Festivali i traditës “Etnofest”, festival i arteve dhe kulturës tradicionale që ka nisur edicionin e tij të tetë në fshatin Kukaj të Prishtinës dy ditë më parë me një program të ngjeshur etno artistik, do të sjellë mjaft aktivitete edhe gjatë ditës së sotme.

Sipas programit, në ditë e tretë të festivalit “Etnofest” në bashkëpunim edhe me institucione tjera të traditës si studion “Marubi”, Instituti Albanologjik, Muzeu i Kosovës, etj, do të sjellë ekspozita, etnoperformanca, debate etnologjike, orë letrare, shfaqje teatrale dhe muzikë deri në orët e vona.

Në orët e pasdites Instituti Albanologjik dhe “Etnofest”, kanë paralajmëruar një debat etnologjik ku studiuesit Bashkim Lajçi, Vlora Berisha e Ylberza Halili do të referojnë mbi tema interesante mbi traditën etno kulturore dje dhe sot.

Do të ketë edhe një orë letrare me krijues të njohur nga Kosova dhe Shqipëria, shfaqja “Të harruarit” në regji të Shkurte Aliut dhe pas orës 21 pjesëmarrësit e ditës së tretë të “Etnofest” 8 do të argëtohen me muzikën e grupit “Gipsy Groove’. / KultPlus.com