Në kuadër të rubrikës “Në Fokus” të edicionit të kaluar të emisionit “Nëpër Film”, u prezantua biografia e aktores ikonike, Meryl Streep.

Aktorja fituese e shumëfishtë e çmimit Oscar, është një prej yjeve më të famshëm të ekranit, e njohur për rolet në filma të ndryshëm si: “Sophie’s Choice”, “The Devil Wears Prada”, “Mamma Mia!” dhe “Doubt”. Streep e filloi karrierën e saj në skenën e New Yorkut kah fundi i viteve ‘60 dhe u shfaq në disa produksione të Broadwayit. Duke qenë e aftë ta mahnitë publikun me aftësitë e aktrimit në drama, komedi e mjuziklla, aktorja shumë shpejt u shndërrua në një prej aktoreve më të mira të kësaj kohe, transmeton Koha.

E lindur më 22 qershor të vitit 1949 në Summit të New Jerseyit, Meryl Streep tashmë ka arritur ta gëzojë një karrierë më shumë se 50-vjeçare në ekran. Duke qenë se ka diplomuar në kolegjin “Vassar College” dhe në shkollën e dramës “Yale”, aktorja posedon aftësi të jashtëzakonshme për t’u adaptuar me rolet skenike dhe ato para kamerës.

Karrierën e saj si aktore, Streep e ka filluar në New York gjatë viteve ‘60, duke u paraqitur në disa shfaqje të Broadwayit, përfshirë këtu dramën e vitit 1977 të Anton Chekhov, “The Cherry Orchard”. Ndërsa në ekran të madh, aktorja debutoi gjatë viteve ‘70 me rolin e parë filmik në dramën e “Julia”. Vitin tjetër, ajo u shfaq në filmin “The Deer Hunter” ku luajti krahas aktorëve Robert De Niro dhe Christopher Walken, e për të cilin rol e fitoi nominimin e saj të parë për çmim Oscar. Po ashtu, në vitin 1978, Streep e fitoi shpërblimin e parë “Emmy” për performancën e shkëlqyer në filmin “Holocaust”. Vitin tjetër, portretizimi i një gruaje e cila e braktis familjen dhe pastaj rikthehet për të luftuar për kujdestarinë e djalit të saj në filmin “Kramer vs. Kramer”, ia solli aktores çmimin e saj të parë Oscar në kategorinë “Aktorja më e mirë në rol dytësor”.

Duke qenë një kameleon i vërtetë në ekran të madh, Streep, vitet ‘80 i kaloi duke portretizuar role të ndryshme nga njëri-tjetri. Në filmin “Sophie’s Choice”, ajo e portretizoi një grua polake të traumatizuar nga eksperienca e saj gjatë Holocaustit. Streep e fitoi shpërblimin e dytë akademik në kategorinë “Aktorja më e mirë”, për punën e mrekullueshme në këtë film. Ndërsa, në filmin “Out of Africa”, ajo e portretizoi një pronare daneze të plantacionit e cila jeton në Kenya. Ky rol ia solli aktores një tjetër nominim për Oscar.

Me ta arritur moshën 40-vjeçare, Streep vazhdoi të gjejë edhe më shumë role të cilat e sfidonin atë në ekran, derisa aktoret e tjera të Hollywoodit me ta arritur një moshë të ngjashme, përballeshin me vështirësi të shumta në gjetjen e roleve protagoniste në filma të mëdhenj e kualitativ.

Në fillimet e mileniumit të ri, Streep ishte më e zënë se kurrë me projekte filmike. Por, disa prej filmave më të njohur të aktores të realizuar ndër vite mbesin: “Postcards from the Edge”, “The Bridges of Madison County”, “Music of the Heart”, “The Hours”, “Adaptation”, “The Manchurian Candidate”, “Prime”, “The Devil Wears Prada”, “A Prairie Home Companion”, “Mamma Mia!”, “Doubt”, “Julie & Julia”, “It’s Complicated”, “The Iron Lady”, “Florence Foster Jenkins”, “The Post” dhe të tjerë.

Ajo shquhet si aktorja më e nominuar në historinë amerikane të filmit. Ajo po ashtu ka thyer rekordin e aktores më të nominuar për Oscar, me gjithsej 21 nominime, ndërsa i ka fituar 3 sosh për filmat “Kramer vs. Kramer”, “Sophie’s Choice” dhe “The Iron Lady”.

Në janar të vitit 2018, u bë i ditur lajmi se Streep do t’i bashkohej aktoreve të sezonit të dytë të serisë tashmë tejet të suksesshme televizive “Big Little Lies”. Në këtë projekt, aktorja luan krahas yjeve të Hollywoodit, Nicole Kidman, Reese Witherspoon, Shailene Woodley, Laura Dern dhe Zoe Kravitz, dhe e portretizon nënën e personazhit të ndjerë të aktorit Alexander Skarsgard, Mary Louise Wright, e cila shfaqet në jetët e pesë mikeshave për ta zbuluar arsyen e vdekjes së djalit të saj. Ajo ka pranuar lëvdata të shumta për punën në këtë seri.

Pas eksplorimit të skenës televizive, në vitin 2019, aktorja Streep u rikthye në ekran të madh me një rol në filmin e regjisorit Steven Soderbergh, “The Laundromat”. Në të njëjtin vit, ajo e portretizoi hallën March në dramën shumë të pëlqyer të regjisores Greta Gerwig, “Little Women”.

Sa i përket jetës personale, Meryl Streep njihet për ruajtjen e privatësisë me çdo kusht. Aktorja i ka katër fëmijë me skulptorin Don Gummer, me të cilin është e martuar që nga viti 1978, ndërsa në të kaluarën ka qenë në lidhje me aktorin John Cazale. /KultPlus.com