Sporti i hedhjes me parashutë në aerodromin fushor të Gjirokastrës po tërheq gjithnjë e më shumë të pasionuar.

Kryetarii bashkisë së Gjirokastrës, Flamur Golemi publikoi sot në rrjetet sociale një video nga hedhjet me parashutë të të pasionuarve pas këtij sporti.

“Hedhje me parashutë nga Aerodromi i Gjirokastrës, emocione të jashtëzakonshme për ata që i kanë provuar dhe një atraksion më shumë për ata që vizitojnë qytetin”, tha Golemi.

Rikthimi në funksion i aerodromit mbi 80-vjeçar të Gjirokastrës ka diversifikuar ofertën turistike në qytetin e gurtë, i cili vizitohet nga turistë vendas dhe të huaj.

Aerodromi i Gjirokastrës ka një histori gati njëshekullore. Fluturimet e rregullta në të kanë nisur zyrtarisht në vitin 1929 me linjën ajrore Tiranë-Gjirokastër-Tiranë. Fluturimet në Gjirokastër ishin ato për transportin e pasagjerëve, postës, fluturime për qëllime ushtarake, tregtare, diplomatike, madje edhe në rastet e emergjencave civile.

Qyteti i gurtë tashmë është pjesë e Listës së Trashëgimisë Kulturore Botërore nën Mbrojtjen e UNESCO-s, duke bërë që Gjirokastra të jetë një nga qendrat më të rëndësishme të turizmit kulturor gjithëvjetor.

Nga janari deri tani mbi 200 mijë turistë vendas dhe të huaj kanë vizituar Gjirokastrën dhe rrethinat, duke regjistruar ndër shifrat më të larta në vite. / KultPlus.com