Gjoba e shqiptuar nga FIFA për futbollistët e Zvicrës me prejardhje nga Kosova Xherdan Shaqiri dhe Granit Xhaka ka mobilizuar shqiptarët, raporton KTV.

Vetëm disa orë pas vendimit të FIFA-s, që konsideron se festimi i golave të fitores ndaj Serbisë me simbolin e shqiponjës është sjellje e pahijshme, u krijuan dy kampanja për të grumbulluar para.

Në përkrahje të futbollistëve, Rilind Reka krijoi kampanjën online për të mbledhur para për të paguar gjobën për futbollistët nga Kosova, por edhe për kapitenin e helvetikëve, Stephan Lichtsteiner, që u dënua me 5 mijë franga.

Për 20 orë, kjo kampanjë ka grumbulluar mbi 20 mijë dollarë.

E nëse Federata e Zvicrës nuk do t’i pranojë paratë e grumbulluara, sipas organizatorëve, ato do të dhurohen për bamirësi.

Paralelisht me këtë, edhe kryeministri i Shqipërisë, Edi Rama, ka marrë një nismë të ngjashme për të mbledhur mjete financiare përmes llogarisë bankare të emërtuar “Mos kini frikë nga Shqiponja”.

Rama e quan absurde gjobën e FIFA-s ndaj Xhakës dhe Shaqirit. Golave të futbollistëve të Zvicrës iu është gëzuar edhe kryeministri Ramush Haradinaj. Por ai nuk i ka komentuar fare nismat për të grumbulluar para.

Ndërkaq, ministri i qeverisë Haradinaj, Bajram Hasani, ka ndarë pagën e tij pa rritje 1163 euro për gjobën e futbollistëve. Gjoba prej 25 mijë frangave, e shqiptuar nga FIFA për tre lojtarët e skuadrës zvicerane, eksperti kosovar i referimit Ismajl Kasumi i quan të padrejta.