Nëntë kapanonet e grurit të GoodMills Bulgaria në pronësi austriake në Sofje kanë ofruar një “kanavacë” 3600 metra katrorë për grafitin më të madh të Bullgarisë dhe një nga më të mëdhenjtë në Ballkan.

Në fillim të këtij muaji, artistit Stoyan Atanasov iu deshën më shumë se 700 orë në 30 ditë për të transferuar dizajnin e tij në objektin e magazinimit, duke përdorur platformën më të lartë ngritëse të Sofjes (43 metra).

“Në tërësi, dizajni im ka për qëllim të tregojë lidhjen midis njeriut dhe natyrës dhe sesi njerëzit varen tërësisht nga natyra. Në fakt, kjo është ajo që vetë dizajni përshkruan,” tha Atanasov për Radion Kombëtare.

Ai saktësoi se teknika që përdori kombinon grafitin me muralin. Fabrika e Arteve të Bukura merr meritën për realizimin e kësaj vepre arti me profesionalizëm të jashtëzakonshëm.

Grafiti është hyrja fituese në një konkurs të artit rrugor të nisur nga GoodMills në mars 2023, duke synuar të zbukurojë mjedisin e mullirit dhe t’i jep ngjyrë asaj pjese industriale kryesisht gri të kryeqytetit, duke përcjellë mesazhe lumturie, dashurie dhe kujdesi.

Dhjetëra veprat e paraqitura në konkurs u hodhën në votim publik dhe dhjetë të parat u vlerësuan nga një juri e përzgjedhur posaçërisht duke përfshirë legjendën bullgare të artit të rrugës Nasimo.

“Çdo konturë dhe ngjyrë e këtij dizajni na kujton forcën e artit për të transformuar botën dhe për t’i dhënë bukuri jetës sonë të përditshme,” tha menaxherja e marketingut Sofia Mel, Vesela Peeva/rtv21/KultPlus.com