Në Muzeun Kombëtar të Kosovës, sot u diskutua për jetën dhe veprën e Nënë Terezës.

Panelistët, prof. dr. Jahja Drançolli, Don Lush Gjergji dhe Gëzim Alpion folën për formimin e identitetit të saj që kishte elemente të thella kombëtare shqiptare, familjare dhe fetare shpirtërore.

Profesor Alpion theksoi se shembullin e Nënës Terezës nuk duhet vetëm ta përcjellim me fjalë, por duhemi ta jetësojmë duke vepruar në të njejtën mënyrë si ajo, duke ndihmuar personat në nevojë.

Profesori Drançolli foli rreth studimeve të tij për familjen Bojaxhiu, specifikisht për babain e Gonxhe Bojaxhiut, Nikollës. Ai theksoi se familja e Nënës Terezë ka qenë themeli nga ku ajo ka marrë shembujt e parë si duhet ndihmuar të tjerët, bazuar në aktivitetet që i ka zhvilluar babai i saj.

Diskutimi mbi studimin e thellë që Imzot Don Lush Gjergji i ka bërë figurës së Nënës Terezë gjatë jetës së tij duke publikuar 17 libra për të, u fokusua shumë rreth spiritualitetit të saj. Fokus i dha sakrificës së jetës në shërbim të personave në varfëri, sëmundje, të pastrehëve, dhe asaj që  përkundër sulmeve nga komunitetet e ndryshme në Indi, kurrë nuk ndaloi së ndihmuari personat në nevojë.

Të pranishëm në këtë ngjarje ishin këshilltari i Presidentes Osmani, Vehbi Miftari, këshilltarja e ministrit Çeku, Rozafa Imami, kryeshefi i Agjencisë Shtetërore të Arkivave të Kosovës, Bedri Zyberaj, drejtori i Muzeut Kombëtar të Kosovës, Ajet Leci, ud-drejtori i Galerisë Kombëtare, Naim Spahiu, zyrtarë të MKRS-së, studiues, profesorë dhe qytetarë./ KultPlus.com