Hapja e tunelit të Murrizit për qarkullimin e mjeteve e ka bërë të aksesueshme të gjithë rrugën e Arbrit, një nga rrugët kombëtare më të rëndësishme, e cila pritet të shënojë rritje ekonomike të zonës dhe të sektorit turistik për veriun.
Kryeministri Edi Rama ndau sot pamje nga rrugëtimi i automjeteve në tunelin e Murrizit, i cili ka një gjatësi prej 3.78 kilometrash.
“Pasdite nga tuneli i Murrizit”, shkruan Rama krahas pamjeve.
Pas një pune sfiduese që në nisje të tij për shkak të gjeologjisë problematike të zonës nëpër të cilën kalon, Tuneli i Murrizit u hap për qarkullimin e mjeteve në 14 mars.
Tuneli i Murrizit përbëhet nga dy tuba, ai i trafikut dhe ai i emergjencës dhe ka 11 dalje. Në total Rruga e Arbrit ka 7 tunele, me gjatësi totale 8,5 km.
Me një gjatësi rreth 74 km, Rruga e Arbrit konsiderohet një korridor lidhës i rëndësishëm Lindje-Perëndim. Jo vetëm që afron qytetarët e Tiranës e gjithë Shqipërisë me Dibrën dhe Maqedoninë e Veriut, por është po ashtu edhe një arterie e zhvillimit ekonomik dhe turizmit.
Kjo rrugë lidh rajonet lindore dhe verilindore të Shqipërisë, duke përmirësuar transportin e banorëve që jetojnë në zonat në të cilën kalon rruga, si dhe siguron transportin e burimeve natyrore nëntokësore, siç është kromi, nga Bulqiza për në portin e Durrësit, i cili më pas eksportohet.
Gjithashtu, ky aks rrugor është rruga më e shkurtër që lidh Tiranën me Dibrën, si dhe me veriun e Maqedonisë së Veriut Dibrën e Madhe, Tetovën dhe Shkupin, pra një rrugë lidhëse ndërkombëtare./ KultPlus.com
B.B. Poqi ka realizuar shumë këngë dhe shumë albume të cilat u bënë hite të mëdha gjithkund ku flitej shqip.
Këngëtari dhe autori i shumë këngëve, i cili fillimisht formoi bendin “Babillon“ me të cilin i incizoi disa këngë si “Babillon“, “Ti je një iluzion“, “Edhe një natë si kjo“ dhe e fundit “Diku pranë shtëpisë time“, më vonë ai u nda nga bendi dhe vazhdoi karrierën si solo këngëtar.
Sot KultPlus ua sjell një prej këngëve më të njohura të B.B Poqit, “Ti je një iluzion”. / KultPlus.com
Poeti romantik anglez, Bajroni lindi në Londër më 22 janar 1788 në një familje aristokrate të varfëruar. Kur ishte dhjetë vjeç, me vdekjen e xhaxhait, Bajroni trashëgoi titullin Lord dhe pallatin e çifligun Newstead Abbey. Më 1801 Bajronin e dërguan në Harrow, në shkollë, ku studioi gjuhët greke e latine, historinë dhe letërsinë angleze. Në moshën 18 vjeçare, Bajroni hyri në Universitetin Kembrixhit (Trinity College). Më 1809 zuri vendin e tij në Dhomën e Lordëve, ku u shqua për idetë përparimtare. Po këtë vit ndërmori një udhëtim nëpër Evropë.
Gjatë vizitës së tij në Shqipërinë Jugore, më saktësisht në Janinë, Lord Bajroni mori si kujtim nga ato vise një kostum tradicional shqiptar. Do të ishte pikërisht bukuria dhe e veçanta e këtij kostumi, që në verën e vitit 1813 do ta shtynin piktorin Thomas Philips që të realizonte portretin e famshëm të Lord Bajronit veshur me kostumin shqiptar, me titull “Portrait of a Nobleman in the dress of an Albanian” (Portret i një fisniku me veshje shqiptare). Portreti u vendos në Royal Academy dhe tani është i vendosur në ambasadën britanike në Athinë.
Midis veprave letrare të tij, një vend të rëndësishëm zë poema “Çajld Harold’s” (Childe Harold’s Pilgrimage, 1812-1817), shkruar në bazë të përshtypjeve nga udhëtimet të poetit në Spanjë, Greqi, Shqipëri, Zvicër, Itali etj. Poemën e përshkron patosi i luftës për liri të popujve të shtypur e të robëruar. Në të, Xhorxh Bajroni u këndoi traditave dhe zakoneve burrërore të shqiptarëve, trimërisë dhe dashurisë së flaktë të tyre për lirinë.
Në letrën dërguar nënës së tij në datën 12 nëntor 1809, midis të tjerash Bajroni shkruan:“…I dua shqiptarët shumë. Të gjithë shqiptaret janë të lindur të ndershëm dhe besnik, janë të ashpër… por janë ndoshta raca më e bukur në botë për nga paraqitja. Në udhëtimin që bëra, kam rojtur një herë dy ditë, dhe një herë tjetër tri ditë, në një kazermë shqiptarësh, dhe s’kam gjetur kurrë ushtarë aqe të pëlqyer sa shqiptarët, ndonëse kam qenë në garnizonet e Gibraltarit e të Maltës, dhe kam parë shumica ushtarësh spanjollë, frengj, sicilianë dhe anglezë. Nuk më rodhën gjësende, dhe më ftuan me gëzim të marr nga zahireja dhe nga qumështi i tyre…”
Në vitin 1823 Bajroni u nis për në Greqi ku u bë frymëzues i luftës për pavarësi kombëtare të Greqisë kundër turqve. Nuk arriti të shihte çlirimin e saj sepse u sëmur nga ethet dhe vdiq në Mesolongj, më 19 prill 1824, në moshën 36-vjeçare. / KultPlus.com
E Ngarkuara me Punë e ambasadës amerikane, Anu Prattipati, u takua sot me Odën Ekonomike Amerikane të Kosovës për të diskutuar mbi partneritetin ekonomik Kosovë-SHBA.
Ambasada amerikane njoftoi se një delegacion kosovar do të shkojë në programin “SelectUSA” në maj për të eksploruar më tej mundësitë e investimeve dhe “për të nxitur marrëdhënie të begata biznesi!”.
Prattipati në fjalën e saj para Odës Ekonomike tha se është mirë që po “diskutojmë përfitimet reciproke të lidhjeve të forta ekonomike midis Shteteve të Bashkuara dhe Kosovës”.
Ajo tha se OEK përmes avokimit të saj dhe “delegacioneve të shumta të suksesshme që keni organizuar në Shtetet e Bashkuara, ju po ndihmoni në formimin e mënyrës sesi Kosova shihet nga investitorët dhe vendimmarrësit”.
“Pjesëmarrja juaj në programe si SelectUSA e përforcon këtë ndikim. Dua të përgëzoj personalisht shtatë kompanitë që tashmë kanë aplikuar këtë vit për të marrë pjesë në Samitin e Investimeve SelectUSA. Ne inkurajojmë edhe më shumë prej jush që të përfitoni nga kjo mundësi në maj në Uashington, D.C”.
Ajo tha se SelectUSA është një platformë kryesore për zhvillimin e biznesit ndërkombëtar, duke ofruar “mundësi të pashembullta të rrjetëzimit me zyrtarë të qeverisë amerikane, biznese dhe investitorë”.
Pjesëmarrësit zbulojnë gjithashtu mundësi investimi në Shtetet e Bashkuara dhe fitojnë njohuri të tregut të SHBA-së, mes një pasurie burimesh të disponueshme për të pranishmit përmes SelectUSA.
“Lidhjet e bëra në SelectUSA do të çojnë në rezultate të prekshme dhe afatgjata”, tha ajo.
“Marrëdhëniet që zhvillojnë pjesëmarrësit do të avancojnë më tej partneritetin tonë ekonomik dypalësh. Kjo marrëdhënie nuk ka të bëjë vetëm me tregtinë ose investimet – ka të bëjë me ndërtimin e prosperitetit të ndërsjellë”.
“Administrata e SHBA-së është e përkushtuar për ta bërë Amerikën më të sigurt, më të fortë dhe më të begatë dhe ne shohim një përafrim domethënës me atë që po ndodh këtu në Kosovë”.
Ajo tha se Kosova mund të tërheqë investime dhe firma amerikane në sektorë si energjia, TIK dhe prodhimtaria.
“Ne e dimë nga përvoja se këto lloje të partneriteteve mund të jenë transformuese, duke nxitur inovacionin, duke përmirësuar infrastrukturën dhe duke përmirësuar ofrimin e shërbimeve”./Express/ KultPlus.com
Kryeministri spanjoll Pedro Sánchez kritikoi tarifat e SHBA-së si “të paprecedentë” duke i quajtur ato si një kthim në “proteksionizmin e shekullit të 19-të”.
Këto deklarata i bëri pasi ai propozoi një paketë të re prej 14.1 miliardë euro për të mbështetur ekonominë në përgjigje të vendimit të presidentit amerikan Donald Trump, shkruan The Guardian, transmeton Express.
Ai tha gjithashtu se Europa duhet të vendosë një paketë kundër-tarifash dhe masash të tjera si përgjigje dhe të krijojë një fond ndihme të financuar nga të ardhurat nga tarifat e vendosura ndaj SHBA-së në këmbim.
Në një koment veçanërisht të mprehtë, të raportuar nga Reuters, Sánchez tha se Europa tani përballet me një sulm tregtar nga Perëndimi, ashtu siç po i përgjigjet një sulmi ushtarak nga Rusia në Lindje.
Ai tha se Spanja do të kalojë “këtë krizë të padrejtë dhe të pajustifikuar në të cilën disa njerëz kanë vendosur të zhytin botën”.
“Ne do të vazhdojmë të punojmë për integrimin europian, do të vazhdojmë të mbrojmë multilateralizmin, do të vazhdojmë të hapemi me botën dhe do të vazhdojmë të kërkojmë partnerë që respektojnë interesat tona dhe që ndajnë gjithashtu vlerat tona”./ KultPlus.com
Kryeministri Albin Kurti, sot ka pritur në takim ambasadorin suedez, Jonas Westerlund.
Në takim ata kanë folur për mënyrat e thellimit dhe fuqizimit të mëtejmë të marrëdhënieve bilaterale dhe zgjerimit të bashkëpunimit.
“Së bashku diskutuan për mënyrat e thellimit dhe fuqizimit të mëtejmë të marrëdhënieve bilaterale dhe zgjerimit të bashkëpunimit. Mbi këtë të fundit në fokus të diskutimit ishte ai me Odën Ekonomike Nordike dhe tërheqjen e investimeve suedeze në Kosovë. Kryeministri Kurti theksoi mundësitë, ofertën dhe potencialin që ofron vendi ynë për investitorë të huaj.”
Kurti dhe Westerlund diskutuan edhe për aktualitetin politik në vend.
“Gjithashtu diskutuan mbi aktualitetin politik në vend, gjersa kryeministri ka filluar konsultimet politike me partitë e komuniteteve joshumicë për formimin e institucioneve të legjislaturës së 9-të, pas certifikimit të rezultatit të zgjedhjeve të 9 shkurtit.”
Kurti e ka falënderuar ambasadorin Westerlund për “mbështetjen e vazhdueshme të Suedisë ndaj Kosovës dhe marrëdhëniet e shkëlqyeshme” ndërmjet dy vendeve./ KultPlus.com
Sot janë bërë tetë vite nga vdekja e artistit Françesk Radi.
Françesk Radi (Tiranë, 13 shkurt 1950- 3 prill 2017) ishte këngëtar shqiptar nga Shqipëria. I përket brezit të artistëve të viteve `70 të shekullit XX. I cilёsuar si kantautori i parё shqiptar, ai solli risi nё muzikёn e lehtё moderne shqiptare.
Krijimtarija e tij që në fillesat e saj u shkëput nga formatet klasike të trajtimit të këngës së lehtë. Aranzhimi, struktura dhe shtjellimi i saj kanë tipare të qarta pop – rock të modelit anglo – amerikan, por dhe performanca e tij synonte të sillte ndërgjegjësim dhe ndryshime shoqërore.
Françesk Radi ishte njëherësh këngëtar – kantautor, kompozitor e instrumentist i shkëlqyer në kitarë, (dashuria për të cilën i lindi në moshën 5 vjeçare), e kitarë bass, kontrabas, piano, mandolinë e instrumente të ndryshme popullore si çifteli, sharki e tё tjera instrumente tё temperuar.
Si njohёs i mirё i tyre, i bёri pjesё tё krijimtarisё sё tij muzikore, duke bërë edhe muzik rock me çifteli.
Krijimtaria e tij e viteve `71 – `72 u kritikua për shfaqje të huaja dekadente – perëndimore moderniste. Françeskut iu hoq e drejta krijimtarise, skenës, e transmetimit radio – televiziv dhe e larguan nga Tirana. Ai u dërgua për ri-edukim në veri të vendit, në Fushë – Arrëz të rrethit të Pukës.
Për afro dy dekada iu hoq e drejta e pjesëmarjes në festivalin e këngës në Radio – Televizionin Publik Shqiptar, e vetmja medie vizive e kohës.
U rikthye në këtë skenë pas vitit 1991, që shënoi edhe rrëzimin e sistemit komunist në Shqipëri. Ai la pas një fond të pasur këngësh të muzikës lehtë, këngësh popullore të kënduara e të orkestruara prej tij dhe të risjella për kohën nën ritme të moderuara, ndër më të spikaturat.
Vlerësohet si kantautori me krijimtarinë më të pasur. Interpretimet e tij janë së pjesë e fondit “ Zëra të artë“ të muzikës shqiptare./ KultPlus.com
Sot janë bërë 92 vite që nga lindja e këngëtares së njohur Fitnete Rexha, e cila është një nga emrat më të shquar të muzikës së mirëfilltë shqipe dhe asaj qytetare të Tiranës.
Këngëtarja e cila ka lindur më 3 prill 1933 dhe ka vdekur më 14 gusht të vitit 2003, mban në repertuarin e saj mbi 200 këngë popullore të Shqipërisë së Mesme, ku prej tyre më të zgjedhura janë: “Fërfëlloj fëllënza në ujë’’, “Te selvitë e Namazgjasë”, “Qënke veshur me të bardha”, “Mu aty tek shtatë zymbylat”, “Dy të bukurat në nji derë”.
Dëshira për t’u marrë me muzikë i kishte lindur qysh në fëmijëri, pasi ajo ishte vajza e Rexh Delisë “Hero i Popullit”, familje që njihej për vlerat e traditës dhe ku kënga popullore kultivohej për shumë vite.
Regjistrimin e këngëve të para, Fitnete Rexha e bëri rreth moshës 15-vjeçare në Radio-Tirana, nën shoqërinë e grupit orkestral të Shqipërisë së mesme të drejtuar nga Muharrem Gura dhe Skënder Reka.
Karrierën e saj si këngëtare e filloi në Estradën e Tiranës, dhe më pas aktiviteti i saj më tutje u zhvillua pranë A.K.V.P-së në Tiranë deri në daljen në pension në vitin 1981.
Për kontributin e saj të madh, në ruajtjen dhe kultivimin e këngës së pastër shqipe Fitnete Rexha u shpall “Artiste e Merituar” nga autoritetet shtetërore të Shqipërisë. /KultPlus.com
Kryeministri Edi Rama shprehu sot ngushëllimet për ndarjen nga jeta të aktores së njohur Margarita Xhepa.
Në një postim në rrjetet sociale Rama publikoi një kolazh fotosh nga jeta artistike e ikonës së kinematografisë shqiptare.
“Lamtumirë yll”, shkruan Rama.
Margarita Xhepa, një nga zonjat më të mëdha të teatrit dhe filmit shqiptar, gjatë karrierës së saj, ka krijuar mbi 150 role në teatër dhe 32 role në kinematografi./KultPlus.com
Teatri Kombëtar i Operas e Baletit do të sjellë këtë fundjavë një shfaqje dedikuar fëmijëve. Në Hollin Koncertor të TKOB-së, rikthehet “Il Maestro di Cappella”, një opera për fëmijë ku asgjë nuk shkon sipas partiturës dhe kjo do t’ju shkaktojë plot të qeshura.
Opera për fëmijë dhe familje “Il Maestro di Cappella” do të shfaqet mëngjesin e 6 prillit, duke rikthyer në mjediset e TKOB artdashësit e vegjël dhe harenë e tyre. “Il Maestro di Cappella” është një shfaqje argëtuese dhe edukative që u mëson fëmijëve, përmes të qeshurave, si funksionon një provë me orkestrën, çfarë roli ka dirigjenti dhe si funksionon një orkestër e vërtetë.
Fëmijët do të shohin instrumente që nuk binden, tinguj që duket sikur do të shpërthejnë. Maestroja përpiqet të bindë orkestrën duke u kënduar notat që ata duhet të luajnë. Me këtë vepër të përshtatur posaçërisht për ta, fëmijët do të njihen më nga afër me botën e muzikës dhe do të edukohen për të qenë dëgjues të vëmendshëm dhe plot pasion në të ardhmen.
Orkestra Simfonike e TKOB do të shoqërojë lojën argëtuese të baritonit Artur Vera dhe dirigjentit Dritan Lumshi./atsh/KultPlus.com
Ministri i Ekonomisë, Kulturës dhe Inovacionit, Blendi Gonxhja, ka përkujtuar yllin e kinematografisë shqiptare, Margarita Xhepës, duke postuar një kolazh me rolet e saj më të spikatura në karrierën e një jete.
Gonxhja ka njoftuar se homazhet për “Nderin e Kombit”, aktoren e mirënjohur Margarita Xhepa, do të mbahen nesër më datë 4 prill në orën 10:00-13:00 në hollin e Teatrit Kombëtar të Operas dhe Baletit.
“Sa i trishtë lajmi për ndarjen nga jeta të Margarita Xhepës, ikonës së kinematografisë e teatrit shqiptar! Artistja e cila i dha jetë e përjetësoi aq shumë personazhe që janë skalitur thellë në kujtesën e miliona shqiptarëve. Kush ka pasur fatin ta njohë nga afër Margaritën, e di edhe më mirë se çdo personazhi i ka dhënë aq shumë nga vetja, duke përcjellë në rolet e saj urtësinë, qetësinë e dhembshurinë, klasin e finesën. U prehsh në paqe Margaritë!”, shkroi ministri Gonxhja në profilin e tij zyrtar në Facebook.
Aktorja e shquar e skenës dhe ekranit u nda nga jeta në orët e para të ditës së sotme, pas problemeve me mushkëritë. Vetëm një ditë më parë, Margarita Xhepa mbushi 93 vjeç.
Veç çmimeve dhe titujve në karrierën e saj artistike, aktorja Margarita Xhepa është “Nder i Kombit” dhe e nderuar me dekoratën “Gjergj Kastriot Skënderbeu”./KultPlus.com
Artisti shqiptar Gjon’s Tears do të shpërfaqet në mjuzikël – komedi, në rolin e Kontit të Monte Kristos ndërsa krah tij do të luaj Filipine Lavrey e cila do të ketë rolin e dashurisë së humbur të Edmond Dantes, Mercédès. Shfaqja do të prezantohet nga janari i vitit 2026.
Gjon’s Tears, emri i të cilit është Gjon Muharremaj, ka interpretuar në edicionin e katërt të “Ta zbardhi ftyrën”, të organizuar që shumë vite nga gazeta online për art dhe kulturë “KultPlus”.
Emri i tij artistik u bë i njohur për publikun që kur mori pjesë në The Voice në Francë, ku arriti deri në gjysmëfinale në vitin 2021. Më vonë, ai përfaqësoi Zvicrën në Eurovision me këngën Tout l’Univers. Ai ka publikuar albumin e tij të parë “The Game” në vitin 2023.
Ndërkaq, Filipine Lavrey, punon me trupën e Enfoirés, e cila vë talentin e saj si kantautore në shërbim të shumë artisëve të shquar.
Konti i Monte Kristo, rolin e të cilit do ta luajë Gjon’s Tears, nuk e ka përfunduar ende kërkimin e tij për dashuri dhe hakmarrje.
Në një intervistë për Vanity Fair, Gjon’s Tears ka folur më shumë për shfaqjen, që do të luhet në rreth 50 data të ndryshme, duke u shprehur se theksi është më shumë tek dashuria se sa te hakmarrja.
“Shfaqja do të mbajë shpirtin e muzikaleve franceze duke e mbushur me karakteristika të reja, që nga procesi i krijimit. Për shembull, Filipina dhe unë jemi plotësisht të angazhuar në krijim. Ne nuk na kërkuan vetëm mendimin tonë, ne u përfshimë automatikisht”, është shprehur ai.
Për Vanity Fair, të dy artistët janë përgjigjur për rolet e tyre që do t’i bashkojë në skenë vitin e ardhshëm, e që do të nis në Paris dhe më pas me një turne me 50-të prezantime.
Intervista e plotë:
Çfarë ju tërhoqi në këtë projekt spektakli?
Gjon’s Tears: Nga leximi i libretit, më pëlqeu ritmi i tregimit, moderniteti me të cilin rrëfen këtë tekst klasik, duke i qëndruar jashtëzakonisht besnik, me dëshirën për të menduar audiencën, për të krijuar ndërveprime pa rënë kurrë në një monolog moralizues. Theksi është te historia e dashurisë, më shumë se te hakmarrja. Shfaqja do të mbajë shpirtin e muzikaleve franceze duke e mbushur me karakteristika të reja, që nga procesi i krijimit. Për shembull, Filipina dhe unë jemi plotësisht të angazhuar në krijim. Ne nuk na kërkuan vetëm mendimin tonë, ne u përfshimë automatikisht. Si kantautorë-muzikantë, ne e duam atë. Nuk bëhej fjalë të mbërrinim me çelës në dorë, donim t’i përvishnim mëngët.
Filipine Lavrey: Është me të vërtetë e qepur, çfarë privilegji: ne marrim pjesë në zhvillimin e këngëve, ne zgjodhëm posterin. Në skenë do të vihet në pah edhe përvoja jonë si muzikantë. Do të kemi mundësinë të luajmë live një instrument, i cili nuk është i zakonshëm në muzikalë.
Pse ishte tani koha e duhur për ju për të marrë përsipër sfidën e komedisë muzikore?
Gjon’s Tears: Për ne kjo është një fillim i madh. Të dy vijmë nga estrada dhe e di që do të mund ta përdorim këtë ndikim muzikor në krijimin e këngëve. Rrugët tona janë të ndryshme, por ato bashkohen në disa faza, duke përfshirë për momentin: Filipina punon në Amerikën Latine, unë sapo kam nënshkruar në Shtetet e Bashkuara. Ishte shumë e rëndësishme për ne që të ruanim një lidhje të fortë me audiencën tonë franko-folëse dhe të vazhdonim të eksploronim Francën me këtë shfaqje.
Ku jeni në procesin krijues?
Filipine Lavrey: Po incizojmë një këngë që do të publikohet shumë shpejt, “L’Éclat de nous”. Në ditët në vijim do të kalojmë shumë kohë në studio duke punuar për këngët e spektaklit.
Çfarë do të thotë për ju karakteri i Mercedes?
Filipine Lavrey: Ndihem më afër me të siç thuhet në libër sesa në film. Karakterin dhe forcën e saj e ndjeva më shumë nëpër faqe. Ajo më dukej më e zgjuar, por në të gjitha rastet më dukej mbresëlënëse në trajtimin e dramës. Ajo është tepër elastike. Kjo vajzë është një feniks. Mezi pres të shoh se si do të shkëlqejë personaliteti im përmes personazhit.
Po Edmond Dantes i ardhshëm? A bën presion shtesë interpretimi i Pierre Niney në ekran?
Gjon’s Tears: Padyshim që nuk dua të përballem me Pierre Niney-n, por sjell interpretimin tim për të përcjellë gjithë kompleksitetin e personazhit, të gjitha aspektet e tij. Për mua, ky libër ka të bëjë me një fat të prishur. E gjithë sfida do të jetë të punosh në atë që ka mbetur nga Edmond Dantes si Monte Cristo. U mërzita nga ribashkimi me Mercedesin, sepse ajo nuk e njeh më. Gjithçka ka ndryshuar tek ai: fjalët, shprehjet, fytyra e tij. Megjithatë, ajo është atje diku.
Inskenimi është projektuar nga Serge Postigo, koreografia nga Nicolas Huchard dhe skenografia nga Emmanuelle Roy. Çfarë mund të presim në skenë?
Gjon’s Tears: Këngët do të jenë pop dhe estetika do të jetë shumë elegante. Kostumografi Jean-Daniel Vuillermoz do t’i qëndrojë besnik fantazisë së veshjeve të kohës – në traditën e komedive më të bukura muzikore, përfshirë ato amerikane. Do të ketë edhe disa surpriza të këndshme në skenë.
Si ndikoi suksesi i filmit në shfaqje?
Gjon’s Tears: Spektakli ka vite që po punohet, që nga broshura e deri te këngët. U rilançua dy vjet më parë. Filmi dha një rinisje shumë të mirë, veçanërisht pasi bëri që shumë lexues të dëshironin të zbulonin veprën origjinale. Filipine Lavrey: Ne kemi një marrëdhënie shumë të mirë me ekipin e filmit, të cilët janë me gjithë zemër me ne për këtë projekt dhe e miratojnë atë 100%.
Ju do të filloni shfaqjet në Dôme de Paris përpara një turneu të madh me rreth pesëdhjetë data. Si i qaseni ushtrimit?
Gjon’s Tears: Nuk kemi vend për gabim. Ne do të fillojmë shumë fuqishëm me Dome de Paris, kështu që ndiej shumë presion, nga vetja ime dhe nga publiku, të cilin shpresoj t’ia dalim mbanë. Në të njëjtën kohë, e di që jam shumë mirë i rrethuar për të punuar deri në premierë. Filipine Lavrey: Një nga qëllimet e mia në jetë është të luaj në teatro para se të shoh koncerte atje. Do të bëhet në Dome de Paris! Gjithashtu donim të takojmë audiencën më të gjerë të mundshme, në të gjithë Francën./KultPlus.com
Presidentja e Republikës së Kosovës, Vjosa Osmani, me ftesë të Mbretit të Jordanisë, Abdullah II dhe presidentit të Bullgarisë, Rumen Radev, ka udhëtuar për në Bullgari, për ta përfaqësuar Republikën e Kosovës krahas liderëve të tjerë në Takimin e nivelit të lartë të Procesit Aqaba për Ballkanin III, i cili do të mbahet në Sofje.
Në kuadër të vizitës në Sofje, Presidentja Osmani do të mbajë fjalim në hapje të Samitit si dhe do zhvillojë takime të ndara bilaterale me disa nga liderët pjesëmarrëse. Gjatë këtyre takimeve, do të diskutohet thellimi i marrëdhënieve bilaterale, avancimi i bashkëpunimit në fushën e sigurisë dhe forcimi i përpjekjeve të përbashkëta për stabilitetin rajonal.
Ky takim organizohet nën patronazhin e Mbretërisë Hashemite të Jordanisë dhe Republikës së Bullgarisë dhe synon të forcojë bashkëpunimin rajonal dhe ndërkombëtar në luftën kundër terrorizmit dhe ekstremizmit.
Procesi Aqaba, i iniciuar nga Mbreti Abdullah II i Jordanisë në vitin 2015, ka luajtur një rol kyç në koordinimin e përpjekjeve globale kundër terrorizmit dhe adresimin e sfidave të sigurisë.
Presidentja Osmani do të theksojë angazhimin e suksesshëm të Kosovës në luftën kundër terrorizmit dhe radikalizmit, si dhe rëndësinë e bashkëpunimit të ngushtë me aleatët dhe partnerët strategjikë. Në këtë kuadër, ajo do të riafirmojë përkushtimin e Kosovës për sigurinë rajonale dhe për forcimin e kapaciteteve të institucioneve të saj të sigurisë në përputhje me standardet euroatlantike./KultPlus.com
Këngëtarja shqiptare me famë botërore, Dua Lipa, ka ngritur në këmbë gjithë publikun në Spark Arena, në Auckland të Zelandës së Re, duke e shndërruar stadiumin në një klub nate. Ajo bëri një shfaqje tepër të zjarrtë ndërsa nisi turneun e saj me një performancë tërheqëse të mërkurën.
Lipa ka organizuar mbrëmë një koncert në Auckland, duke rrëmbyer vëmendjen e çdo personi të ri dhe të moshuar të turmës, që kur doli me kostumin e saj të parë të natës, shkruhet në mediat sociale të huaja.
“Shfaqjet e saj australiane ishin të mbushura me të ftuar specialë, “miku” i saj Troye Sivan mori pjesë në një duet “Rush”. Kevin Parker doli në skenë për një kopertinë të grupit të tij Tame Impala “The Less I Know the Better”. Angus Stone dhe Vance Joy gjithashtu asistuan Dua Lipën në shfaqjet përgjatë kanalit”, shkruan RNZ.
Dua Lipa do të luajë një shfaqje tjetër në Auckland në Spark Arena të premten, më 4 prill./KultPlus.com
Presidenti i Republikës, Bajram Begaj, shprehu ngushëllime për ndarjen nga jeta të aktores Margarita Xhepa. Përmes një mesazhi drejtuar familjes së saj, komunitetit të artistëve dhe mbarë shqiptarëve, të cilët e kanë admiruar divën e skenës dhe ekranit, Presidenti i Republikës vlerësoi figurën e Margarita Xhepës si artiste, si grua, si nënë, por dhe rolin e saj në shoqëri.
“Me trishtim mësova se Margarita Xhepa, ylli i skenës dhe ekranit shqiptar, u shua sot. Me interpretimet e saj, ku spikati në mishërimin e figurës së gruas dhe veçanërisht të nënës, Margarita Xhepa çoi dritë dhe u bë pjesë e dashur e familjeve shqiptare”, shkruan Presidenti i Republikës në profilin e tij zyrtar në Facebook.
Presidenti Begaj e vlerësoi Margarita Xhepën si artisten e madhe, figurën publike të respektuar, gruan dhe nënën e nderuar.
“Deri në vitet e fundit të jetës së saj iu kushtua artit dhe artin e saj e përdori për kauza të rëndësishme në mbrojtje të grave dhe fëmijëve”, shkruan Presidenti, duke shprehur ngushëllimet më të ndjera për familjen, për komunitetin e artistëve shqiptarë dhe për mbarë shqiptarët që e kanë ndjekur dhe duartrokitur.
Veç çmimeve dhe titujve në karrierën e saj artistike, aktorja Margarita Xhepa është “Nder i Kombit” dhe e nderuar me dekoratën “Gjergj Kastriot Skënderbeu”./atsh/KultPlus.com
Ministria e Kulturës, Rinisë dhe Sportit ka njoftuar se të shtunën, duke filluar nga ora 19:30, do të mbahet koncerti i Orkestrës së Filharmonisë së Kosovës, frymëzuar nga David Bowie në atelienë e Pallatit të Rinisë dhe Sporteve në Prishtinë.
Në njoftim thuhet se nën drejtimin e Gregory Charette, orkestra do t’ju shpie në një udhëtim përmes veprave më ikonike të Glass-it, duke filluar me Koncert për Violinë Nr. 2 – “American Four Seasons”.
“Nën drejtimin e Gregory Charette, orkestra do t’ju shpie në një udhëtim përmes veprave më ikonike të Glass-it, duke filluar me Koncert për Violinë Nr. 2 – “American Four Seasons”, me violinistin e shkëlqyer Maximilian Haft. Derisa mbrëmja do të vazhdoj me Simfoninë Nr. 1 – “Low”, të frymëzuar nga albumi legjendar “Low” i David Bowie-t, i vitit 1977”, thuhet në njoftim./KultPlus.com
Mbrëmë në “Burgun e idealit”, në Prishtinë, u mbajt manifestimi i emëruar “Njeriu në burg i numëron të gjitha“ që shënoi një nismë të re të aktiviteteve kulturore në Muzeun “Burgu i Idealit” në Prishtinë. Gjatë mbrëmjes pati lexime skenike performancë, videoinstalacion dhe rrëfime nga disa ish-të burgosur politikë.
Ky ishte fillimi i nismës së re të aktiviteteve kulturore në përpjekje për ta funksionalizuar Muzeun “Burgu i Idealit” . Shpalosja e një pjese të shkrimeve dhe materialeve tjera të trashëguara nga ish-të burgosurit politikë gjatë periudhës jugosllave në Kosovë e më gjerë është synimi i arkivimit, ruajtjes dhe i ekspozimit të tyre.
Pastaj, motivi i numërimit si teknikë narrative – paraqitet në forma të ndryshme mbi përvojat e vështira dhe robërinë e të burgosurve të ndërgjegjës. Qysh në rrëfimet e mbrëmshme të veprimtarëve Selatin Novosellës, Shefik Sadriut, Shukrije Gashit, Kadri Kryeziut dhe të Martin Çunit, rrëfimet emocionale shpreheshin herë si mënyrë e rezistencës, solidaritetit dhe vuajtjes, e herë si formë e simbolikës, mbijetesës dhe forcës për të mos harruar. Këto rrëfime nënvizonin aspektet kyçe të këtij kapitulli historik, nëpër të cilin ka kaluar rrugëtimi i shtetformimit.
Kjo hapje e mbrëmshme synonte që këto përjetime në hapësirën reale, në lokalet e burgut, të bëheshin sa më të prekshme për vizitorët, si dhe të tërheqin vëmendjen sa më të madhe për muzeun. Organizata “Molla e Kuqe”, në kuadër të projektit për rifunksionalizimin e hapësirës së muzeut, të mbështetur nga Ministria e Kulturës, Rinisë dhe Sportit për vitet 2025 dhe 2026, ka planifikuar një seri aktivitetesh nga fusha të kulturës dhe artit, që trajtojnë temat e kujtesës, narrativave mbi të kaluarën dhe transformimeve që e kanë karakterizuar këtë periudhë.
Gjatë mbrëmjes pati lexime skenike performancë, videoinstalacion dhe rrëfime nga disa ish-të burgosur politikë.Data e këtij manifestimi, 2 prilli, përkoi edhe me përvjetorin e Demonstratave të vitit 1981. Një ngjarje kjo e kthesës në historinë e rezistencës shqiptare në ish-Jugosllavi.
Nga data 3 prill, “Burgu i Idealit” do të jetë i hapur për vizitorë gjatë orarit zyrtar: E Martë – Shtunë nga 10:00 – 14:00.KultPlus.com
Më 3 prill 1880 lindi koloneli Aubrey Herbert, ushtarak britanik dhe njëherësh diplomat, udhëtar dhe oficer i inteligjencës. Herbert ishte mbrojtës i pasionuar i pavarësisë së Shqipërisë. Lidhja e tij me vendin tonë, u forcua pas vizitave në 1907, 1911 dhe 1913.
Kontributi i tij për Shqipërinë ishte aq i vyer sa u vlerësua duke ia ofruar dy herë fronin e Shqipërisë. Nga 1911 deri në vdekjen e tij ai ishte anëtar përfaqësues i konservatorëve në parlamentin britanik.
E gjithë familja Herbert ka kultivuar një qasje dashamirëse ndaj Shqipërisë. Lady Elisabeth Carnarvon, në nder të kujtimit të birit të ndjerë të familjes Herbert, Aubrey, përuroi shkollën e Kavajës. Themelimi i këtij institucioni arsimor erdhi në kuadër të akteve të shumta bamirëse të familjes britanike në Shqipërinë e viteve ‘20 të shekullit të kaluar.
Lady Carnarvon mundësoi edhe ndërtimin e Bibliotekës për Djelmërinë Shqiptare, e cila zotëronte një fond prej 5 mijë librash në gjuhë të huaj.
Koloneli Herbert vuajti gjatë pjesës më të madhe të jetës së tij nga shikimi i dobët dhe ishte pothuajse i verbër në fillim të të 40-ve. Aubrey Herbert u nda nga jeta më 26 shtator 1923./atsh/KultPlus.com
Shqipëria po fiton popullaritet vit pas viti në mesin e turistëve austriakë – falë bregdetit të bukur, natyrës së mrekullueshme dhe klimës autentike ballkanike, shkruan Iwona Kołczańska në edicionin gjerman të revistës globale “DailyWrap”.
Shqipëria ka qenë destinacioni kryesor i viteve të fundit, duke zgjeruar vazhdimisht ofertat e saj.
Në vitin 2024, Shqipëria u rendit e shtata ndër vendet më të njohura për udhëtime ndërkombëtare.
Një vit më parë, ajo ishte në vendin e tetë pas Qipros. Në vitin 2024, Shqipëria kapërceu ndjeshëm këtë destinacion ishullor dhe tërhoqi më shumë turistë.
Shqipëria – “Kroacia e dytë”?
Falë ujërave të saj bruz, plazheve parajsore dhe klimës ballkanike, Shqipëria është krahasuar prej kohësh me Kroacinë por me çmime shumë më të ulëta.
Turistët mund të eksplorojnë mrekullitë natyrore të Shqipërisë dhe shtigjet malore, të bëjnë udhëtime në Tiranë ose të vizitojnë qytete atmosferike me histori të jashtëzakonshme, si Berati.
Falë distancës relativisht të shkurtër nga Austria, Shqipëria është një destinacion popullor edhe për familjet me fëmijë.
Fluturimi i shkurtër ndikon edhe në nivelin e çmimeve, i cili është relativisht konkurrues në krahasim me destinacionet e tjera të Evropës Jugore.
“Ky është edhe një avantazh i këtij vendi”, tha Marzena German, eksperte e udhëtimit.
“Shqipëria fitoi zemrat e austriakëve disa vite më parë dhe kjo dashuri rritet vit pas viti”, shtoi ajo.
Ky është një vend që fokusohet vazhdimisht në zhvillimin e turizmit.
Në praktikë, kjo do të thotë se ofertat po rriten vit pas viti dhe ato ekzistuese po modernizohen.
“Zinxhirët e njohur të hoteleve po investojnë dhe po ndërtohet infrastruktura e re e transportit – gjithçka për ta bërë qëndrimin sa më të këndshëm”, tha German.
Shqipëria ofron një vijë bregdetare të larmishme prej 362 kilometrash, përgjatë së cilës do të gjeni resorte të gjalla, plazhe të gjera dhe gjire misterioze.
Gjithashtu, turistët mund të pushojnë në bregun e detit Adriatik – Rivierën Shqiptare me plazhe ranore – ose në detin Jon, me bregdetin e tij më shkëmbor.
Kombinimi i plazheve me rërë dhe guralecë mund të gjendet në Vlorë, një qytet turistik ku bashkohen ujërat e të dy deteve.
Shtrirja më e bukur ndodhet në bregun e detit Jon, në jug të vendit, në kufi me Greqinë.
Resorti më i famshëm atje është Ksamili, një fshat i vogël në jug të Sarandës dhe 4 kilometra nga ishulli grek, Korfuzi.
Peizazhet këtu janë të ngjashme me Karaibet ose Maldivet
Edhe pse vetë Ksamili është i mbushur me turistë gjatë pikut të sezonit, gjithçka që duhet të bëni është të merrni me qira një makinë dhe të lëvizni në zonën përreth për të gjetur vende më pak të populluara me njerëz – që ofrojnë gjithashtu pamje spektakolare.
Sa kushtojnë pushimet në Shqipëri?
Një javë pushime në Shqipëri me mëngjes dhe nisje nga një prej aeroporteve austriak kushton nga 270 euro për person.
Opsioni me dy vakte fillon nga 305 euro, ndërsa paketa “all inclusive” mund të rezervohet nga 385 euro.
Linjat ajrore me kosto të ulët ofrojnë gjithashtu fluturime drejt Shqipërisë, ndaj austriakët janë të lumtur të organizojnë udhëtimet e tyre.
Një javë në hotel me auto-drive mund të rezervohet nga 140 euro me opsionin e mëngjesit dhe nga 195 euro me paketën “all inclusive”./atsh/KultPlus.com
Është ndarë nga jeta në moshën 91-vjeçare, ikona e kinematografisë shqiptare Margarita Xhepa.
Ajo ka lindur me 2 prill të vitit 1932 në Lushnje, ku ka filluar hapat e parë të karrierës së saj.
Margarita Xhepa, ishte një nga Zonjat e Mëdha të teatrit dhe filmit shqiptar që ka skalitur memorien e publikut shqiptar me role brilante që prej fillimit të saj, në vitet ’60-ta dhe deri më tani.
Ajo u rikthye në skenën e Teatrit Kombëtar në maj të vitit 2004, për të shkëlqyer në dramën “Streha e të harruarve”, një tjetër sukses në karrierën e saj 50-vjecare.
Nga viti 1950 u aktivizua si artiste probiste në Teatrin Popullor (sot Teatri Kombëtar) dhe njëkohësisht studioi në Liceun Artistik, dega e Dramës.
Ka krijuar mbi 150 role në teatër, midis të cilëve mund të përmendim: Majlindën tek filmi “Majlinda” (Xh. Broja), Dafina tek Lumi i vdekur (dramatizim nga K. Velça i romanit me të njëjtin titull të Jakov Xoxës), Filja tek Cuca e maleve (Loni Papa), Zonja Mëmë tek Kush e solli Doruntinën (dramatizim nga Edmond Budina e Pirro Mani i romanit me të njëjtin titull të Ismail Kadaresë), Nëna tek Përballë vetes (Ruzhdi Pulaha) etj.
Ka qënë njësoj e suksesshme në rolet e dramaturgjisë botërore, si Ofelia tek Hamleti, vajza e dytë tek Mbreti Lir, dado tek Romeo e Xhulieta, Mbretëresha Margaret tek Rikardi III, të Shekspirit.
Në rolet e tjera nga dramaturgjia botërore spikasin Klea tek Dhelpra dhe rrushtë (Figereido), Lena tek Xhaxha Vanja (Çehov), Ledi Milford tek Luiza Miler (Shiler), Zonja Berling tek Vizita e inspektorit (Pristli), Zonja Lomen tek Vdekja e një komisioneri (A. Miller), Ana Andrejevna tek Revizori (Gogol), Marsela tek Qeni i kopshtarit (De Vega), Mashenka tek Mashenka (Afigenov), Shejla tek Morali i zonjës Dulska (Zapolska), apo Dado tek Elektra e Sofokliut, nën drejtimin e regjisorit grek Dhimitri Mavriqis, në Teatrin Kombëtar të Greqisë në Athinë.
Veç roleve në teatër, ka realizuar edhe 32 role në kinematografi, duke punuar me shumicën e regjisorëve shqiptarë. Me K. Dhamon xhiron Vitet e para dhe Gjurmët, me I. Muçajn e K. Mitron Dimri i fundit, Tokë e përgjakur, Një djalë edhe një vajzë dhe Apasionata, me Viktor Gjikën, Gjeneral gramafoni, me E. Musliun,Rrethi i kujtesës dhe Vitet e pritjes (E. Musliu), me Kujtim Çashkun, Dora e ngrohtë, me Dhimitër Anagnostin, Gurët e shtëpisë sime, me P. Milkanin, Pranvera s’erdhi vetëm, me S. Kumbaron, Koncert në vitin 1936, me Gj. Xhuvanian E diela e fundit dhe I dashur armik.
Në vitin 1997, ka interpretuar në filmin grek “Mirupafshim” (regjisor J. Koras, K. Vupuras). Filmi u laureua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa, Çmimin e Nderit.
Filmat në të cilët ka luajtur Margarita Xhepa:
1. Bolero në vilën e pleqve – (2021) Firdus 2. Në kërkim të kujt (2011), serial 3. Tingulli i heshtjes (2010) telenovela 4. Kronikë provinciale (2009) 5. Ne dhe Lenini (2008) – Bet 6. I dashur armik (2004) – Nëna e Harunit 7. Mirupafshim (1997) 8. E diela e fundit (1993) 9. Një djalë edhe një vajzë (1990) – Mësuese Kristina 10. Vitet e pritjes (1990) – Nëna e Helenës 11. Kush e solli Doruntinën (1989) Nëna e Kostandinit dhe Doruntinës 12. Pesha e kohës (1988) – Gruaja e Kryetarit 13. Pranvera s’erdhi vetëm (1988) Nëna e Irenës 14. Misioni përtej detit (1988) – Kristulla 15. Rrethi i kujtesës (1987) – Tefta 16. Fillim i vështirë (1986) Shoqja e Zanës 17. Gabimi (1986) – Mësuesja 18. Gurët e shtëpisë sime (1985) – Gruaja e Fane Mërtirit 19. Militanti (1984) – Nëna e Visar Shundos 20. Apasionata (1983) – Nëna e Arturit 21. Dora e ngrohtë (1983) – Nëna e Besimit 22. Shokët (1982) – Nëna e Gencit 23. Dita e parë e emërimit (1981) – Drita 24. Me hapin e shokëve (1979) (TV) – Mamaja e Gonit 25. Dollia e dasmës sime (1978) – Nëna e Belës 26. Gjeneral gramafoni (1978) – Zonja e Prefektit 27. Koncert në vitin 1936 (1978) – Eleni Jankollari 28. Dimri i fundit (1976) – Shano 29. Pylli i lirisë (1976) – Nënë Katja 30. Tokë e përgjakur (1976) – Sandra 31. Gjurma (1970) – Violeta 32. Vitet e para (1966) – Zyraka./KultPlus.com
Disa zona në juglindje dhe perëndim të Kosovës mund të përballen me përmbytje në ditët në vijim, për shkak të rritjes së nivelit të ujit në disa lumenj si pasojë e reshjeve të vazhdueshme të shiut, paralajmëroi të mërkurën Instituti Hidrometeorologjik i Kosovës.
Në ditët e fundit ka pasur reshje të dendura të shiut dhe instituti paralajmëroise reshjet pritet të vazhdojnë, në disa pjesë të vendit me intensitet nga mesatarë deri të lartë, të cilat mund të krijojnë vërshime të shpejta.
“Duke pasur parasysh situatën e përgjithshme meteorologjike, sidomos ditëve të fundit, e përcjell me reshje shiu, të cilat në disa zona të vendit kanë qenë me intensitet nga i ulët deri mesatarë dhe me kohëzgjatje relativisht të gjatë, kanë shkaktuar ngritje të niveleve nëpër disa lumenj, sidomos atyre me karakter malor”, thuhet në njoftim.
Sipas njoftimit, gjendje e rënduar në është në Pellgun e Lepencit, Moravën e Binçës, Bistricën e Pejës, Bistricën e Prizrenit, Bistrica e Deçanit, ku nivelet e ujit aktualisht janë në ngritje, dhe si pasojë mund të shkaktojnë përmbytje.
Tani për tani, zonat më të rrezikuara janë vendbanime në Hanin e Elezit, Kaçanik, Dragash, Pejë, dhe Deçan.
“Këtë e vështirësojnë akoma me shume, reshjet e shiut te cilat pritet te bien gjate orëve dhe ditëve ne vazhdim”, paralajmëroi instituti./ KultPlus.com
Në ambientet e KultPlus Caffe Gallery është promovuar sot libri “Në mes vargjesh” nga poeti Sylë Maxhera, në të cilin është paraqitur një koleksion i poezive që shpërfaqin ndjenja të thella të autorit duke filluar nga dashuria prindërore e deri te reflektimet mbi jetën dhe vdekjen.
Libri paraqet një udhëtim të brishtë mbi ndjesitë dhe mendimet e poetit, mbi përpjekjen për bukurinë e fjalës dhe thellësinë e shpirtit njerëzor. Libri “Në mes vargjesh” përmban 38 poezi dhe 24 reflektime prozaike, dhe sjell një pasqyrë të ndjenjave të autorit përmes një stili të natyrshëm.
Moderuesja e ceremonisë promovuese Rrezarta Haziraj, ka thënë se autori në poezitë e tij ka gërshetuar tingullin e zemrës, ritmin e frymëzimit dhe një pjesë të shpirtit të tij.
“Ky libër është fryt i dashurisë për gjuhën, për artin e fjalës dhe, mbi të gjitha, për ju- lexuesit, të cilët i jepni jetë çdo vargu. Ju ftoj ta eksploroni këtë koleksion dhe të zbuloni pjesë të vetes në faqet e tij. Jam e bindur se secili prej jush do të gjejë një poezi që e prek dhe e frymëzon”, ka thënë moderuesja Haziraj.
Ndërsa, redaktori i librit, Dan Ibrahimi ka thënë se poezitë e Sylë Maxherës janë reflektim i ndjenjave të thella dhe i përvojave personale të shprehura përmes një gjuhe të thjeshtë, por prekëse.
“Përmes vargjeve të tij, autori na fton të refektomë mbi kalimin e kohës, vdekjen dhe kujtimet që na shoqërojnë gjithë jetën. Poezitë janë të drejtëpërdrejta dhe të qarta. Poezitë e Sylë Maxherës janë një mozaik emocionesh dhe përvojash, që nga gëzimi familjar deri te reflektimi mbi shoqërinë dhe kombin. Ai arrin të prekë lexuesin me ndjenja të sinqerta dhe mesazhe të fuqishme. Një vepër që frymëzon dhe fton për reflektim!”, ka thënë redaktori Ibrahimi.
Ndërsa, profesoresha e Gjuhës dhe Letërsisë Shqipe, Flora Peci ka thënë se autori Maxhera përmes stilit të tij të fuqishëm dhe ekspresiv përçon ndjenja të thella te lexuesi.
“Sylë Maxhera përmes vargjeve reflekton dukshëm dashurinë për çdo gjë që përçon dashuri, mirësi dhe modesti. Për nga natyra autori edhe në përditshmëri falë pozitivitetit përmes të folurit të tij, njejtë edhe përmes vargjeve e përcjellë këtë dashuri e pozitivitet. Stili i autorit në poezitë e tij është shpeshherë i fuqishëm dhe ekspresiv duke përçuar ndjenja të thella përmes vargjeve të tij”, ka thënë profesoresha Flora Peci.
Tutje, profesoresha Peci ka thënë se përmes metaforave të fuqishme autori i ka dhënë forcë edhe ndjenjave kombëtare.
“Në mes të poezive të tij gjejmë një larmi temash që trajtojnë atdhedashuri, figurën e nënës si dhe kontrastin mes të mirës, të keqes, të drejtës dhe të padrejtës. Në poezitë e tij, autori shpesh evokon ndjenja patriotike duke përshkruar dashurinë për vendin dhe sakrificat për lirinë”, ka thënë Peci.
Ndërkaq, përkthyesi Elvi Sidheri përveq një fjalimi të rastit, ka deklamuar edhe poezinë “Të ndihmoj”, të cilën e kishte përzgjedhur në mënyrë rastësore.
“Sylë Maxhera shkruan prej 26 vitesh, dhe poezitë i shkruan drejtë për drejt në spanjisht. Këtë libër e ka shkruar në shqip, ndërsa një përmbledhje tjetër e ka shkruar në spanjisht me forcat e tij, në një nga shtëpitë më të mëdha botuese në Spanjë. Kam pasur rastin ta shoh edhe shkrimin vlerësues të shtëpisë botuese disa faqesh për poezinë e tij, ku ia kishin vlerësuar punën”, ka thënë Sidheri.
Ndërsa, diplomati i parë i Kosovës në Bruksel, Reshat Sahitaj ka thënë se letërsia dhe kultura janë ambasadorët më të mirë dhe boshti kurrizor i një shteti.
“Në librat e Sylë Maxherës kam parë një filozofi të poezisë shqipe. Kemi edhe shumë poetë të tjerë të cilët mund të maten me autorë të letërsisë evropiane. Siç keni parë, në vitin e kaluar ne kemi përkthyer mbi 75 poetë në Paris, për të cilët kanë shkruar gazetat parisiene. Në mesin e këtyre autorëve është edhe Sylë Maxhera i cili është duke bërë një diplomaci përmes letërsisë. Pra një diplomaci jozyrtare por që është shumë më e kapshme dhe shumë më shumë i ndihmon Kosovës”, ka thënë Sahitaj.
Një fjalë rasti e mori edhe Mark Perr, gazetar nga Anglia, i cili tha se Syla Maxhera për të është një libër i hapur.
“Nuk e kuptoj gjuhën në të cilën ai shkruan, por e kuptoj zemrën e tij. E shoh se ai bën një ndërlidhje shpirtërore me njerëzit”, ka thënë ai.
Ndërkaq, autori Sylë Maxhera në një fjalim të shkurtë i ka falënderuar të gjithë të pranishmit për pjesëmarrje në ceremoninë promovuese.
“Ju faleminderit shumë, dëshira më e madhe e imja është të ju shoh së bashku. Ju faleminderit shumë për mbështetjen dhe që keni gjetur kohë të vini këtu. Jam i privilegjuar që ju kam afër, uroj të na prijë e mbara të gjithëve, dëgjofsha mirë për të gjithë”, ka thënë Maxhera.
Edhe gazetari Mentor Mripa po ashtu, e ka vlerësuar këtë botim të autorit Maxhera.
“Syla është një person zemërbardhë. Urime Sylë, faleminderit që na ke mbledhur këtu. Uroj që kjo punë e Sylës dhe të tjerëve të shëndrrohet në diçka të bukur edhe për aspektin estetik të librit”, ka thënë ai pas disa kritikave mbi botimin e librit, që u thanë në këtë ceremoni promovuese. / KultPlus.com
Aleatët e NATO-s kanë premtuar më shumë se 20 miliardë euro (21,6 miliardë dollarë) ndihmë sigurie për Ukrainën në tre muajt e parë të vitit 2025, tha sot sekretari i Përgjithshëm i NATO-s, Mark Rutte.
Duke folur përpara një takimi të ministrave të Jashtëm të NATO-s në Bruksel, Rutte tha gjithashtu se komanda e NATO-s – në qytetin gjerman të Wiesbaden – Ndihma dhe Trajnimi i Sigurisë së NATO-s për Ukrainën (NSATU) – do të vazhdojë të koordinojë ndihmën ushtarake për Ukrainën dhe trajnimin e ushtarëve ukrainas.
Njoftimi vjen mes frikës se mbështetja e SHBA-së për Ukrainën mund të reduktohet në mënyrë drastike – pasi administrata e presidentit amerikan, Donald Trump po përpiqet të nxisë një marrëveshje paqeje, ndërsa u ka bërë thirrje aleatëve evropianë të rrisin shpenzimet e mbrojtjes.
Pas një takimi katastrofik midis Trump dhe presidentit ukrainas Voloydmyr Zelensky në Shtëpinë e Bardhë, Uashingtoni pezulloi përkohësisht mbështetjen ushtarake dhe të inteligjencës për Kievin, por që atëherë ka rifilluar ndihmën.
Vitin e kaluar, aleatët e NATO-s dhanë një ndihmë sigurie me vlerë rreth 50 miliardë euro për Ukrainën.
Rutte e përgëzoi Trump “për thyerjen e bllokimit” në luftën e nisur nga Rusia në shkurt 2022.
Por, ai theksoi se pavarësisht angazhimit të vazhdueshëm të aleatëve ndaj Ukrainës, kërcënimi me të cilin përballet Evropa nga Rusia vazhdon të mbetet.
Ministrat e Jashtëm të NATO-s do të takohen nesër dhe pasnesër në Bruksel për të diskutuar mbi forcimin e aftësive mbrojtëse të aleancës.
Administrata e Trump u ka kërkuar vazhdimisht aleatëve evropianë të rrisin shpenzimet e mbrojtjes në 5% të prodhimit të brendshëm bruto (PBB) – më shumë se dyfishi i objektivit aktual të NATO-s prej 2% të PBB-së.
Duke sinjalizuar se vendimi për rritjen e shpenzimeve të mbrojtjes ka të ngjarë të diskutohet në samitin e ardhshëm të NATO-s në qershor, Rutte përsëriti se aleatët do të duhej të rrisnin shpenzimet në 3%./ KultPlus.com
