Aktivistët e shoqërisë civile përmes një komunikate për media kanë njoftuar se kanë paditur Policinë për moslejimin e tubimit me distancë fizike për dorëzimin e peticionit “Drejtësi për Kujtimin”.

“Avokatja e aktivistit Gazmend Qyqalla, Rina Kika, ka përgatitur dhe ka dorëzuar sot në mëngjes një padi kundër Policisë së Kosovës për shkeljen e lirisë së tubimit dhe të drejtës në trajtim të barabartë”, thuhet në komunikatë.

Sipas Kikës vendimi i Policisë është i paligjshëm meqë është diskriminues, nuk përmban arsyetim për shkaqet dhe rrethanat që kanë qenë vendimtare gjatë vlerësimit të lajmërimit të tubimit dhe nuk thirret në asnjë bazë ligjore për ta mbështetur kufizimin e lirisë së tubimit.

Vendimi është diskriminues sipas saj, pasi që një ditë para lajmërimit të tubimit Drejtësi për Kujtimin, në Sheshin Nënë Tereza ishte mbajtur tubimi për promovimin e librit “Nga Gonxhe Bojaxhiu deri te Nënë Tereza…” ku kishin qenë të pranishëm më shumë se 40 persona.

“Madje në këtë tubim kishte qenë i pranishëm edhe zëvendëkryeministri Besnik Tahiri”, thuhet në komunikatë.

“Lejimi i mbajtjes së këtij tubimi dhe ndalimi i mbajtjes së tubimit Drejtësi për Kujtimin paraqet trajtim të ndryshëm të dy situatave të njëjta prandaj kemi të bëjmë me diskriminim”, ka thënë ajo.

Dje, më 27 gusht 2020, aktivisti i shoqërisë civile Gazmend Qyqalla e ka dorëzuar lajmërimin për mbajtjen e tubimit paqësor të hënën më 31 gusht 2020 para objektit te Prokurorisë së Shtetit në Prishtinë, për të kërkuar ‘Drejtësi për Kujtimin’.

Tutje thuhet se aksioni simbolik me konferencë për media është planifikuar të mbahet për ta dorëzuar peticionin më shumë se 1,300 nënshkrime nga qytetarë prej anë e mbanë Kosovës të cilët po kërkojnë (1) nga Policia e Kosovës dhe Prokuroria e Shtetit të kërkojnë falje për neglizhimin e rastit të Kujtim Veselit, (2) nga Kryeprokurori i Shtetit që të zhvillojë hetim për zyrtarët përgjegjës për neglizhimin e rastit dhe (3) nga Qeveria e Kosovës që ta kompensojë familjen e Kujtimit për dëmin e shkaktuar nga neglizhenca e shtetit.

“Policia e ka ndaluar mbajtjen e tubimit me vendim ku thuhet se ‘nuk ekzistojnë kushtet në aspektin e sigurisë për lejimin e tubimit sepse tanimë ekzistojnë shkaqet e epidemisë COVID-19’, pa dhënë arsyetim të mëtutjeshëm. Në lajmërimin e aktivistit Gazmend Qyqalla për Policinë është theksuar se pjesëmarrës do të jenë 10 deri 20 persona. Dy nga organizatorët do ta mbajnë një pankartë dhe dy të tjerë do të flasin para mediave”, thuhet në komunikatë. “Ndërkaq, sa i përket masave për mbrojtjen nga COVID-19, në lajmërim thuhet: Në këtë aktivitet do të sigurohen masat për mbrojtjen nga Covid 19, secili do të ketë maskë dhe do të mbahet distanca fizike 2 metra”.

Aktivistët e fushatës Drejtësi për Kujtimin dyshojnë se arsyeja e këtij trajtimi diskriminues është dekurajimi dhe frenimi i kritikës së hapur dhe të ashpër ndaj neglizhencës së Policisë që rezultoi me dhunimin e përsëritur seksual dhe vrasjen e Kujtim Veselit.

Ata janë shprehur të zhgënjyer me institucionet e shtetit të Kosovës që vazhdojnë ta përçmojnë rastin e Kujtimit deri në atë masë sa që 1 vjet pas neglizhimit institucional që çoi në vrasjen e tij nuk lejohet tubimi për të kërkuar drejtësi për Kujtimin dhe familjen e tij, ndërkohë që jemi dëshmitar të mbajtjes së tubimeve të ndryshme gjatë pandemisë COVID-19 për çdo ditë. / KultPlus.com