Në mesin e dhjetë restauranteve më të mira të hapura së fundmi në Nju Jork, New York Times ka përzgjedhur edhe atë nga shqiptari Ramiz Kukaj.

Kritikët e gastronomisë në faqet e prestigjiozes njujorkeze e kanë futur në listë edhe ‘Çka ka Qëllu’, restaurant ku servohen ushqime tradicionale shqiptare.

Vendi është i mbushur me elemente shqiptare në të katër anët e brendësisë.

“Hyn brenda dhe menjëherë je në një tavernë të ndonjë fshati të Kosovës apo Shqipërisë. Pronari dhe kryekuzhinieri vijnë nga të dyja vendet. Do ta shijosh bukën, kërko edhe më shumë, ndërsa më pas do të duash edhe jogurt. Patjetër do të ketë edhe salsiçe. Plot sheqerpare, kafja vjen e shoqëruar. Mund ta dini se është kafe turke por përdërisa e pini në Çka ka Qëllu, do ta quani kafe shqiptare” shkruan mes tjerash New York Times për restaurantin në Belmont, Bronx.

“Kavi”, “Hutong”, “Llama San” janë disa prej restauranteve tjera në këtë listë të formuluar nga Pete Wells, me restaurantet më të reja në metropolin amerikan, shkruan KultPlus.

Këtu do të gjeni, byrekun shqiptar që sfidon biftekun xhamajkan. Dyshemetë dhe muret duket sikur janë transportuar nga një shtëpi apo fermë shqiptare dhe mikpritësit luajnë meloditë popullore mbi instrumentet tradicionale. / KultPlus.com