Shqipëria me natyrën e bukur, plazhet mahnitëse dhe monumentet e kulturës po tërheq gjithnjë e më shumë vëmendjen e turistëve të huaj.

Turizmi i aventurës, bregdeti dhe çmimet e lira, janë disa ndër arsyet që kanë bërë për vete turistët e huaj nga vendet e Europës, por jo vetëm.

Përveç natyrës, edhe eventet kulturore po tërheqin turistë. Festival i ri, ndryshe nga herët e tjera, kur organizime të tilla janë bërë në rivierën shqiptare, këtë herë do të bëhet në plazhin e Shëngjinit.

Prej 31 majit – 3 qershor 2019, në bregun shqiptar do të zhvillohet një festival i ri i muzikës elektronike në natyrë “UNUM”.

Ministri i Turizmit dhe Mjedisit, Blendi Klosi, mbi këtë event shprehet se ”bukuria e peizazhit natyror, mikpritja dhe tradita shqiptare tashmë krijojnë skena ideale për festivalet më të famshme të muzikës elektronike. Mbi 10 mijë admirues europianë të kësaj muzike pritet të vijnë në festivalin “Unum”, nga 31 maji deri në 3 qershor, te Rana e Hedhun”, shkruan atsh, përcjell albinfo.ch.

”Në hartën e eventeve të huaja shtohet kështu edhe Shëngjini, që ka një mundësi të artë për t’u promovuar ndërkombëtarisht nëpërmjet muzikës dhe DJ-ve më të njohur në skenat botërore”, shprehet Klosi.

Publiku do të shijojë çdo gjë në këtë festival, ku të gjitha janë të vendosura në një sfond malor, hapësirë ideale për të dëgjuar shumë artistë të njohur nga e gjithë bota, si Craig Richards, Ricardo Villalobos, Luciano, Neverdogs, Cesar Merveille, Butch, Petre Inspirescu, Praslea, Sonja Moonear DeWalta etj.

Festivali UNUM organizohet në bashkëpunim me Ministrinë e Turizmit dhe Mjedisit.

Për banorët e hemisferës veriore sonte fillon stina e pranverës. Ajo fillon në orën 22 e 56 minuta.

Në të njëjtën kohë për banorët e hemisferës jugore nis vjeshta.

Në ditën e pranverës Dielli në Prishtinë agon në orën 05.37, ndërsa perëndon në 17.49. Dita do të zgjasë 12 orë e 12 minuta, ndërsa nata 11 orë e 48 minuta.

Llogaritja pranverore e kohës do të nisë natën midis 30 e 31 marsit, kur treguesit e orës duhet të tërhiqen një orë përpara.

Nard Polia, 35-vjeçari nga Thethi që u vra sot në Grudë të Shkodrës ishte i njohur jo vetëm në zonën e tij, por edhe jashtë Shqipërisë, nga të gjithë ata turistë që kishin zgjedhur ndër vite të vizitonin bujtinën e tij “Polia” e hapur në vitin 2005.

Përmes faqes në Facebook “Thethi National Park” ai reklamonte bukuritë natyrore të kësaj zone të mrekullueshme, ndërsa ndër vite s’ka nguruar të ngrejë zërin për problemet që e shqetësonin, që nga mungesa e infrastrukturës rrugore deri tek bllokimi i rrugëve të Thethit në dimër.

Polia është bërë shpesh pjesë e kronikave televizive në vend, ku denonconte mos ndërhyrjen e shtetit për t’ju ardhur në ndihmë. Me dëshirën e madhe dhe ëndrrën që Thethi do popullohet sërish, në një intervistë për mediat e huaja, ai rrëfen jetën e tij.

Djali i fortë e me muskuj, i kalitur për të përballuar jetën në mal shfaqet mbi makinën e tij Fuoristradë me goma të larta. Me këtë makinë ku sot i morën jetën, ai është bërë shpëtimtar i shumë turistëve që ngecnin mes botës.

Pikërisht mbi makinën e tij ai nis të rrëfejë kthimin në Thethin e dashur dhe pasionin e madh për ta zhvilluar këtë zonë.

“Unë kam lindur në Theth, jetesa këtu ka qenë shumë e vështirë, jena rrit shumë të varfër. Erdhi një kohë pas demokracisë në Shqipëri që Thethi u la pas dore, sepse njerëzit, banorët ikën. Këtu nuk kishte absolutisht të ardhura”,- thoshte ai.

“E kujtoj si sot kur kam ikur në vitin 1999 bashkë me familjen time në Shkodër. Ishte shumë e vështirë të jetoje këtu. Të gjithë shokët e mi me familjet kanë ikur ose në Shkodër ose jashtë shtetit. Mbaj mend që në 2005 jam kthyer përsëri në Theth kishte 5 familje nga 250 që ishin në 1995”,- thoshte Polia në rrëfimin e tij.

Por ndërsa vitet kanë kaluar, Polia shprehte gëzimin që Thethi aq i dashur për të kishte filluar të kthehej në një atraksion turistik.

“Thethi sot është bërë një atraksion shumë i bukur në Shqipëri dhe shumë i preferuar për turistët në Shqipëri dhe jashtë saj. Është natyra më e virgjër, ndër parqet kombëtare më të rëndësishme është edhe zonë e mbrojtur. Kemi fatin se këtu gjithçka ka mbetur si më përpara. Do mundohemi ta ruajmë sa më autentik Thethin, me bukurinë, kulturën, traditën dhe historinë e tij”,- thoshte Polia.

Nëse pasditen e sotme s’do t’i kishin bërë atentat, Polia do ta zhvillonte edhe më tej bujtinën e tij. Emri i Thethit do dëgjohej më shumë nëpër botë, për kulturën, bukurinë dhe traditën e ruajtur ashtu siç kish ëndërruar që ditën kur ai u kthyer në vendlindje!

(m.a/BalkanWeb)/ KultPlus.com

Sanije Hyseni ishte vajza që do ta mbante stafetën që do t`ia dorëzonte Josip Broz Titos, në vitin 1979.

Shqiptarja asokohe u zgjodh në këtë pozitë si një nxënëse e suksesshme.

Stafeta e Rinisë ka qenë ritual i mbajtur në Jugosllavi që nga viti 1945 e deri në vitin 1988. Ngjarja zakonisht e festonte Titon si figurë markante të Jugosllavisë, udhëtonte nëpër qytetet kryesore, niste nga vendlindja e Titos në Kumrovec të Kroacisë dhe përfundonte në Beograd, me 25 maj, në ditëlindjen e Titos.

Dhe personi i fundit që e merrtë stafetën, ia dorëzonte atë Titos.

Në vitin 1971, këtë e bëri Nazmi Jenje ndërsa në vitin 1979 Sanije Hyseni, që të dy nga Prishtina.

Dhe Sanija kujtohet sepse ajo ishte e fundit që ia dha stafetën Titos, pasi ai ndërroi jetë një vit më pas. Ajo e pati edhe një fjalim rrënqethës që u ndoq nga mijëra njerëz.

Sanija, në vitet 90-të u largua për në Kanada. / KultPlus.com

Në Rusinë e lashtë, Princi Igor dhe Princesha Oga, ishin një shembull i një çifti të fuqishëm – Igori i quajtur “I mençuri” ishte djali i Ryuk, themeluesi i Rusisë, dhe Olga ishte e njohur në të gjithë mbretërinë si “E bukura Olga”. Ai nënshtroi fiset e Uglich, Drevlian dhe Pechen. Udhëhoqi dy fushata kundër Bizantit në 941 dhe 944, dhe rrethoi Kostandinopojën.

Lufta e pasuksesshme me Bizantin përfundoi me një marrëveshje tregtare të vitit 944. Procesi i feudalizmit u përshpejtua në kohën e tij në Kijevin e Rusisë, por pati edhe revolta të vazhdueshme për shkak të taksave të larta Rebelimi u udhëhoq nga fisi Drevlian. Në ballafaqim me ta, Igori u kap dhe u vra në vitin 945. Olga u shkatërrua. Trishtimi i saj ishte aq i madh saqë sa herë që dikush i propozonte të martohej përsëri, përfundonte i vdekur, transmeton Reporteri.net

Ajo nuk ishte e vetme, me Igorin kishte një djalë trevjeçar, Svjatoslav.

Ndërsa gjaku i Igorit ishte ende i freskët në duart e tyre, Drevlianët i dërguan një mesazh Olgës në të cilin shkruanin se Igori ishte si një ujk që shkatërronte gjithçka para tij, por se ajo konsiderohej e mirë dhe se më së miri do të ishte të martohej me princin e tyre Mala. Kështu ata u përpoqën të luanin rolin e Cupidit me qëllim të fitimit të kontrollit mbi të gjithë mbretërinë. Olga, megjithatë, kishte plane të tjera me njerëzit që i sugjeronin martesë.

Ajo u tha atyre se oferta martesore ishte pikërisht ajo që dëshironte dhe për të treguar respekt për popullin e Kievit ajo u tha atyre të hipnin të gjithë në një anije  për t’i parë dhe për t’i përshëndetur. Kur erdhi deri te kjo, njerëzit e saj e fundosën anijen në një hendek dhe i varrosën të gjallë.

Por ky nuk ishte fundi. Hakmarrja e Olgës sapo kishte filluar. Pas kësaj, ajo e dërgoi mesazh te Drevlianët duke shkruar: “Nëse dëshironi me të vërtetë praninë time, më dërgoni njerëzit tuaj më të fuqishëm në përcjellje në mënyrë që tek princi juaj të vijë në mënyrë të përshtatshme”. Pasi morën mesazhin e saj, Drevlianët bënë atë që ajo kërkoi.

Kur burrat arritën në Kiev, Olga i përshëndeti me një buzëqeshje në fytyrën e tyre dhe u një relaksim në banjat termale (siç ishte zakon në atë kohë). Ata pranuan ofertën e saj dhe kur hynë, ajo urdhëroi që dera të mbyllet dhe i gjithë objekti të digjej. Ajo u shkroi sërish Drevlianëve, duke kërkuar prej tyre një sasi të madhe të mjaltit, por gjithashtu edhe të përgatitnin për burrin e saj një varrim të madh për të kërkuar falje për vdekjen e tij. Natyrisht Drevlianët e dëgjuan përsëri, dhe Olga u soll normalisht dhe ngrohtësisht në funeral.

Në festën pas varrimit, ajo priti që të gjithë të dehen dhe pastaj shfrytëzoi pakujdesinë e tyre dhe në një moment  urdhëroi të gjithë ushtarët e saj t’i vrisnin të papërgatitur. Në aktin e saj të fundit të revoltës kundër Drevlianëve, ajo u tha atyre se ata janë të detyruar të paguajnë një taksë në formë të zogjve. Ata e dëgjuan dhe mblodhën të gjithë zogjtë dhe ia dërguan ata Olgës.

Ajo mori dhuratën dhe më pas lidhi një copë leckë të zhytur në squfur në këmbën e çdo zogu. Posa nata ra, banorët ndezën pishtarët  e tyre për të bërë dritë. Olga e dinte se zogjtë do të fluturonin përsëri te pronarët e tyre sapo t’i linin të shkonin. Leckat në këmbët e zogjve të zhytura në sulfur dhe pishtarët e ndezur nxitën një zjarr të madh në të cilin tërë qyteti u dogj./gazeta express

“Eliminoni paragjykimet që kanë ekzistuar për një kohë të gjatë, në mënyrë që gjeneratat e reja të japin më shumë dashuri dhe respekt për njëri tjetrin” – GoDialogue

Ditët e para të GoDialogue – #HapuPër në Pragë

Në janar 2019, tetëmbëdhjetë pjesëmarrës, personalitete të artit, kulturës dhe mediave nga Serbia dhe Kosova, u ftuan në Pragë për të marrë pjesë në takimin e parë të OpenUp4, si pjesë e projektit të financuar nga BE, GoDialogue. Gjatë katër ditëve, ata diskutuan për Dialogun dhe fushatën e komunikimit #OpenUp4, që pritet të fillojë së shpejti, dhe i ndanë pikëpamjet e tyre personale si grup dhe në mënyrë anonime. Disa prej këtyre citateve janë përfshirë në këtë tekst. Kjo ngjarje shërbeu si mundësi për të thyer akullin ndërmjet dy komuniteteve, gjegjësisht Serbisë dhe Kosovës. 

“Shkurtimisht, mendoj se 1. është shumë e rëndësishme të flasim dhe komunikojmë me njëri tjetrin. 2. Të jemi të sinqertë. Nuk besoj në shtete, vetëm në njerëz. 3. Ndoshta jam budall, por dua t’i jap mundësi të gjithë njerëzve. 4. Njerëzit janë njerëz, apo jo?” (Anonim)

Pjesëmarrësit diskutuan për atë se si marrëdhëniet me njerëz, qofshin biznesore apo personale, varen nga natyra, nevojat dhe mundësitë e situatës, dhe jo vetëm nga gjeografia apo politika.

Me internetin, si një formë gjithnjë më popullore e komunikimit, pjesëmarrësit theksojnë se më shumë kanë tendencë të flasin për ngjarje private, kulturë, art, udhëtime, aktivitete shoqërore, se për politikë. Marrëdhëniet zhvillohen në mënyrë të natyrshme dhe duke u bazuar në interesat e përbashkëta, vlerat e ngjashme të jetës dhe pikëpamjet për jetën, e jo në lidhje me origjinën e njerëzve – kjo vlen veçanërisht për rininë.

Komunikimi i rregullt ka rëndësi parimore për ta kuptuar Dialogun

Identifikimi i Ngjashmërive dhe Dallimeve

‘Personalisht, isha i mendimit se njerëzit duhet të komunikojnë por jo në bazë të deklaratave të politikanëve. Do të kishim sukses po të ishte ndonjë mënyrë që të mos na e shpërlanin trurin mediat dhe politikanët. Duhet ta kuptojmë dialogun si proces të ballafaqimit me të kaluarën – duke u ballafaquar me drejtësinë tranzicionale dhe fajësinë, kujtesën dhe kuptimin e përbashkët.’ (Anonim).

Pjesëmarrësit e shohin se sa i përket kulturës, ata e ndajnë pëlqimin e tyre për muzikën, modën dhe gastronominë. Ata e ndajnë besimin në rëndësinë dhe mirëmbajtjen e trashëgimisë kulturore, ku ‘familja’ është në zemër të jetës. Gjithashtu, pjesëmarrësit identifikuan dhe diskutuan për sfida të përbashkëta – standardin e jetës, papunësinë e madhe, emigrimin e ekspertëve dhe njerëzve të avancuar në shkollim, korrupsionin, e madje edhe bllokimin e trafikut.

Fushat e jetës në të cilat kishin më pak ngjashmëri grupet ishin interpretimi i historisë bashkëkohore dhe mënyrat se si është prezentuar ajo para popujve. Ata kishin dëshirë të informoheshin, për shembull, për atë se si është jeta e përditshme në Kosovë dhe anasjelltas, në Serbi, si i vlerësonin sendet e ndryshme njerëzit, si funksionon sistemi i arsimit, si operojnë institucionet shtetërore dhe sistemet legjislative përkatëse etj. Pjesëmarrësit e të gjitha moshave përfituan nga dialogu i hapur dhe i sinqertë në këtë punëtori katër ditore, sepse në nivel shtetëror, këto biseda nuk po dëgjoheshin. Të gjithë pranuan se ka dallime ndërmjet tyre në formë të religjionit, gjuhës, perceptimit të ngjarjeve historike dhe aktuale.

Zgjidhjet për përmirësimin e Dialogut dhe kuptimit të përbashkët

Duke kërkuar dialog pozitiv ndërmjet Kosovës dhe Serbisë, pjesëmarrësit i sugjeruan disa nisma për t’a përmirësuar kuptimin e përbashkët dhe Dialogun: organizimi i kampeve sportive dhe Punëtorive të Artit për fëmijë dhe të rinj si mundësi për të takuar njerëz të ri dhe për të formuar miqësi; bashkëpunimi me njerëz me ndikim nga Serbia dhe Kosova për t’i amplifikuar ngjashmëritë ndërmjet komuniteteve; projekte të përbashkëta filmike me personalitete dhe karakterë të botës së filmit, me të cilët njerëzit mund të lidhen pa marrë parasysh origjinën e tyre; organizimi i shkëmbimeve kulturore, në mënyrë që njerëzit t’i kuptojnë dhe vlerësojnë trashëgimitë kulturore, zakonet dhe vlerat e ndryshme. U sugjerua gjithashtu të ngritet dhe diskutohet tema e bashkëjetesës ndërmjet serbëve dhe shqiptarëve në Ksoovë.

Pa përjashtim, të gjithë pjesëmarrësit janë kundër përfshirjes së organeve apo përfaqësuesve shtetëror në ndonjërën prej këtyre nismave të komunikimit. Fillimisht, nevoja për depolitizim është jetike për ta fituar respektin dhe besueshmërinë e të gjithë qytetarëve, si në Serbi ashtu edhe në Kosovë. Së dyti, komunikimi, pavarësisht nga ndonjë parti, shtet apo fuqi politike, do të thotë se po të arrihet një situatë ngërçi në nivel shtetëror, pjesëmarrësit do të jenë të gatshëm dhe të aftë të vazhdojnë me nismat e Dialogut pavarësisht eskalimit të tensioneve në nivel shtetëror. E për fund, pjesëmarrësit nga Kosova dhe Serbia ishin të lumtur që janë të përfshirë dhe po komunikojnë në çfarëdo mënyre për rëndësinë e kësaj nisme. Shumë prej tyre besojnë se YouTube, facebook dhe Instagram do të jenë platforma thelbësore për t’i mbjellur këto biseda.

Slogani i përzgjedhur I fushatës GoDialogue, që pritet të fillojë me aktivitete në ditët në vijim është #HapuPër dhe ka për qëllim nxitjen e hapjes së komunikimit në mes të njerëzve nga të dy shtetet duke mundësuar kështu tejkalimin e barrierave dhe paragjykimeve në mes të dy shoqërive të shteteve fqinje, Kosovë dhe Serbi,

‘Për mendimin tim, ky dialog do t’i ndihmojë popujve të Serbisë dhe Kosovës, që ata të njoftohen me njëri tjetrin dhe të mësojnë për kulturat e njëri tjetrit. Gjithashtu, duhet t’i eliminojmë paragjykimet që i kemi pasur në komunitetet tona për një kohë të gjatë, në mënyrë që gjeneratat e reja si ne të japin më shumë dashuri dhe respekt për njëri tjetrin. (Anonim)