Dokumentari “Emigrimi shqiptar në Greqi si faktor i lindjes së një identiteti të ri shqiptaro-grek në fillimin e shekullit të 21të”, tashmë është përkthyer edhe në gjuhën shqipe. Ambasada shqiptare në Greqi pas komunikimit me Dimitris Christopoulos, Dekan i Fakultetit të Shkencave Sociale dhe Politike të Universitetit Panteion Athinë, Greqi edhe autor i dokumentarit konfirmon lajmin.

Ky dokumentar i realizuar në bashkëpunim me studentët që i përkasin brezit të dytë të emigrantëve shqiptarë në Greqi trajton çështjet e ndërtimit të identitetit kolektiv, për emigrimin, për nacionalizmin etj.

Dokumentari është shfaqur më herët edhe në Shqipëri në Universitetin Mesdhetar ku studentët patën mundësinë të diskutojnë këto çështje me Dimitris Christopoulos

Dimitris Christopoulos është profesor i teorisë së shtetit dhe teorisë juridike në Departamentin e Shkencave Politike dhe Historisë së Universitetit Panteion të Athinës ku jep mësim që prej viti 2003.

Në vitin 2021 zgjidhet Dekan i Fakultetit të Shkencave Politike të Universitetit Panteion. Ka dhënë mësim si profesor i ftuar në universitete të ndryshme në Evropë dhe SHBA. Ai ka botuar në greqisht, anglisht, frëngjisht, portugalisht, hebraisht, shqip dhe serbo-kroatisht në revista shkencore apo revista në fushën e teorisë juridike dhe politike duke u fokusuar në çështje që lidhen me të drejtat e njeriut, të djathtën ekstreme, minoritetet, migrantët dhe shtetësinë. / Diaspora Shqiptare / KultPlus.com