Qendra për Zhvillimin e Artit (Q’art) filloi edicionin e 4-të të Guerilla Art Festival (GAF), me qëllim pasurimin e hapësirave publike me vepra artistike – murale – si dhe ndikim pozitiv në turizmin kulturor, shkruan KultPlus.

Diçka që filloi si studim në vitin 2014, GAF sot nis vitin e katër të të trajtimit të zonave publike me vepra arti si një reagim ndaj degradimit urban të qyteteve në Kosovë. Në kuadër të këtij edicioni, hapësirat e përzgjedhura së bashku me komunitetin po trajtohen nga artistë të njohur ndërkombëtar që kanë fituar disa shpërblime me renome në fushën e artit. GAF çdo vitë po arrin ta pasurojë qytetin me vepra artistike si dhe të stimulojë një zhvillim inovativ në sektorin e kultures dhe industrisë kreative.

Lokacionet e përzgjedhura përfshijnë objektet: Filharmonia e Kosovës me artistin Holandez Simian Switch, Qendra e Studentëve me artistin Indonesian Wild Drawing dhe një banesë kolektive në lokalitetin Ulpiana për tu punuar nga artisti Zviceran CRBZ.
Qendra për Zhvillimin e Artit-Q’art gjithashtu organizon edhe festivalin ndërkombëtar Meeting of Styles Kosova.

Këtë edicion përkrahës kryesor i GAF është projekti i BE-së “Culture4Change” pastaj ambasada holandeze dhe zyra zvicerane për bashkëpunim./ KultPlus.com