Në fundjavë ka vazhduar cikli i fundjavave të këngës polifonike, në qytetin e Gjirokastrës, duke tërhequr vëmendjen e artdashësve të këngës popullore por edhe turistëve. Prej fillimit të muajit gusht iso-polifonia ka zbritur çdo fundjavë në Pazarin karakteristik të Gjirokastrës, në një event të titulluar “Iso mbi kalldrëm”, në kuadër të të cilit grupe të ndryshme popullore, interpretojnë në ambient të hapur, duke u bërë një prej atraksioneve kryesore të mbrëmjeve gjirokastrite.

Në skenat artistike të improvizuara përgjatë rrugëve të kalldrëmta kanë performuar disa prej grupeve të mirënjohura të këngës popullore labe si grupi “Ergjëria” dhe “Cfakës”. Sipas kryetarit të bashkisë Flamur Golemi, në koncertet që kanë si skenë ansamblin arkitektonik të Pazarit karakteristik, artistët popullorë po shpalosin për artdashësit dhe turistët vlerat më të spikatura të këngës iso-polifonike, të kësaj pasurie të UNESCO-s.

“Organizimi synon të kthehet edhe në një pikë tërheqëse për guidat e turistëve vendas dhe të huaj që vizitojnë këtë verë Gjirokastrën”, pohon kryebashkiaku Golemi.

Përgjatë kësaj vere Bashkia Gjirokastër po organizon aktivitete kulturore dhe artistike të cilat tërheqin edhe grupet turistike./ atsh / KultPlus.com