Sot, në shkollën fillore “Emin Duraku” në Komunën e Kaçanikut, për herë të parë u përurua një dhomë burimore speciale e kompletuar me tërë inventarin përcjellës për fëmijët që kanë nevoja profesionale për trajtim më të veçantë.

Ky projekt u realizua nga donatori i njohur i komunës së Kaçanikut, Dr. Astrit Sokoli, i cili ka investuar në këtë shkollë publike edhe më herët në forma të ndryshme. Dhoma burimore u realizua në kuadër të Ditës Botërore të Autizmit.

Nënkryetari i Komunës, Sabedin Vishi, uroi nxënësit dhe mësimdhënësit për këtë projekt të qëlluar, duke shtuar se Komuna e Kaçanikut do të ketë gjithmonë dyert e hapura për bashkëpunime të tilla dhe do të jetë gjithmonë afër donatorëve, për çka në mënyrë te veçantë e falenderoi Doktor Astritin, për këtë investim, por edhe për të gjitha donacionet e tjera që po i bënë për shoqërinë në përgjithësi në komunën tonë. Fjalë falenderuese pati edhe nga drejtoresha e shkollës “ Emin Duraku”, Diana Bajrami Reka, ndërsa Astrit Sokoli si donator i këtij projekti, falenderoi stafin menaxherial dhe arsimtarët e shkollës si dhe Komunën e Kaçanikut, ndërsa premtoi edhe bashkëpunime në projektet e reja.

Tashmë kjo klasë ofron kushte komode për lehtësimin e procesit mësimor për fëmijët që kanë nevojë për trajtim më të veçantë, si edhe për realizimin e planit mësimor për mësuesit ndihmës. Klasa është e kompletuar dhe do të shfrytëzohet për këshillime, vlerësime, takime me fëmijë e prindër si dhe do të përdoren mjetet didaktike.

Ndërsa Dr. Astriti u shpreh se ndihet shumë i emocionuar në përurimin madhështor të kësaj dhome burimore, e cila sipas tij, kjo shënon fillimin e një kapitulli të ri në ofrimin e një mjedisi mbështetës, gjithpërfshirës dhe fuqizues për të gjithë nxënësit.

“Kjo hapësirë ​​është projektuar me dashuri, kujdes dhe konsideratë maksimale për nevojat e ndryshme të nxënësve. Ne jemi përkushtuar për të nxitur një atmosferë ku çdo fëmijë ka mjetet, burimet dhe mbështetjen për të lulëzuar. Gjithmonë do të jem në gatishmëri që të bëj realitet këto vizione dhe për të krijuar kujtime të qëndrueshme dhe për të festuar potencialin e jashtëzakonshëm të kësaj kategorie të fëmijëve!”, u shpreh mbështetësi i këtij projekti, Dr. Astriti, ndër të tjera.
Një dhomë burimore mund të ofrojë:

• Mbështetje individuale: Fëmijët mund të punojnë me mësues të trajnuar, të cilët u ndihmojnë atyre të përballen me vështirësitë e tyre mësimore;
• Pajisje të specializuara: Si mjete dhe materiale që ndihmojnë në zhvillimin e aftësive motorike, komunikimit dhe mësimit;
• Qetësi dhe fokus: Një mjedis më të qetë dhe pa shpërqendrime, i cili mund të jetë më i përshtatshëm për fëmijët që kanë nevoja të veçanta, si ata me autizëm ose çrregullime të tjera të zhvillimit.
  Kjo dhomë mund të ofrojë gjithashtu mundësi për punë grupore ose aktivitete që ndihmojnë fëmijët të zhvillojnë aftësi sociale dhe emocionale në një mjedis të mbështetur dhe të kontrolluar.

/ KultPlus.com