Filmi më i ri i cili po thyen rekordin kudo në botë, “Barbie” do të shfaqet në Liban siç është planifikuar në fund të këtij muaji, pavarësisht thirrjeve për ndalimin e tij.

“Një komitet i ngarkuar për censurimin e filmave, i cili përbëhet nga përfaqësues të sigurisë publike dhe Ministrisë së Ekonomisë, e pa “Barbie” dhe nuk gjeti asgjë që binte në kundërshtim me “vlerat në Liban”, sipas një burimi.

“Barbie” shkaktoi polemika në Liban pasi ministri i Kulturës Mohammed Mortada, i cili është i afërt me të dyja lëvizjet myslimane shiite libaneze, Hezbollah dhe Amal, bëri thirrje për ndalimin e filmit, duke pretenduar se ai promovon homoseksualitetin dhe transformimin seksual.

Ministri tha se filmi jep një ide të shëmtuar të refuzimit të kujdestarisë së babait, dhe nënvlerëson dhe tall rolin e nënës, duke vënë në pikëpyetje domosdoshmërinë e martesës dhe ndërtimin e një familjeje.

I përballur me një reagim të madh nga aktivistët dhe zyrtarë të tjerë libanezë, Mortada më vonë tha se ndalimi ishte vetëm një kërkesë në emër të tij, dhe se çështja ishte përtej kompetencave të tij.

Sipas operatorit të kinemasë Vox, “Barbie” do të shfaqet në kinematë libaneze duke filluar nga 31 gushti.

Muajin e kaluar, shefi i Hezbollah, Hassan Nasrallah nisi një sulm ndaj komunitetit LGBT në Liban.

Ai tha në një ceremoni fetare se homoseksualët përbëjnë një “rrezik të afërt” dhe u bëri thirrje autoriteteve libaneze të ndërmarrin veprime.

Algjeria dhe Kuvajti e ndaluan filmin “Barbie”, por Arabia Saudite, e njohur për institucionet e saj konservatore islamike, e lejoi shfaqjen e tij./KultPlus.com