Organizata profesionale ndërkombëtare ‘The Academy of Motion Picture Arts and Sciences’, e cila ndanë çmimet më të rëndësishme në fushën e artit si ‘Oscar’, ka emëruar presidentin e ri, shkruan Kult Plus.

Kinematografi i njohur amerikan John Bailey, u votua nga 54 anëtarët e bordit dhe u zgjodh president i kësaj akademie për mandat njëvjeçar, duke mposhtur aktoren e njohur amerikane Laura Dern.
Emërimi i John Bailey për president të akademisë së Oscar, zgjoi komente tek publiku, pasi ai nuk ka fituar asnjëherë çmimin Oscar në karrierën e tij filmike.

Për katër mandate njëvjeçare me radhë, president i Akademisë së Arteve dhe Shkencave të Filmit, ishte Cherly Boone Isaacs, e cila ishte edhe presidentja e parë me ngjyrë në Oscar dhe femra e tretë në historinë 90 vjeçare të kësaj Akademie. /KultPlus.com