Pas zhurmës së madhe se Serbia është duke xhiruar një film për “Shtëpinë e Verdhë”, bëhet e ditur se në këtë shtet kanë filluar edhe  xhirimet për filmin “Koshara”, shkruan KultPlus.

Mediet serbe kanë njoftuar se kanë filluar xhirimet e filmit “Koshara”, dhe të njëjtin e kanë quajtur si një film që do të prezantojë heronjtë serb dhe se sipas tyre, ky film nuk ka të bëj me mite, por me ngjarje, film të cilin do ta shndërrojnë më pas edhe në një serial që do të shfaqet prej 12 episodeve, shkruan KultPlus.

Mediet serbe citojnë se seriali dhe filmi “Koshara”, do të prezantojnë historinë e heronjve serbë, që luftuan në vitin 1999 kundër UCK-së, Ushtrisë së Shqipërisë dhe NATO-s.

Ky film do të realizohet nën regjinë e Balsha Djogo, ndërsa me rolet e tyre do të luajnë aktorët: Zarko Lausevic, Milos Bikovic, Svatozar Cvetkovic dhe Viktor Savic.

Premiera e këtij filmi pritet të prezantohet në shkurt të vitit të ardhshëm, kurse seriali do të prezantohet tre muaj më vonë, në Superstar TV.

Disa nga mediet serbe kanë parashtruar dilemën se nëse do të luajnë në këtë film edhe aktorët shqiptarë. Film për Kosharen, nga serbët po realizohet për herë të dytë, fillimisht ata kanë realizuar një dokumentar për luftën në Koshare, kurse tashti me film dhe me serial./ KultPlus.com