“Geborgtes Weiss” është filmi gjerman me regji të Sebastian Ko, ku luan edhe aktori kosovar Florist Bajgora, shkruan KultPlus.
Në këtë film ai luan rolin e Valmirit, kurse me role në këtë film janë të përfshirë edhe aktorët: Susanne Wolf, Ulrich Matthes, Rlia Gezer, Bruni Cathomas…
Filmi më 27 tetor do të shfaqet edhe në Televizion Arte të Gjermanisë, film që do të shfaqet prej orës 20:15
Florist Bajgora, njihet për rolet e tij në filmat “Enemy of the House”, “The Land Within Me” and “Lost Exile”, si dhe për rolin e tij episodik në serialin e famshëm londinez “Gangs of London”./ KultPlus.com
Bojkotimi i mësimit nga profesoresha e matematikës Zoja Lohaj Konjufca, si shenjë proteste për kushtet e tmerrshme në objektin e gjimnazit “Dr. Shaban Hashani” në Ferizaj, ka rezultuar me një mbledhje të prindërve, por mbledhje që nuk provokoi prindërit e nxënësve të kësaj shkolle, pasi që në këtë takim kanë marr pjesë vetëm 12 prindër, shkruan KultPlus.
Për këtë mbledhje që nuk solli ndonjë rezultat të kënaqshëm ka njoftuar vet profesoresha Zoja Lohaj Konjufca e cila është duke bërë përpjekje për kushtet e 1300 nxënësve.
KultPlus ju sjell të plotë njoftimin e Lohaj Konjufca./ KultPlus.com
Mark Gerstorfer ka fituar medaljen e artë në kategorinë “Narrative” për garën e çmimit Oscars për Studentë, çmim që i është ndarë për filmin e tij të metrazhit të shkurtë “Kufiri padukshëm”, transmeton KultPlus.
Filmi bartë historinë e një familje nga Kosova, përkatësisht deportimin e tyre, ngjarje që përshkallëzohet gjatë operacioneve të policisë.
Mark Gerstorfer është i diplomuar në Akademinë e Filmit në Vjenë, kurse çmimi i argjendtë ka shkuar për filmin “Revisited” nga Norvegjia, kurse i bronzti për filmin “Istina” të Tamara Denic nga Berlini.
Filmi me rrëfimin me familjen nga Kosova tashmë ka marr dritën jeshile për të konkurruar për kategorinë e filmit të shkurtër për çmimet prestigjioze Oscars. Në këtë film me rolet e tyre luajnë : Vjosa Breiteneder Lubeniqi, Tommy Leonardelli, Labinot Morina…/ KultPlus.com
Luftërat dhe katastrofat njerëzore, siç është ajo që po ndodh në luftën mes Izraelit dhe Palestinës ka vënë në pah fuqinë e madhe të fjalës së shkruar.
Poetja e famshme Izraelite Tsipi Sharoor i ka drejtuar një kërkesë të veçantë poetit të njohur kosovar, Lulzim Tafa, në profilin e tij në Facebook, për të shkruar një poezi dedikuar luftës në Izrael.
Poezia e Tafës ka demonstruar ndikimin e saj të madh në shpërndarjen e mesazhit të paqes, siç ka bërë edhe në rastin e luftës në Ukrainë. Kjo thirrje për të shkruar një poezi lidhur me konfliktin në Izrael është një kërkesë për ndërhyrje artistike të poetit të mirënjohur kosovar i cili ishte i bërë shumë i njohur në botë me poezinë e tij të famshme “Speak to Russian Poets” (Fol me poetët Rusë), që poeti Tafa e kishte shkruar pak para fillimit të luftës në Ukrainë, meqë rast ai kishte marr shumë nderime nga Ukraina, përfshi edhe dekoratën më të lartë të Patriarkut të Shenjtë të Ukrainës, Patriarkut Filaret.
Lulzim Tafa është njëri nga poetët më të njohur kosovar në botë, veprat e të cilit janë përkthyer në dhjetëra gjuhë botërore./ KultPlus.com
Gjendja e tmerrshme e objektit të gjimnazit “Dr. Shaban Hashani” në Ferizaj, që ka kushte minimale për mësim, me mure të thyera, pa ngrohje, me myk, pa funksionim të toaleteve, me kulm që pikon kur bie shi dhe shumë mungesa të tjera ka revoltuar mësimdhënësen e lëndës së matematikës, Zoja Lohaj Konjufca, e cila si shenjë revolte është deklaruar se nuk do të vazhdojë dhënien e mësimit në këtë shkollë, deri në zgjidhjen e këtij problemi, shkruan KultPlus.
Një kërkesë-deklaratë se tashmë Zoja Lohaj Konjufca nuk do të vazhdojë procesin mësimor, si shenjë proteste për neglizhencën nga kompetentët për mos ndërtimin e objektit të ri të shkollës, ndërtim që ka stagnuar tash e gjashtë vjet, e ka dorëzuar në Komunën e Ferizajt, kërkesë që e ka siguruar gazeta online për art dhe kulturë KultPlus.
“Në shenjë revolte, unë si mësimdhënëse e këtij gjimnazi të lartpërmendur ju njoftoj se refuzoj të punoj në këto kushte të papërballueshme për nxënësit dhe profesorët”, thuhet mes të tjerash në kërkesën e Lohaj Konjufca, e cila ka paralajmëruar Drejtorinë e Arsimit në Komunën e Ferizajt dhe Kuvendin Komunal të kësaj komune, se këtë revoltë-protestë e shpreh në emër të saj dhe nxënësve të saj, prindërve të tyre, klasë në të cilën është edhe kujdestare e kësaj klase. Ajo kërkon që menjëherë të fillojnë punimet në objektin e ri, të kthehet dinjiteti i nxënësve dhe i arsimit.
Ajo në fund ka potencuar se refuzon të punojë në këtë institucion deri në funksionimin e plotë të objektit në fjalë.
KultPlus ju sjell të plotë dokumentin e siguruar, sikurse që ka siguruar mbështetjen nga nxënësit e saj./ KultPlus.com
Libri i njohur “Një fije shprese, një fije shkrepëse” i shkrimtarit të njohur Ag Apolloni do të promovohet në Zvicër, ku për audiencën zvicerane do të prezantohet në gjuhën gjermane, shkruan KultPlus.
Kjo mbrëmje letrare ku i pranishëm do të jetë edhe Ag Apolloni do të mbahet më 25 tetor, në ora 18:00 në Xanthippe Verlag, Zähringerstrasse 26, 8001 në Zurich.
Libri është përkthyer nga Zuzana Finger, dhe të pranishmit do të kenë rastin që të marrin librat me autografet e shkrimtarit./ KultPlus.com
Gjendja e tmerrshme e objektit të gjimnazit “Dr. Shaban Hashani” tashmë është pjesë e kronikave të medieve të ndryshme, por vështirësitë e profesorëve dhe nxënësve të kësaj shkolle po vazhdojnë edhe më tej, pasi që objekti i ri që është duke u ndërtuar ka stagnuar tash e gjashtë vjet.
1300 nxënës mësojnë në këtë shkollë me kushte minimale për mësim, objekt pa ngrohje, me toalete jashtë funksionit, me mure dhe tavane të shkatërruar dhe me shumë probleme tjera përcjellëse.
Për këtë neglizhencë të organeve kompetente ka reaguar edhe mësimdhënësja e kësaj shkolle, Zoja Lohaj Konjufca, ku KultPlus ju sjell reagimin e saj të plotë.
Gjimnazi “Dr shaban Hashani” mban mesim ne objektin e stervjeteruar. Ne qender te qytetit te Ferizajt. Shkolla me shume nuk ka ngrohje se sa qe ka. Shpesh dimrit i mbajme vetem nga dy ore mesim per shkak te ftohtit ne klase. Me ftohte eshte mbrenda se sa jashte. Shpesh nuk ka uje per te pastruar shpuzen e lere me diqka tjeter. Era e toaleteve po nenkuptohet.
Per ti hapur dritaret per te marre ajer te paster tash po eshte e pamundur per shkak te ftohtit qe ka nisur.
Punimet ne objektin e ri jane stopuar qe gati 6 vite. Po po gati qe 6 vite. Arsyen nuk e morrem vesh kurre. Qeverisja lokale ia len fajin qeverisjes qendrore dhe anasjelltas.
Sot meqe filloi shiu pameshire, pameshireshem filloi te pikonte uji nga tavani ne klase. Mua pameshirshem me sperkateshin floket e mia te pasterta, me ujin e ndotur te tavanit. Dhe klasa filloi te mbushej me puse. Ra zilja. U kry ora e 6-te. U kry per sot. Po neser ndoshta na bie gjithe tavani e na nxe 1300 nxenes.
E di qe atehere do te reagoni por ju lutem reagoni pak me heret. Reagoni sot.
A eshte kjo liria per te cilen luftuan heronjet tane?/ KultPlus.com
Shfaqja “Babai dhe babai” më la një gjurmë të thellë estetike, shfaqje e cila erdhi në mua aq natyrshëm, sa me raste nuk e kuptoja nëse jam brenda një familje reale, apo jam në një shfaqje teatrale.
Një ndjesi të tillë fillimisht e merrja nga ambienti ku ishte vendosë shfaqja, në njërën nga dhomat e Muzeut Etnologjik, e pas kësaj gjetjeje të vendosjes së shfaqjes, pa dyshim, pjesa tjetër ishte meritë e tekstit, regjisë, lojës së aktorëve, ndriçimit, muzikës dhe çdo detaji tjetër që përcillte kjo shfaqje.
Në fund të shfaqjes, nuk dija nëse duhet ti uroja aktorët për ndjesinë që ma dhanë, apo të bashkëndjeja dhimbjen me ta. Këtë të fundit e kisha më të fuqishme. Sepse, edhe më i shihja këta tre aktorë brenda petkut të roleve, dhe vazhdonin të ishin para syve të mi si: Sara, Dini dhe Lola.
Tash e shumë vjet bashkëjetoj me artin dhe kulturën, por kjo shfaqje më shkundi.
Vendosja e Sarës (Ilire Vinca) përballë audiencës së vogël, shikimi shpues dhe plot dhimbje, sikurse na paralajmëronte: Nuk do të dilni njësoj nga kjo dhomë e vogël, jo aq njësoj sikurse hytë!
Me një ansambël të vogël, me një skenë minimaliste, me një kohëzgjatje perfekte, jo më shumë se një orë e dhjetë minuta, kjo shfaqje shpërfaqi një lojë brilante të aktorëve: Ilire Vinca, Bujar Ahmeti dhe Kosovare Krasniqi.
Jo se dy të fundit erdhën më ftohtë te unë, por Ilire Vinca me rolin e Sarës kapërceu vetveten. Për një kohë aq të shkurtë, ajo u tjetërsua në shumë dimensione. Sara na vinte herë si një grua e zonja, herë një grua me shumë dhimbje, grua që barte burrin e saj të zhdukur në çdo cep të dhomës, grua që qeshte, qeshje që pastaj të vinte në siklet, sepse ishte qeshja që shpërfaqte çmendinë që përballej kjo grua brenda një familje të vogël e me shumë dramë brenda saj.
Të zhdukurit e luftës së Kosovës në shfaqjen “Babai dhe babai” erdhën nëpërmjet Dinit (Bujar Ahmeti). Dhe, sikurse në jetën reale, brenda kësaj familje të vogël, i zhdukuri ishte i pranishëm, të gjallët shndërroheshin në të zhdukur.
E Lola (Kosovare Krasniqi), ishte pika kyçe e kësaj familje, që krijonte urën mes botës reale dhe joreale në këtë familje të vogël, e cila me tkurrjen e saj përçonte pasigurinë e këtyre fëmijëve, që provojnë të jetojnë normal, por që kanë peng rrënjët e familjes.
Dënesat e audiencës së vogël tashmë i dëgjoja në krahun tim te majtë, në të djathtin, para dhe prapa, përderisa Lola (Kosovare Krasniqi) na shpërndante shamitë me mbishkrimin e “Mbi 1600. Ende mungojnë”, shami që ishte kurora e dhimbjes së kësaj shfaqjeje.
Për një moment mendova që këto shami janë rekuizita të shfaqjes, dhe duhet ti kthejmë në fund, dhe në heshtje mendova që do të refuzoj kthimin e asaj shamie.
Vetëm për një fakt, se ajo shami do të më kujtojë mjeshtërinë e dramaturgut Jeton Neziraj, të regjisorit Kushtrim Koliqi, ‘çmendinë’ e Ilire Vincës, hijen dhe praninë e Bujar Ahmetit dhe tkurrjen e Kosovare Krasniqit.
Mos të flasim pastaj për muzikën e kësaj shfaqje, muzikë që na ka përcjellë përgjatë gjithë jetës, po në këtë shfaqje nuk erdhën si tinguj, në këtë shfaqje erdhën si gjëmë.
Dhe “Babai dhe babai” nuk është shfaqje që në fund mund të thuash e shijova. Është shfaqje që me vete merr një copë dhimbje, por një shfaqje që të kërkon të rikthehesh, që të shohësh sytë e Ilires, hutinë e Bujarit, dhe buzën e dridhur të Kosovares./ KultPlus.com
Në një ditë të zakonshme të javës, Shkolla e Muzikës në Gjilan shkëlqeu me një koncert recital të veçantë të profesorit Agron Shujaku, shkruan KultPlus.
E mërkura e kësaj jave u shënua me interpretimin e veprave të mjeshtërve të muzikës, Ravel dhe Beethoven, në një performancë të shquar për të gjithë ata që e ndoqën.
Agron Shujaku, një pianist dhe muzikant i njohur kosovar, tregoi pasionin dhe mjeshtërinë e tij në këtë koncert të veçantë duke interpretuar veprat e kompozitorëve Ravel, duke përfshirë “Pavane pour une infante défunte” dhe “Le Tombeau de Couperin,”.
Ai poashtu interpretoi sonaten e fundit të Beethovenit, një kryevepër e cila impresionoi publikun dhe barti një emocion te thellë te audienca e përbërë nga kolegë, nxënës dhe dashamirët e muzikës, të cilët u kënaqën me këtë përvojë të mrekullueshme muzikore.
Interpretimi i pianistit krijoi një udhëtim muzikor të veçantë, një atmosferë të mbushur me tinguj emocionues që solli freski te audienca e Gjilanit.
Kushtrim Jakupi, drejtori i Shkollës së Muzikës ne Gjilan, shprehi kënaqësinë për organizimin e koncertit recital që i frymëzoi të pranishmit dhe njëkohësisht i inkurajoi pianistët e rinj të ndjekin shembullin e tij në zhvillimin e artit pianistik./ KultPlus.com
PEN-i International, në bashkëpunim me PEN-in e Bosnjë e Hercegovinës, PEN Qendrën e Kosovës, PEN-in malazez dhe PEN-in serb, sot në Sarajevë ka lansuar një raport lidhur me një mori sfidash me të cilat përballen shkrimtarët dhe gazetarët e pavarur në Bosnjë e Hercegovinë, Kosovë, Mal të Zi dhe në Serbi.
I titulluar Narrativat toksike: Heshtja e shprehjes në Ballkanin Perëndimor, ky raport shënon një moment historik e vendimtar në luftën për lirinë e shprehjes, opinionit dhe qasjes në informacion në rajonin e Ballkanit Perëndimor, thuhet në hyrje të raportit.
Në raport janë përfshirë edhe zhvillimet e fundit në Kosovë, me vrojtim të posaçëm në veri ku gjatë gjatë ngjarjeve të vjetme dhe majit të sivjetëm janë shënuar jo vetëm raste të shkeljes së të drejtave të gazetarëve por edhe janë keqtrajtuar disa sish që kanë raportuar nga trazirat atje.
Raporti kërkon respektimin e fjalës së lirë të gazetarit e të shkrimtarit në cilatdo rrethana qofshin.
Në raport nuk janë përfshirë ngjarjet e 24 shtatorit kur një grup i armatosur nga veriu kishte sulmuar Policinë e Kosovësme ç’rast ishte vrarë një efektiv i saj.
“Ky raport zbulon betejat dhe triumfet e zërave të pavarur të vendosur të dëgjohen në Bosnjë dhe Hercegovinë, Kosovë, Mal të Zi dhe Serbi. Si President i PEN International, unë pohoj solidaritetin tonë të palëkundur me këta zëra. Ky raport nuk është vetëm dokumentacion; është një dëshmi e shpirtit të pathyeshëm të shprehjes së lirë. Nuk do të rrimë duarkryq pasi zërat janë mbytur. Së bashku, ne do të krijojmë një narrativë të re – një tregim ku respektohet e drejta për t’u shprehur në mënyrë paqësore,” tha Burhan Sonmez, President i PEN International.
PEN Qendra e Kosovës ka bashkëpunuar ngushtë me PEN-in Ndërkombëtar rreth hartimit të këtij raporti. Përfaqësuesit e PEN Kosovës kanë qenë të ftuar të marrin pjesën në takimin e Sarajevës që u mbajt sot, por pjesëmarrja e tyre është bërë e pamundshme për shkak të regjimit të vizave që Bosnja e Hercegovina vazhdon ta ketë e ta mabajë ndaj qytetarëve të Kosovës./ KultPlus.com
Sapo është publikuar lista e këngëtarëve që do të jenë pjesë e Festivalit të RTSH-së, festival që fituesin e dërgon në garën e madhe të Eurivision, shkruan KultPlus.
Më poshtë është lista e këngëtarëve që do të jenë pjesë e edicionit të 62.
Presidenti i Francës, Emmanuel Macron, tha në Tiranë më 17 tetor se Franca bëri një “gjest besimi sa i përket çështjes së vizave për Kosovën”.
“Dua ta them një gjë me shumë qartësi. Ne kemi bërë një gjest besimi për çështjen e vizave. Sa i përket Francës, ato [vizat] janë hequr sepse ne respektojmë fjalën e dhënë. E sot, fjala nuk po mbahet. Pres një angazhim real nga këto dy autoritete [Kosova dhe Serbia] që të ecin përpara në javët e ardhshme. Ky është vetë kushti për paqe në gjithë rajonin”, deklaroi Macron.
Nga disa media në Kosovë dhe Shqipëri është raportuar se Macroni ka deklaruar në Tiranë se Franca ka suspenduar vendimin për liberalizimin e vizave.
Agjencia franceze e lajmeve, AFP, lidhur me deklaratën e Macronit në Tiranë për vizat, tha se me këtë “ai e ka kërcënuar Kosovën me zhbërjen e vendimit të vizave”.
Vendimi për liberalizimin e vizave për Kosovën pritet të hyjë në fuqi më 1 janar 2024.
Macron foli për vizat në Tiranë duke e ndërlidhur situatën politike mes Kosovës dhe Serbisë.
Gjatë konferencës për media në Shqipëri, ai tha se ka ndjekur rritjen e tensioneve mes Kosovës dhe Serbisë dhe kërkoi që të dyja palët të ndërmarrin hapa për të shtensionuar situatën.
“Është përgjegjësi e [presidentit të Serbisë, Aleksandar] Vuçiqit t’i dënojë prerazi sulmet e 24 shtatorit, sepse kontribuon në kthimin e qetësisë në kufi. Dhe, në etapat e ardhshme ajo që presim nga autoritetet, nga të dyja palët është e thjeshtë: Riorganizimi i zgjedhjeve në komunat e banuara me shumicë serbe, pjesëmarrjen e serbëve në zgjedhje e institucione, krijimi i asociacionit të komunave serbe nga autoritetet kosovare. Pres që Vuçiqi të jetë i përgjegjshëm dhe të njëjtën gjë pres edhe nga presidentja dhe kryeministri i Kosovës”, tha Macron.
Presidenti francez iu referua sulmeve të 24 shtatorit ndaj policisë së Kosovës nga një grup i serbëve të armatosur.
Kosova ka fajësuar Serbinë për këtë sulm, por kjo e fundit ka mohuar se ka gisht në të. Prishtina po ashtu po kërkon nga Bashkimi Evropian që të vendosë masa ndëshkuese ndaj Kosovës.
Fotografi i njohur Hazir Reka do të prezantohet me ekspozitë personale në Gjermani, përkatësisht në Schloss Holte -Stukenbtock, shkruan KultPlus. Ekspozita do të hapet më 28 tetor, në ora 17:00 në Galerinë e këtij qyteti, e që për nikoqir ka tri organizata që edhe kanë punuar për realizimin e këtij projekti.
Zelije Kryeziu Ramadani ka thënë për KultPlus se kjo ekspozitë është projekt i Grupit të Grave Shqiptare “Shqiponja”, në bashkëpunim me dy shoqata gjermane: “Flüchtlingshilfe ” dhe “Demokrati leben”, ku edhe fokus i këtij organizimi është prezantimi i kulturës shqiptare.
“Është mbrëmje që i dedikohet kulturës shqiptare, por me fokus kryesor në ekspozitën e Hazir Rekës, ku ka për qëllim që audienca gjermane të njihet për së afërmi me vuajtjet e popullit të Kosovës, sidomos me përjetimet në luftën e fundit në Kosovës”, ka thënë Kryeziu Ramadani, e cila është shprehur të jetë e lumtur që ka arrit të realizojë këtë projekt të mbështetur nga Kuvendi Komunal i qytetit të Schloss Holte -Stukenbtock, për faktin që kultura shqiptare do të prezantohet para audiencës gjermane por edhe para nacionaliteteve të tjera, pasi që, sipas Kryeziut Ramadanit në këtë pjesë jetojnë mbi 20 nacionalitete.
“Duke pas parasysh se edhe në këtë kohë kemi vende ku po përballen me luftë, qëllimi i kësaj ekspozite është që të rinjtë të shohin se luftërat sjellin vetëm konflikte dhe pasoja të mëdha. Andaj, në vend të konfliktit të sjellim paqe. Në vend të urrejtjes të mbjellim dashuri, besim dhe bashkëjetesë”, ka thënë Kryeziu Ramadani.
Ndërkohë, në këtë mbrëmje dedikuar kulturës shqiptare do të prezantohet edhe kuzhina shqiptare, mbrëmje që do të përcillet edhe me muzikë nga Ramadan Kryeziu./ KultPlus.com
Qendra e Botimeve për Diasporën ka publikuar librin “Përmbledhje me poezi” nga Dritëro Agolli në pesë gjuhë të huaja, publikim që mund të shfletohet dhe shkarkohet online, shkruan KultPlus.
Ky publikim ka ardhë me rastin e 92 vjetorit të lindjes së Agollit, dhe gjuhët në të cilat është përkthyer janë: shqip-anglisht, shqip-italisht, shqip-frëngjisht, shqip-greqisht dhe shqip-gjermanisht.
Filmi “Silence of Sirens” ( Heshtja e Sirenave) me regji dhe skenar nga Gazmend Nela, do të ketë premierën botërore në një nga festivalet më prestigjoze në botë, festivali i filmit Mostra, Sao Palo, Brazil (Edicioni i 47-të), në kategorinë New Film Makers Competition.
Ky film është bashkëprodhuar nga Frame production, Ikonë Studio, Alva Film, Albasky Film, Skopje Film Studio, RTS Radio Télévision Suisse, In My Country Post Production, me mbështetje nga Qendra Kinematografike e Kosovës.
Me producentë: Arben Shala, Valon Bajgora, Britta Rindelaub, Thomas Reichlin, Paskal Semini, Tomi Salkovski dhe Gazmend Nela.
Në film luajnë: Sunaj Raça, Allmir Suhodolli, Armenis Nokshiqi dhe Rina Krasniqi.
Edicioni i 47-të i festivalit ndërkombëtar të filmit Sao Paulo në Brazil do të mbahet mes datav 19 tetor dhe 1 nëntor./ KultPlus.com
Kori “Siparantum” është kori që po shënon shumë suksese në gara të ndryshme botërore, e një garë prestigjioze tashmë ka hapë dyert për këtë kor, shkruan KultPlus.
Për këtë pjesëmarrje ka njoftuar Memli Kelmendi, dirigjenti i këtij kori, i cili ka njoftuar se kjo garë do të mbahet në Suedi.
Më poashtë e keni njoftimin e plotë të Memli Kelmendit.
Kemi kënaqësinë të ndajmë me ju arritjen tonë të fundit. Kori Siparantum do të përfaqësojë shtetin tonë, Kosovën, në garën prestigjioze Grand Prix of Nations në kategorinë “Koret e të rriturve” gjatë Lojërave të 5-ta të Korit Evropian dhe Grand Prix të Kombeve në Norrköping, Suedi.
Kori ynë është më i përgatitur se kurrë për të marrë pjesë në këtë ngjarje të rëndësishme korale. Edhe një herë pas vitit 2019 Lojërat e Korit Evropian dhe Çmimi i Madh i Kombeve, shpesh të referuara si versioni kontinental i Lojërave Botërore të Korit – Lojërat Olimpike të Muzikës Korale , do të ndodhë në Suedinë e bukur.
Falenderojmë nga zemra të gjithë donatorët dhe mbështetësit tanë që kanë luajtur një rol vendimtar në realizimin e kësaj.”/ KultPlus.com
Një numër i madh personazhesh të njohur nga bota e filmit dhe televizionit, duke përfshirë Gal Gadot, Jerry Seinfeld, Jamie Lee Curtis dhe dhe Chris Pine, kanë vendosur emrin e tyre në një letër që tregon mbështetjen e tyre për Izraelin.
Letra, e cila ka më shumë se 700 nënshkrime, u krijua nga organizata Creative Community for Peace dhe dënon vrasjet masive nga Hamasi.
Në të thuhet: “Ky është terrorizëm. Gjithçka që po ndodh është e keqe. Nuk ka asnjë justifikim ose racionalizim për veprimet e Hamasit.
Këto janë akte barbare të terrorizmit që duhet të thirren nga të gjithë. Ata janë një organizatë terroriste, udhëheqësit e së cilës bëjnë thirrje për vrasjen e hebrenjve kudo”.
Gjithashtu u kërkohet personazheve të njohur të sigurohen që nuk po përdornin platformën e tyre për të ndarë informacione të gabuara rreth ngjarjeve që kanë ndodhur javën e fundit.
“Ne shpresojmë për ditën kur izraelitët dhe palestinezët mund të jetojnë krah për krah në paqe”, përmbyllet letra. /abcnews
Ndeshja e eliminatoreve për Euro 2024, Shqipëri-Republika Çeke, Tiranë, 12 tetor 2023 në stadiumin kombëtar, “Air Albania”.
Çdo ndenjëse një plis!
Çdo plis një zemër!
Çdo zemër një zë!
Çdo zë një thirrje!
Dhe gjëmoi “Air Albania” siç nuk kishte shkundullitur kurrë më parë nga themelet deri në qiejt, lart ku prehen shpirtrat e përjetësisë që pikuan e bekuan këtë natë solemne, këtë mbrëmje fitoreje, këtë zgjim të thirrjes së gjakut, gjakut që skuqi këtë flamur dhe hymnizoi këtë mbrëmje më plis e shqiponjë.
Ishte e veçanta e atmosferës kuqezi në shkallët e Arenës Kombëtare, për ndeshjen Shqipëri-Çeki, ishte për të mbetur prej më të spikaturat, më madhështorja. Plot 22 mijë qeleshe janë dhuruar nga Digitalb, jo thjeshtë për marketing, por për ta shndërruar magjike atmosferën, e cila mbeti elektrizuese përgjatë gjithë kësaj ndeshje epike. Dhe për të vijuar gjatë gjithë natës festive në Tiranë dhe kudo ku shqiptarët e zbardhën me ngjyrat kuq e zi, në veshje e në zemër.
Ideja e qelesheve, e cila u potencua nga banderolat, pjesëmarrja në stadium e kreut të ekzekutivit shqiptar, Edi Rama, por me një rëndësi thelbësore prania në shkallët e Arenës Kombëtare të Kryeministrit të Kosovës, Albin Kurti bashkë me Lulzim Jasharin, djalin e Komandantit Legjendar, Adem Jasharit. Për t’u finalizuar me këngën himn, “Mora Fjalë”, të Naim Gjoshit, kënduar live nga Shkurte Fejza.
Krejtkjo ishte një gjëmim i zëshëm për bashkim, një oshtimë që vjen nga thellësia e kohës dhe emergjenca e së sotmes për qëndresë, shqiptari dhe fitore. Pavarësisht se cila ishte përballja futbollistike, shqiptaria është thirrur në këtë manifestim të jashtëzakonshëm për të dëshmuar, se kemi forcë për të fituar, kemi arsye për festuar dhe besim për bashkim kombëtar.
Fitorja e përfaqësueses sonë kundër asaj të Republikës Çeke, ishte jo thjeshtë një konfirmim i Shqipërisë në vendin e parë më 13 pikë, në Grupit E, për eliminatoret e Euro 2024. Po, ishte shndërrimi i “Air Albania”, në një tempull të nacionalizmit, në një shpërfaqje spektakolare të ambicies për ta ngjitur idealin e lartë kombëtar, në kreshtën e një zëri buçitës, që shpërthen në shkallët e një stadiumi për të populluar Evropën dhe Botën me zgjim kombëtar shqiptarë.
Fushat e blerta shpesh kanë qenë arena të ndeshjeve epike, e tillë ishte dhe ajo e mbrëmshmja, 12 tetor 2023, për të na sjellë në kujtesë betejën e 14 tetorit 2014 në stadiumin e Partizanit në Beogradit kur valëviti “Autochthonous” në zemër të Serbisë. Jo pak herë këto kulmime të garës dhe sfidës kanë shërbyer si një katalizator i ridimensionimit të ndjenjës nacionale. Pavarësisht se është futbolli si indicie, në të vërtetë ai mbetet ndoshta mjeti më efikas që shpie te përmbushja e qëllimeve, dhe nacionalizmi është reflektimi më i shpejt në këtë kontakt.
Ngjarjet e fundit në Kosovë, nevoja për bashkim kombëtar, dukshëm ka marrë një shtysë, që merr zjarr në një ndeshje futbolli, për të ushqyer frymën, për të shprehur fuqinë, për të ndërmendur krejtkujt se ne dimë të luajmë, të luftojmë dhe të fitojmë shqip.
Bashkimi i trojeve shqiptare, korrigjimi i një prej padrejtësive më të mëdha historike që Evropa na bëri, për logjikën e politikës është një mision i pamundur, por për idealin kombëtar është një e drejtë, e cila mund të shpërthejë në entuziazmin e një tifozerie, për t’u shndërruar në një altar, të cilin e lartësojmë me besim dhe e përmbushim me devocion dhe përkushtim.
Dje nuk fituam vetëm ndaj Republikës Çeke, nuk çimentuan vendin e parë në Grupit E, për eliminatoret e Euro 2024, që na afron me Gjermaninë, nuk triumfuam vetëm në një ndeshje futbolli, por e lartësuam ndjenjën tonë kombëtare në qiejt e asaj lavdie, të cilën e ushqejmë me magjinë kuqezi dhe fitore.
Melodi e këputun – lot i kjartë nga syni i një grues së dashun… andje e përplasun, xhevahir i tretun, një andërr e shkelun, buzë e paputhun në melodin e këputun.
Nga vaji i heshtun shkunden supat e zhveshun, verbojnë nga zbardhimi… e ther, ther hidhnimi për çastet e rrëshqitun, për fatin e ikun, për gëzimin e humbun në melodin e këputun.
Brrylat ndër gjujë të mpshtetun, ftyrë në shplakë e fundosun: Qan grueja e pikllueme me zemër të piskueme (një kitarë e gjymtun, za kange i mbytun në buzë nga dhimb’ e puthun në melodin e këputun).
Hesht njeriu pran grues që qan e turpnueme… syni i venitet në të loti vërvitet, diçka nxjerr nga xhepi grues ia lë – dhe së shpejti e len gruen e humbun në melodin e këputun.
Por kur vjen ndoj tjetër, epshi kapërthehet, gjaqet turbullohen, përzihen, përvlohen, çohen peshë, tërbohen … e vetëm ndëgjohen ahtët e molisun në melodin e grisun. / KultPlus.com
* Sociologia Sibel Halimi këtë reportazh e ka realizuar në vitin 2011, gjatë një vizite studimore në Izrael dhe Palestinë.
Sibel Halimi
“Nuk është e lehtë t`i bësh bashkë fëmijët, ata rriten me predispozitën e armikut. Por, ne duam të punojmë që fëmijët të rriten përtej kësaj armiqësie”, shprehet Moran, një aktiviste izraelite
Rrëfimi për jetën përtej mureve nisi kur Samiu, rreth të dyzetave doli për t`na pritur në aeroportin e Tel Avivit.
“Nuk është e lehtë jeta këtu, njerëzit janë të ndarë në mure…”, tha ky palestinez tipik me ton gati vetëakuzues. Duket sikur nuk pati kurajo të vazhdojë më tej, sepse natyrisht që nuk ishte për t`u mirë një situatë e tillë. Sikur për ta lënë pas storien e dhimbshme, ai vazhdon të rrëfejë për natyrën mahnitëse të Izraelit, e cila mbase nuk ka nevojë për koment. Mund të përjetohet si e tillë, vetëm nëpërmjet optit.
Rruga nga Tel Avivi deri në Jerusalem është pothuajse e tëra e ndarë me mure të gjera dhe të gjata, anash të cilave qëndrojnë shtëpi me ngjyrë të bardhë.
E ky mur nuk është “The Wailing Wall”, ritual i besimit të hebrenjve, por është ai i ndarjes në mes të dy popujve me besime të kundërta, rival ta kamotshëm, të cilat janë shndërruar në prototip të sintagmës “njeriu për njeriun është ujk”.
E muri është taman mur i ndarjes së thellë fizike, por edhe mentale ndërmjet dy popujve. Kjo ndarje kishte shkuar përtej. Shtëpitë e izraelitëve dhe palestinezëve ishin ndarë edhe në bazë të pusetave bardh ose zi. Kuptohet, e bardha, personifikim për izraelitët dhe e zeza për palestinezët. Praktikisht, ngjyra, me të cilat shpjegohet diversiteti i dhimbshëm i dy popujve që jetojnë në të keqen e përbashkët, të shndërruar tanimë në pronë.
Ndërtesat që i prodhoi Lufta Gjashtë Ditëshe më 1967 dhe që njihen si settlement, janë bërë personifikim i njërës nga luftërat më të shkurtra në botë dhe tregues si popullohet një vend pas pushtimit. E, Izraeli nuk duket të jetë ndalur me kaq. Për një të huaj, tripi në këtë vend është një përjetim në kohë reale, i ndjenjës së luftës- shtetit policor.
Në postblloqe, ushtarët izraelitë kontrollojnë gjithçka. Ky institucion ishte i vetmi ku të gjithë shërbenin pa dalim gjinor. Përfshirja e vajzave dhe djemve në ushtri është më shumë obligim moral sesa shtetëror.
E izraelitë e palestinez, vazhdojnë të mbeten peng të mureve. As aktivistë civilë nuk po mund të bëjnë sa duhet për ta ndryshuar jetën në të mirë të të dy popujve.
Moran, një vajzë rreth të tridhjetave nga Izraeli, po bënte përpjekje për të punuar me të rinj të të dy popujve për të ndryshuar sadopak për të mirë gjendjen. Ajo ka mbaruar studimet për çështje gjinore në Budapest dhe beson në idenë se muret fizike mund të rrënohen lehtë, por jo të njëjtën gjë e beson për muret mendore.
“Nuk është e lehtë t`i bësh bashkë fëmijët, ata rriten me predispozitën e armikut. Por, ne duam të punojmë që fëmijët të rriten përtej kësaj armiqësie”, shprehet Moran.
Ramallah është kryeqyteti palestinez i dominuar nga myslimanët dhe ndodhet 10 km larg Jerusalemit. Emri Ramallah përndryshe ka kuptimin e lartësisë së perëndisë, por gratë e kësaj pjese zor e kanë të arrijnë lartësitë. Marjama, Lina dhe Maria aktiviste palestineze për të drejtat e grave çdo ditë të përditshmërisë së tyre ndajnë me problemet e vajzave dhe grave.
“Ky është vend i heshtjes dhe nga gratë pritet që të mos thonë asgjë”, thonë njëzëri.
Virgjiniteti është normë morale e inspektimit të trupit të vajzave para se ato të martohen. Ngacmimet seksuale janë përditshmëri e zakonshme e burrave dhe djemve në Rammallah, andaj Marjama me organizatën e saj ka vendosur që të organizoj fushatën “Sexual harassment map”, që ka për qëllim vetëdijesimin për të raportuar ngacmimin seksual te organet përgjegjëse.
Por, për gratë e Ramallahut as shtëpia e as rruga nuk janë vend ku ato mund të ndihen të tilla. Në rrugë nga burrat dhe djemtë e panjohur dhe në shtëpi nga të njohurit.
“Virgjiniteti im, është nderi i vëllait tim”, thotë me ironi Marjama, së cilës dëshira për studime i ka hëngër një copë jete.
“Në ceremoninë e diplomimit nuk dëshiroja të merrte pjesë asnjëri nga anëtarët e familjes sime, përpos vëllait, i cili më kishte ndihmuar që unë ta realizoja ëndrrën time”, rikujton Marjama. Vdekja e babait të saj, kishte vështirësuar edhe më shumë funksionimin e familjes. “Nëna mori rolin edhe të babait, andaj nuk ishte e lehtë që ta pranosh patriarkatin me fytyrë gruaje”, shprehej Marjama, teksa shikonte secilën fytyrë gruaje që dëgjonte rrëfimin e saj. Ato punonin bashkërisht për t`i dhënë sadopak gjinisë së tyre dhe jetës. “Shtëpia pa burrë në këtë vend është asgjë e janë gratë ato që pësojnë më shumti qoftë edhe nga asgjëja”.
Sistemi patriarkal i vlerave është aq i fuqishëm saqë edhe gratë që i menaxhojnë organizatat e grave janë “motra të këtyre burrave”, të cilat mendojnë dhe veprojnë me “normën e të qenurit burrë”, thotë Lina.
Praktika e ushtrimit të poligamisë është qendrore në afektimin e jetës së grave beduine. Origjina e emrit të këtij qyteti ka domethënien e të jetuarit në shkretëtirë. E nëse do të kërkohej një analogji, atëherë askush nuk mund t`i përngjante më shumë këtij vendi sesa gratë.
Merav Raz nga organizata “Maan” (The Forum of Arab Women`s Organisation in the Negev), thotë se një përqindje e lartë të grave janë gratë e dyta apo të treta të një burri. Por, nuk ka të dhëna të sakta mbi përhapjen e vërtetë të poligamisë brenda shoqërisë arabe- benduine. Sipas të dhënave të kësaj organizate vlerësohet që ndërmjet 20-36 për qind e familjeve janë poligamiste. Ndërsa, të gjitha çështjet që lidhen me martesën dhe familjen janë të rregulluara me kodet morale të bazuara dhe të predikuara nga institucionet religjioze. “Fuqia e tradicionales ndikon në të gjitha aspektet e jetës së grave”, rrëfenë Merv Raz, gruaja e cila ka vendosur që të bëjë të pamundurën që të punoj së paku në informimin e të rinjve për një jetë më të mirë. Gratë aktiviste nuk i përdorin konceptet moderne, të tilla si të drejtat e njeriut, liberalizmi dhe barazia gjinore, për të referuar në aktivizmin e tyre, por më tepër këto koncepte i transferojnë në kontekstin kulturor-fetar.
“Në forumin tonë janë të përfshira 11 organizata por nuk janë të gjitha aktive, sepse vajzat e reja me t`u martuar ato nuk mund të punojnë më në çështjet të cilat lidhen me gratë. Ato vështirë dalin nga shtëpia, sidomos ato të cilat edhe bëhen pjesë e martesës poligamike”, pohon Safa Abdo, njëra nga vajzat e angazhuara në projektin për përmirësimin e jetës së vajzave dhe grave beduine.
Gratë beduine karakterizohen me refuzim të ulët ndaj poligamisë dhe për këtë studimet tregojnë se ekzistojnë shumë arsye pse gratë beduine nuk refuzojnë të jenë pjesë e jetës poligamiste
“Poligamia është pjesë qendrore e vlerës së shoqërisë beduine, gratë poashtu nuk kanë opsione të tjera në zgjedhjes pikërisht për shkak të varshmërisë ekonomike nga burrat”.
Përveç jetës së vështirë, të cilën e bëjnë vajzat dhe gratë e këtij cepi të botës, statusin e tyre social e rëndon edhe më ngjyra e veshjes që bartin ato. Ngjyra e zezë e punuar me dizajn të kuqe dhe ngjyrë portokalli përcakton statusin e martuar të grave, ngjyra rozë e vajzave simbolizon beqarinë e tyre, ndërsa ajo e gjelbër e veshjes tregon për pozitën e të qenurit e divorcuar.
Huda Asana nga fshati Lakia ka disa vite që është pjesë e organizatës “The Asociation of Promotin of Women Status in Lakia”. Ajo rrëfen katrahurën e grave në këtë vend. Një njërën nga projektet që ajo punon, pos artizanit të qëndisjes që përfshin punësimin e rreth 18 grave dhe shkrim-leximin, ajo ka edhe një projekt për t`i nxjerrë së paku njëherë në muaj gratë nga fshati ku jetojnë.
“Është e vështirë të organizohet ky takim, ngaqë ato nuk lejohen nga burrat e tyre për të bërë sado pak për vete”, rrëfen Huda. Sipas saj “gratë nga Lakia kanë shumë fëmijë dhe e kanë shumë të vështirë të bëjnë diçka për vete, madje nuk e kanë mundësinë më të vogël për tu kujdesur edhe për trupin e tyre”. Madje, edhe kafeja që pinë gratë e kësaj organizate ka simbolikë.
“Kafenë, të cilën tani ju do të pini është pa sheqer dhe kjo u servohet të gjithë atyre që e vizitojnë organizatën tonë, ngase jeta jonë është e zezë dhe e hidhur si kafja…”, përfundon ajo. / KultPlus.com
“Mind Bloom” që udhëhiqet nga psikologia Elmedina Shaqiri Vllasi po ofron ndihmë falas për personat e prekur me kancer, shkruan KultPlus.
Shaqiri Vllasi ka bërë të ditur për KultPlus se seanca psikologjike falas për personat e prekur me kancer do të ofrohen përgjatë muajit tetor, pikërisht në muajin e ndërgjegjësimit për këtë sëmundje.
Shaqiri Vllasi nëpërmjet Qendrës psikoedukative “Mind Bloom” tashmë ka bërë publike edhe kontaktet për rezervimin e terminëve, që të gjithë të interesuarit mund të caktojnë terminët në 043 889 455 ose në email [email protected].
MA. Elmedina Shaqiri Vllasi ka të përfunduar nivelin Baçelor dhe Master në drejtimin e Psikologjisë. Është e licensuar nga Ministria e Shëndetësisë si psikologe klinike. Ka të përfunduara një sërë trajnimesh nga Shoqata e Psikologëve të Kosovës si:
●Testimi i koeficientit vizio-motor,
●Vlerësimi i aftësive të fëmijëve me protokolin ABLLS-R,
●Shëndeti mendor i fëmijëve dhe vlerësimi i tij,
●Teknikat e menaxhimit të ankthit tek fëmijët dhe të rriturit,
●Testimi i personalitetit tek të rriturit,
●Trajtimi i autizmit dhe vështirësive tjera zhvillimore bazuar në parimet e metodës ABA, ●Matricat progresive me ngjyra-Testi i Ravenit,
●Testi i intelegjences dhe prirjes profesionale KOG3,
●Trajtimi i problemeve të shkollës gjatë adoleshencës,
●Çrregullimet e vëmendjes dhe hiperaktivitetit tek fëmijët etj.
Gjithashtu është e angazhuar edhe në fushën akademike, ku është Profesoreshë e Psikologjisë në shkollën fillore dhe të mesme “European School of Kosova”.
Në Qendrën psikoedukative MIND BLOOM ofron këto shërbime:
Bëhet e ditur nga Parlamenti Italian në Komisionin e Mbikqyrjes së Shërbimit Publik të Radio Televizionit Italian se është miratuar rezoluta e prezantuar nga senatori i “Forza Italia”-s, Maurizio Gasparri, i cili ka kërkuar futjen në programacion mbrojtjen e gjuhës shqipe të arbëreshëve të Italisë, përcjell albinfo.ch.
Referuar këtij vendimi, gjatë pesëvjeçarit, 2023 – 2028, RAI do të ketë një kontratë shërbimi në gjuhën shqipe për pakicën etnike arbëreshe me banim në Kalabri, Basilicata, Puglia, Molise, Campania, Abruzzo e Siçili.
Shërbimi Publik i RAI-t në këto rajone ka rregulluar marrëveshjet e kohën e programacionit që do të vihet në dispozicion për transmetimin e tyre në gjuhën arbëreshe.
Kërkesa është dorëzuar zyrtarisht në Parlamentin Italian më 7 shtator 2023 nga Lëvizja Federative e Pakicave Gjuhësore Kalabria e Re së bashku me një grup profesorësh nga Universiteti i Kalabrisë, Palermos e nga kryetarë bashkishë të disa komunave arbëreshe.
Kjo wshtë hera e parë që RAI harton një kontratë të tillë pas mbi 20 vite kur në Itali ka hyrë në fuqi ligji 482 i vitit 1999 në mbrojtje të pakicave gjuhësore e historike në Itali.
Për selinë e RAI-t në Kalabri, ky vendim është një revolucion, pasi do të bazohet në strukturimin e programacioneve e projekteve të reja në gjuhën arbëreshe.
“RAI, nënvizon rezoluta në nenin 9 të kontratës së shërbimit për të mbështetur integrimin, mbrojtjen dhe valorizimin e pakicave gjuhësore, kërkohet garantimi i prodhimit dhe shpërndarjes së transmetimeve radiotelevizive, si dhe përmbajtjeve audiovizive, në gjermanisht dhe latinisht për provincën autonome. Rajoni i Bolzanos, në gjuhën ladine për provincën autonome të Trentos, në sardineze për rajonin autonom të Sardenjës, në frëngjisht për rajonin autonom të Valle d’Aosta, në Friuliano dhe Sllovenisht për rajonin autonom Friuli-Venezia Giulia dhe në gjuhën shqipe për rajonin e Kalabrisë”.
Sipas kontratës së re të shërbimit, “RAI merr përsipër të sigurojë kushtet për mbrojtjen e pakicave gjuhësore të njohura në zonat ku ato bëjnë pjesë, duke marrë dhe promovuar nisma për valorizimin e gjuhëve të minoriteteve të pranishme në territorin italian”.
Kontrata e Shërbimit, këtë herë, duket shumë më tej dhe kujton se RAI-t “i kërkohet të përcaktojë, me rajonet që e kërkojnë, një projekt operacional që synon të përcaktojë marrëveshje specifike me shërbimet përkatëse për të siguruar zbatimin e dispozitave që synojnë mbrojtjen e gjuhët e referuara në ligjin e 15 dhjetorit 1999, n. 482”.
RAI gjithashtu do të marrë përsipër, në përputhje me dispozitat e kontratës dhe në përputhje me disponueshmërinë e frekuencave dhe burimeve që sinjali televiziv i programeve kushtuar pakicave gjuhësore, të sigurojë që programet e treguara të kenë të njëjtën cilësi teknike të pritur për rrjetet gjeneraliste ato kombëtare dhe që ato radio transmetohen edhe nëpërmjet teknologjisë së re DAB.
Së fundi, do të garantojë dixhitalizimin e të gjitha arkivave audiovizive të programeve të prodhuara për pakicat gjuhësore, edhe me synimin për t’i ruajtur ato dhe për t’i bërë ato të aksesueshme për institucionet arsimore dhe shoqatat kulturore komunitare të pakicave gjuhësore./ albinof.ch/ KultPlus.com
Presidenti i Kroacisë, Zoran Milanoviq ka kërkuar sot nga shtetet anëtare të BE-së t’i thyejnë masat ndaj Kosovës që i ka ndërmarrë Komisioni Evropian.
Milanoviq i ftoi të gjithë të shkelin këto masa dhe të takohen me përfaqësuesit e Kosovës.
“Borrelli ministrit të Punëve të Jashtme të Kroacisë ia ka dërguar një letër dhe i ka thënë se Kroacia nuk ka të drejtë të caktuar dhe kur e shkruan një fëmijë është një gjë, kur e shkruan Përfaqësuesi i Lartë i Komisionit Europian është një gjë tjetër dhe aty ka theksuar një sërë pasaktësish dhe të gënjeshtrave të pranuara, të cilat i thonë Kroacisë se nuk ka të drejta të caktuara, por ka të drejtë. Pra më sheh në sy dhe më gënjen. A duhet të hesht për këto gjëra? Pasi ekzistojnë masa të caktuara të Komisionit Europian dhe nuk guxojmë të flasim për komplotet e tyre dhe për veprimet e tyre të padrejta. Ata të cilët nuk kanë dëgjuar për faktin që Komisioni Europian ka masa ndaj Kosovës, i ftoj të gjithë që thyejnë këto masa, të shkelin këto masa dhe të takohen me përfaqësuesit e Kosovës dhe që t’i përsërisin këto”, tha ai.
Presidenti kroat në konferencën e përbashkët me Presidenten e Kosovës, Vjosa Osmani tha se është kundër sanksioneve që janë ndërmarrë ndaj Kosovës.
Sipas tij ato s’kanë asnjë rezultat, dhe sipas tij nuk mund të pritet objektivitet nga Borrelli, një spanoll, që siç tha ai “nga një shtet që nuk e ka njohur Kosovën, nga dikush që është spanjoll e që drejton politikën evropiane kundër Kosovës”.
“Natyrisht, Kosova është nën sanksione, nën sanksione të Komisionit Evropian dhe i ftoj ata që t’i bojkotojnë ato. Dhe keto janë disa prej masave të cilat i ka ndërmarrë Komisioni Evropian nga z.Borrell i cili shpresoj së shpejti shkon në pension dhe si të them t’i ndalojnë, pra nuk janë masa të ndërmarra nga Këshilli i Ministrave, por nga Komisioni, nga Borrelli, ekipi i tij të cilat na ndalojnë dhe kërcënojnë të gjithë ne që të takohemi në disa nivele të caktuara me disa përfaqësues të Kosovës”./ isnajderi/ KultPlus.com
