Ministrja e Kulturës, Rinisë dhe Sportit ka ndarë një telegram ngushëllimi me rastin e vdekjes së aktores së madhe, Leze Qena, përcjellë KultPlus.

Dumoshi shprehet e pikëlluar për ikjen nga kjo jetë të Leze Qenës, por ajo shprehet se kujtimet për të do të jenë përherë në mesin tonë përmes veprës së pamohueshme që ajo ka lënë pas.

Telegrami i plotë i ministres Dumoshi:

E nderuar familja Qena,

Me pikëllim dhe me keqardhje të madhe e mora lajmin për ndarjen nga jeta dhe nga ne e të dashurës, haresë tuaj e tonës, aktores tonë të madhe, Leze Qena.

Fizikisht më Lezja nuk do të jetë mes nesh por do të jetë përherë në kujtimet tona me veprën e saj të pamohueshme e të pashlyeshme që ka lënë pas.

Rolet e panumërta dhe të papërsëritshme të saj do të mbesin gjurmë të gdhendura në botën e artit e të aktrimit. Me praninë e saj, ajo e ka pasuruar çdo vepër artistike dhe i ka dhënë peshë roleve që ka zgjedhur t’i mishërojë në veten e saj.

Me korpusin e roleve të saj, Lezja ka depërtuar në mesin e secilit prej nesh, duke na dhënë frymëzim, krenari e forcë për të vazhduar e tejkaluar çdo sfidë që kemi kaluar qoftë si individë por edhe si popull.

Ajo do të jetë një shembull dhe referencë në historinë e artit të aktrimit shqiptar por edhe më larg, se si me përkushtim dhe me shpritmadhësi, veçori të cilat e kanë karakterizuar Lezen, njeriu bëhet i dashur nga të gjithë dhe i pranuar nga secili.

Ndarja e Lezës është humbje e rëndë jo vetëm për familjen dhe miqtë e saj, por ikja e saj do të lërë një zbrazëtirë të pazëvendësueshme për artin dhe kulturën e Kosovës.

Ne e kujtojmë me pietet dhe respekt angazhimin dhe kontributin e saj të çmuar dhënë për kulturën e Kosovës dhe atë mbarëshqiptare.

Ngushëllime familjes, miqve dhe dashamirëve të Leze Qenës. / KultPlus.com