Filmi “Internimi” i regjisorit Kast Hasa s’ka pak që pati premierën në Tiranë, ndërsa për publikun e gjerë pritet të shfaqet më vonë. Ngjarjet e filmit janë të bazuara në histori të vërteta përgjatë viteve ‘80 kur Shqipëria ishte nën regjimin komunist.

Filmi është xhiruar në Divjakë, Lushnje dhe Ferras. Familja Kulla përpiqet të mbijetojë ndërsa janë të internuar nga regjimi komunist. Për (Arturin) djalin e familjes, situata vështirësohet më tepër pasi vendbanimi i tij i ri, është pranë shtëpisë së të dashurës së tij (Frida) e cila është e detyruar të fejohet me operativin. Familja vazhdon të jetojë vuajtjet e persekutimit ndërkohë, siç zbulohet më vonë, i sapo riatdhesuari (Nik Nuri) në përpjekje për të ndihmuar familjen, e komplikon situatën më tutje.

Në role protagoniste vijnë Klodian Hoxha, Krist Baçi dhe Enxhi Cuku.

Ngjarja është e vërtetë, si ju ka rënë në dorë skenari?

Regjisori Kast Hasa: Janë disa ngjarje që i kisha dëgjuar nga gojdhënat dhe në një periudhë të caktuar. Për dy javë kam shkuar në fshatrat ku këto kanë ndoshur dhe kam intervisatuar banorët.

Përveç regjisor edhe interpretoni në skena të konsiderueshme të filmit. Kush është prapa kameras në ato momente?

Ishte asistent regjisori dhe operatori i kameras, që më korrigjonte. Pas çdo dubli që bëja shihja nëse ishte i saktë apo jo.

Sa ju ka kushtuar filmi?

Edhe matët edhe s’matet, sepse kam futur shumë kohë të papaguar. Qendra e filmit më dha diku tek 75 mijë dollarë. Që është një shumë jashtëzakonisht e vogël për të filluar projektin, lere më ta mbarosh. Më ka ndihmuar familja ime dhe aktorët që erdhën me pagesa të vogla për shkak se ju pëlqeu projekti dhe donin ta shihnin të realizuar.

Vlerësuar me çmimin “Filmi më i mirë i huaj” në Arizona International Film Festival, SHBA, dhe “Regjia më e mirë” në Riverside International Film Festival, SHBA. Filmi sapo u zgjodh në një festival tjetër, në Catalina Film Festival në Californi ku do të konkurrojë në garën zyrtare në datën 25-29 Shtator.