Festivali “Dokufest” këtë vit mbërrin në edicionin e 16-të. Në Tiranë organizatorët e tij prezantuan programin e plotë të edicionit të 16, që këtë vit do të zhvillohet nga data 4-12 gusht në Prizren. Por për publikun në Tiranë mbrëmë u shfaqën shtatë filma, që janë pjesë e festivalit “Dokufest”.

Drejtori artistik i festivalit, Veton Nurkollari u shpreh se për këtë edicion kanë aplikuar rreth 2000 filma shqiptarë dhe të huaj.

“Nga një numër rreth 2000 filmave, kemi përzgjedhur 102 filmave për kategori garuese të festivalit dhe rreth 150 filma për mbi pesëmbëdhjetë programe të veçanta të festivalit, shumë prej të cilave i përkojnë edhe temës së këtij edicioni”, pohoi Nurkollari.

Mbrëmë për publikun në Tiranë u shfaqën filma të regjisorëve nga Kosova, Amerika, Gjermania, etj.

Drejtori artistik Nurkollari pohoi mes të tjerave se është i kënaqur me numrin e filmave të regjisorëve kosovarë dhe shqiptarë, si dhe cilësinë e përgjithshme të filmave për këtë vit, duke e marrë parasysh se do të ketë filma fituese të festivaleve kryesore si Cannes, Tribeca, Berlinale, Sundance si dhe nga festivalet Europiane dhe rajonale. Selektori i programit të filmave të shkurtër, Samir Karahoda tha se këtë vit në festival cilësia e projekteve të filmave shqiptarë ka qenë me nivel më të lartë.

“Vlen të përmendet që edhe cilësia e autorëve kombëtarë sivjet ka qenë e nivelit të jashtëzakonshëm duke i krahasuar me nivelet e viteve te kaluara, e sidomos autorët nga Shqipëria ku prej 13 filmave sa edhe janë në kategori garuese, 6 prej tyre janë të autorëve shqiptarë” pohoi mes të tjerave elektori Sami Karahoda. Programi kombëtar në festival do të ketë gjithsej nëntë premiera, që shfaqen për herë të parë në “Dokufest” nga data 7-10 gusht për publikun.

Tema e festivalit

Tema e së ardhmes do të jetë në edicionin e këtij viti të Festivalit Ndërkombëtar të Filmit Dokumentar dhe të Shkurtër “Dokufest”. Ky edicion premton një vështrim të guximshëm në pasiguritë dhe shpresat e së ardhmes përmes një kombinimi të programit të filmave, ekspozitave vizuale, masterklasave dhe bisedave të ndryshme, punëtorive bashkëpunuese, koncerteve muzikore si dhe paltformave për përdorimin e mediave dhe teknologjive të reja. Drejtoresha e festivalit Nita Deda vlerësoi rëndësinë e temës së këtij edicioni të festivalit, e cila përbëhet nga një program i gjerë dhe i kuruar me kujdes duke shpresuar të jetë dhe Tirana.

“Ne kemi provuar të krijojmë një hapësirë, ku e ardhmja do të hulumtohet me gjithë mistikën dhe shpresën që ajo mbart, e shpresojmë që këtij hulumtimi ti bashkangjitet edhe Tirana” tha Deda.

Sipas saj, ideja për temën e këtij edicioni erdhi sepse në vitet e fundit ka pasur lëvizje të mëdha nga qytetarë që përpiqen të kenë një zë më të fortë për të ardhmen e tyre. Përmes punëtorive të ndryshme, “Dokufest” synon që të edukoj autorë të ndryshëm të rinj nga autorët më të mirë rreth realizimit të filmave. Bashkëpunimi më Laboratorin e Antropologjisë Vizuale kthehet sërish në Prizren dhe do të shënoj edicionin e dytë këtë vit. Këtë edicion rikthehet edhe Qendra Ballkanike e Dokumentarëve, ku do të jenë 7 projekte filmike të cila do të prezantohen para profesionistëve të ndryshëm për ti paketuar këto projekte për treg ndërkombëtar. Masterklase përveç tjerash, do të mbahen nga regjisorë të njohur si John Smith dhe Travis Wilkerson, shkruan SotNews./ KultPlus.com