Sarandë Selimi

“Mirë se vini në edicionin e 100-të të DokuFest, i cili mbahet nga 4 deri më 12 gusht 2101”, ishin fjalët e para në nisjen e udhëtimit të 16-të me radhë të Festivalit Ndërkombëtar të Filmit Dokumentar dhe atij të Shkurtër DokuFest.

Kësaj here, ashtu si herët e kaluara ky festival bëri një hapje më ndryshe sic jemi mësuar të shohim zakonisht. Fjalimi i hapjes u lexua nga Eroll Shporta, fjalim ky i shkruar nga gazetari Vullnet Krasniqi, me një sarkazëm të fuqishme, sic di vetëm ai ta bëjë. Gjithcka fliste për të ardhmen. Fliste për atë se si DokuFest, në vitin 2101, ka pasur një mbështetje të pakrahasueshme nga vitet e kaluara. Aq mbështetje sa do të ndihmojë edhe projektet filmike nga Skandinavia.

DokuFest, sivjet nuk është mbështetur nga insitucionet e Republikës së Kosovës, por, prapë se prapë, ka sjellë një program të mrekullueshëm që pritet ta shihet nga një publik mjaft i madh, përgjatë tetë ditëve sa edhe zgjatë festivali.

‘The future’, është tema e sivjetme e këtij festivali i cili ka mbi 230 filma në program. Jo rastësisht ishte shkruar edhe fjalimi i hapjes për të ‘Ardhmen’. Një fjalim i cili jep shpresë, edhe pse, pas 1 shekulli, lumturia, problemet financiare dhe cdo problem që tani ka Kosova, të zgjidhen.
“Të nderuara zonja dhe zotërinjë, para se të nisim hapjen, kemi një lajm të mrekullueshëm për ju. Pas gërmimeve të bëra këtë korrik, në hapesirat e Shadervanit të dikurshem, është gjetur kalldërmi i vetëm që ka mbijetuar në Prizren. Ky kalldërm, bashkë me mua janë gjerat e fundit që kanë mbijetuar nga Prizreni i vitit 2017. Kalldërmin e kemi gjetë 20 metra nër tokë, ndërsa unë kam qenë gjatë tërë kohës këtu por nuk më keni vërejtë. Ka edhe arsye tjera pse jemi të lumtur në këtë edicion. Për herë të parë pas një shekulli DokuFest nuk e ka problemin e pareve. Kemi aq shumë fonde sa me një pjesë të tyre do ti ndihmojme projektet filmike nga Skandinavia. Dynjaja qever dever, kurr si dihet”, vazhdon tutje fjalimin Eroll Shporta, i cili u prit me ngrohtësi nga audienca që ishin në një numër shumë të madh. Duartrokitjet nuk munguan gjersa fjalimi vazhdonte.

“ZONJA DHE ZOTËRI. Ky edicion i Dokufest mbahet në një vit të lumtur për Kosovën. Kosova, e integruar në Unionin Ndërhapesinor, ka hapur edhe stacionin e vet hapësinor AHK (Agjencioni Hapësinor i Kosovës). Kjo ka mundësuar që astronautët e Kosovës në bashkëpunim me DokuFest, këtë vit ta vendosin edhe një kinema në hapësirat e CK 43 MNNJ ne Planetin e Kuq, ku poashtu do të shënohet edhe ky edicion i DokuTech. Poashtu, permes satelitit Shipitulla 2 te instaluar nga AHK, sonte hapjen e Dokufest e shohin live mbi 23 miliardë banorë të Galaktikës. Përtej problemeve ndërhapësinore, kemi zgjidhur edhe problemet në tokë. Në këtë edicion janë rregulluar edhe disa probleme të vogla që i kemi pasur në edicionet e shekullit të kaluar. E kemi zgjedhur problemin e audiencës e cila është ankuar se nuk mund ti shikojë dy filma për shkak se shfaqen në dy kinema të ndryshme në kohën e njëjtë. Këtë edicion Dokufest ofron teleportimin nga një kinema në tjetrën brenda sekondave”, vazhdonte Shporta tutje, duke përfunduar së foluri për eventet e mbrëmjes së DokuFest që njihen si DokuNights.

“Githashtu fraza “kemi nejt prom deri në mëngjes në Dokunights tash qysh me punu” nuk do të përdoret sivjet nga stafi i DokuFest. Këtë vit DokuFest ofron kabinat e gjumit, ku 1 minutë gjumë aty ka efektin e 1 ore. Urojme stafin qe tash mund të rrijnë në party deri 6 në mëngjes dhe të jenë në ora 10 në takimet e mëngjesit. Të kfillt. Të nderuar miq, në tokë dhe jashtë hapësirës së botës sonë, a jeni gati për super edicionin e së ardhmes?”, përfundon fjalimin Eroll Shporta, fjalimin e të cilit nuk e kemi ndryshuar fare e kemi lënë ashtu sic edhe ka folur, e krejt kjo që të shijohet sa më shumë.

Mes shumë buzqeshjeve e duartrokitjeve, Eroll Shporta largohet nga skena duke i lënë hapësirën filmit dokumentar të realizuar në vitin 1984 ‘Stop making sense’, i cili fliste për koncertin e rok bendit ‘Talking Hands’.

Ky film dokumentar, u mirëprit me duartorkitje nga publiku të cilët nisën festën për hapjen e edicionit të 16-të të DokuFest.

Një hapje thuajse madhështore mblodhi rreth vetës shumë miq, dashamirë, artdashës e poashtu edhe fytyra të politikanëve të Kosovës, të cilët edhe sot dështuan në votimin e të parit të Parlamentit të Repulbikës së Kosovës. Pas krejt kësaj, DokuFest sonte vazhdon me shfaqjen e filmave të tjetër nëpër kinematë e shumëta që ka. E pastaj edhe DokuNights, ku për herë të parë Ledri Vula do këndojë me bend.

KultPlus, do ju sjellë përgjatë tetë netëve, shumë shkrime, intervista, video e fotografi nga ngjarja, ndër më të mëdhatë në vend, DokuFest./ KultPlus.com