Në Qendrën Kulturore “Lasgush Poradeci”, është hapur ekspozita shqiptaro-rumune me vepra të realizuara nga artistët e arteve figurativë, Gentian Zeka, Ion Murariu, Aleksander Acasandrei, Nicolae Ionescu.

Sipas organizatorëve, kjo ekspozitë vjen si promovim i përbashkët i vlerave kulturore mes Pogradecit dhe Rumanisë nisur nga fakti se në Rumani ka një komunitet të madh shqiptarësh që jetojnë e punojnë atje.

Ekspozita ishte e veçantë sepse janë të gjitha punime të dhuruara nga autorët tek miqtë e tyre në Shqipëri dhe që tashmë i kanë nxjerrë nga shtëpitë për t’i shfaqur në këtë ekspozitë.

Prof. Doktor Luan Topçiu thotë se synohet që edhe artistët pogradecarë të ndërkombëtarizohen dhe promovohen sa më shumë, ndërsa Rumania ka një lidhje të veçantë me Pogradecin pasi edhe korifejtë si Lasgushi dhe Kuteli kanë jetuar dhe studiuar atje.

Për pedagogun Neli Naço, ekspozita është e veçantë në llojin e saj pasi piktorët e njohur rumunë por edhe ai pogradecar Gentian Zeka e sjellin imazhin jo vetëm në një formë moderne por edhe ekspresive.

Marius Chelaru, studiues, shkrimtar shprehet se aktivitete të tilla forcojnë edhe më shumë marrëdhëniet mes dy vendeve, ashtu sikurse së shpejti autorët shqiptarë do të ekspozojnë punimet e tyre në Rumani. /atsh /KultPlus.com