“Dialogu ndërfetar: Kontributi i Shqipërisë në Ballkan” është libri i ri i botuar këtë fillimviti në Itali, mbështetur nga Universiteti Papnor Gregorian, Qendra për Studime Ndërfetare në Romë.

Botimi shumëfaqësh vjen me kontribute nga një grup studiuesish nga Shqipëria dhe Italia. Ai eksploron rëndësinë dhe ndikimin e dialogut ndërfetar në Shqipëri dhe në rajonin e Ballkanit.

“Në një kohë kur harmonia fetare po testohet nga sfida të reja sociale dhe politike, ky studim synon të nxjerrë në pah sesi Shqipëria mbetet një model unik i bashkëjetesës dhe tolerancës fetare”, thuhet në prezantimin që i bëhet librit të Ambrogio Bongiovanni-t dhe Dorian Mjeshtrit, të mbështetur në këtë studim nga dr. Erjada Çela, dr. Rudina Çollaku, dr. Mario Imperatori, dr. Lello Lanzilli, Migena Kapllani, Stevan Minçi, Elona Mustafaraj, dr. Elisabeta Osmanaj dhe Gaetano Piccolo.

Temat kryesore që trajton ky libër prej 336 faqesh janë:

• Ndikimi i edukimit dhe kulturës fetare në zhvillimin e Shqipërisë;
• Roli i institucioneve fetare në ndërtimin e dialogut të qëndrueshëm;
• Harmonia fetare si pjesë kyçe e identitetit shqiptar;
• Sfidat dhe kërcënimet që mund të minojnë këtë model;
• Si mund të promovohet më tej dialogu ndërfetar si në nivel rajonal, ashtu edhe ndërkombëtar.

Ky vëllim me shumë zëra në italisht dhe shqip është botuar në seksionin “Investigime Ndërfetare dhe Ndërkulturore”.

Vëllimi paraqet kontributin e arsimit, veçanërisht të edukimit të krishterë, në zhvillimin e Shqipërisë nisur nga disa momente historike, herë-herë të dhimbshme të cilat kanë shënuar temën e dialogut dhe kanë nisur një proces “harmonie” që duhet vlerësuar dhe vazhduar edhe në kontekstin e sotëm.

Duke hulumtuar mbi dialogu ndërfetar në Shqipëri, libri tregon se si qëndrueshmëria dhe harmonia mund të jenë tipare dalluese të identitetit shqiptar./ KultPlus.com