Presidentja e Republikës së Kosovës, Vjosa Osmani-Sadriu së bashku me ministrin e shëndetësisë Arben Vitia, i kanë uruar mirëseardhje mjekëve dhe stafit të organizatës amerikane ‘’Gift of Life’’, të cilët kanë dhuruar mbështetje financiare për trajtim mjekësor të 30 fëmijëve kosovarë që kanë probleme me zemër, nga një staf mjekësh amerikanë, italianë dhe kosovarë, shkruan KultPlus.

Përmes një postimi në rrjetin social Facebook, Osmani ka thënë se humanizmi i kësaj organizate dhe i mjekëve është dhuratë jo vetëm për fëmijët tanë, por edhe për familjet e tyre, si dhe për shtetin e Kosovës.

Tutje ajo ka treguar se organizata amerikane ‘’Gift of Life’’, ka nisur misionin e tyre të parë në pandemi, për të mbrojtur jetët e fëmijëve kosovarë, me ç’rast në mesin e stafit të organizatës ishte Bleona, vajza e cila kohë më parë ishte vetë pjesë e trajtimeve mjekësore.

KultPlus ju sjell postimin e plotë të saj:

Kur mbrohet e shëndoshet zemra e një personi, mbrohet jeta. Mbrohen frymëmarrjet, lëvizjet, mendja, idetë e aftësia për të punuar, vepruar, e kontribuar.

Bashkë me ministrin e shëndetësisë, z. Arben Vitia, i uruam sot mirëseardhje mjekëve dhe stafit të organizatës amerikane “Gift of Life”, me mbështetjen financiare të të cilëve 30 fëmijë kosovarë, të cilët kanë probleme me zemër, do të trajtohen nga një ekip mjekësh amerikanë, italianë dhe kosovarë.

Me stafin e “Gift of Life” ishte edhe Bleona që ndihmonte me përkthim. Plot jetë e shumë dinamike, ajo është njëra nga fëmijët të cilës kohë më parë vet mjekët e “Gift of Life” i kishin dhuruar jetëgjatësinë përmes këtij programi.

Humanizmi i kësaj organizate dhe i mjekëve është dhuratë jo vetëm për fëmijët tanë, por edhe për familjet e tyre, si dhe për shtetin e Kosovës.

Ky është misioni i parë i kësaj organizate që nga fillimi i pandemisë, por “Gift of Life” ka kryer tashmë pesë misione të tilla në Kosovë, në të cilat janë trajtuar qindra fëmijë kosovarë.

Falënderime të pafund për dr. Francesko Santoro, dr. Herbet Stern, dr. Ribera Santoro, z. Rob Raylman, drejtor i organizatës GOL, dr. Mazllum Belegu, udhëheqës administrativ i GOL për Kosovë, si dhe për stafin mjekësor vendor të udhëhequr nga dr. Bejiqi.

Përvojën nga miqtë tanë, shpresojmë ta bartim në Shërbimin Kardopediatrik në kuadër të ShSKUK-së, të cilin duhet ta kemi funksional brenda Kosovës. Gjersa, fëmijëvë tanë, i uroj nga zemra shëndet e jetë të gjatë! / KultPlus.com