Foto tronditëse që tregojnë realitetin e zymtë të një bote pa bletë  dhe një pikniku të trishtë pa ngjyra janë postuar në mediat britanike, duke treguar vetëm një pjesë të vogël të asaj që do t’i mungonte njerëzimit pa insektet e vogla gumëzhitëse.

Është e vështirë të imagjinohet një verë ku hamburgerëve u mungon sallata, domatet, qepët, shija dhe ketchupi. Prodhuesi i mjaltit “Rowse” krijoi një seri imazhesh provokuese, të cilat rrëfejnë shumë thjesht sesi do t’ishte natyra pa këtë pllenues të rëndësishëm të saj, në përpjekje për të nxjerrë në pah pjesën e rëndësishme që luajnë bletët në ushqimin që ne konsumojmë çdo ditë. 

Pa “fuqinë punëtore që gumëzhin”, britanikët nuk do të ishin në gjendje të konsumonin disa nga ushqimet dhe pijet e tyre të preferuara të verës. Në vend të shportave të piknikut, të mbushura me një ylber ngjyrash nga ushqimet e shumëllojshme, do të gjendeshim para mundësisë së një ushqimi tejet të reduktuar, e madje ku nuk do të gjenim thuajse  asnjë prej artikujve tanë të domosdoshëm.

Do t’i mbeteshin së shkuarës ditët kur mund të shijonim lëng portokalli të shtrydhur, sallata të freskëta, avokado, luleshtrydhe, musht etj, sepse këto nuk do të ekzistojnë.