25 korriku ishte i kobshëm për gruan nga Kamenica e cila u godit me shufër metalike nga bashkëshorti i saj.

Ngjarja ka ndodhur rreth orës 13:20 minuta, në fshatin Berivojcë, komuna e Kamenicës, ku i dyshuari N.M, rreth 42 vjeç, dyshohet se me mjet të përshtatshëm – shufër metalike ka privuar nga jeta bashkëshorten e tij, tani të ndjerën S.M, rreth moshës 34 vjeçare, shkruan KultPlus.

Në këtë mënyrë dyshohet se i njëjti ka kryer veprën penale ‘’Vrasje e rëndë’’, nga neni 173 të Kodit Penal të Republikës së Kosovës.

I dyshuari N.M, me vendim të prokurorit është ndaluar në kohëzgjatje prej 48 orësh dhe brenda afatit ligjor ndaj tij do të kërkohet masa për sigurimin e të pandehurit në procedurë penale. 

Vrasje ka tronditur gjithë vendin dhe reagimet kanë qenë nga më të ndryshmet. Por, shumë prej komenteve që janë hasur në rrjetin social Facebook po konsiderohen tejet shqetësuese. Një pjesë e komentuesve e kanë përkrahur vrasësin dhe e kanë gjykuar viktimën.

Reagimi i këtyre ka shqetësuar njerëzit, të cilët po i konsiderojnë këta komentues si vrasës potencial të grave, vajzave e madje edhe të nënave të tyre.

“Për moral i lumtë dora morali është fundi nëse edhe për moral nuk reagon më nuk jet asgjë e keqe që nuk ndodh as 1 di burg se meriton ky jarani”

“Dora i lumt! Allahu ja lehtesoft insha’Allah don zoti e takoj najher ose marr vesh se ku esht se e kisha shperbly…”

“Ska nevojë mu mërzit shum qashtu e ka pas shkrume. Shum ma e ran o met dek ni mashkull se ni gru ne familje…”

Këto janë vetëm disa nga komentet e shkëputura nga shumë të tjera që kanë ardhur në adresa të ndryshme pas publikimit të lajmit për vrasjen e 34 vjecares. / KultPlus.com