të thotë se përjashtohesh nga një identitet tjetër” tregon regjisori Fisnik Maxhuni në rrjetin social Facebook.

Dokumentari do ta ketë premierën këtë verë dhe do të shfaqet më pas në vjeshtë në Radio Television Suisse RTS, shkruan KultPlus.

“Identitetet nuk janë absolute, ato ndryshojnë bashkë me kohën. Unë sot jam krenar ta quaj veten një regjisor zvicran, duke mos harruar kurrë vendin ku linda dhe rrënjët e mia nga Kosova” ka shkruar më pas Maxhuni.

Dokumentari ‘Zvicra’ është me regji nga Maxhuni dhe Benoit Goncerut, të cilët e kanë shkruar edhe skenarin. / KultPlus.com