Një bashkëprodhim i Teatrit Kombëtar dhe Teatrit “Migjeni” të Shkodrës do të sjellë për artdashësit komedinë “Kërkohet një tenor” me regjinë e Armand Borës.

“Kërkohet një tenor” do ta ketë premierën mbrëmjen e 25 prillit në Shkodër. Komedia me titull origjinal “Lend me a tenor” është shkruar nga Ken Ludwig. Shfaqja u vu në skenë në West End (1986) dhe Broadway (1989), duke marrë nëntë kandidatura për çmimin Tony dhe fitoi çmimin për aktorin më të mirë (Philip Bosco) dhe regjisorin më të mirë (Jerry Zaks).

“Lend me a tenor” është përkthyer në 17 gjuhë dhe vënë në skenë në 25 vende. Shfaqja zhvillohet në vitin 1934, në një suitë hoteli në Cleveland, Ohio. Titulli është një lojë fjalësh për “Më huazo një tenner”, d.m.th., një kartëmonedhë dhjetë dollarëshe, ku “tenner” përfundon në “tenor”.

Artistët premtojnë se do të jetë një shfaqje që nuk duhet humbur./atsh/KultPlus.com