Qendra Multimedia dhe ekipi i shfaqjes ” 55 shades of gay ” janë tronditur nga komenti fashist i Xheladin Krasniqit, i cili është një zyrtar i Ministrisë së Drejtësisë. Ai bën thirrje për një vrasje të drejtpërdrejtë të ekipit të shfaqjes “55 hijet e homoseksualëve”.

“Komentet e tilla që nxisin urrejtjen dhe apelojnë për vrasje janë gjithmonë shqetësuese dhe duhet të merren seriozisht. Megjithatë, këto komente bëhen edhe më shqetësuese kur vijnë nga një zyrtar shtetëror dhe drejtohen ndaj artistëve. Ekipi i “55 shades of gay” e ka kuptuar seriozisht kërcënimin e zyrtarit të Ministrisë së Drejtësisë dhe në këtë kontekst ne duam të ftojmë prokurorinë që të hetojë këtë rast, këtë kërcënim publik. Në të njëjtën kohë, ne apelojmë në Ministrinë e Drejtësisë për të ndërmarrë masa ndaj zyrtarit të saj dhe të distancohet nga komentet e tilla fashiste. Një zyrtar si ky me mendime talebane e që thërret që “artistëve duhet hekur kokat me shpata” nuk duhet të ketë një vend në institucionet e Republikës së Kosovës”, është reagimi i postuar në Facebook.

Qendra Multimedia po ashtu ka ftuar ministrin e Ministrisë së Drejtësisë Abelard Tahiri, që të martën (19 shkurt) të marrë pjesë në këtë shfaqje në Teatrin Oda në Prishtinë./ KultPlus.com