Një rast jo fort i zakonshëm ka ndodhur në komunën e Kamenicës. Pas përfundimit të një rruge në Hogosht, qytetarët e këtij fshati e kanë prerë vetë shiritin dhe kanë përuruar rrugën e asfaltuar.

E këtë nder e pati “plaka e katunit”, e cila e preu me gërshërë shiritin, të cilin po e mbanin së bashku dy familje të këtij fshati.

Derisa liderët politikë në Kosovë vrapojnë pas prerjes së shiritave të kuq, për të përvetësuar meritat për investimet në infrastrukturë, Qëndron Kastrati i Kamenicës, duket se më shumë fokusohet te cilësia e punës. Këtë e thonë banorët e rrugës ‘Babaniku’ në Hogosht të cilët kanë përuruar sot rrugën e tyre të asfaltuar.

“Sot e bëmë përurimin e asfaltimit të rrugës ‘Babaniku’ nga familja Shabanaj dhe Balaj me gjatësi 260 metra. Jemi më se të lumtur me kualitetin e asfaltit që ka një trashësi prej 11 cm dhe gjerësi 4 metra. Lagjja jonë ka një falemnderim special për kryetarin e Komunës dhe stafin e tij…”, ka shkruar njëri nga fshatarët që përuruan rrugën./mediafokus/KultPlus.com