Vazhdës së shënimit të fushatës për ndërgjegjësimin e kancerit të gjirit iu bashkua edhe Komuna e Drenasit bashkë me Qendrën për Promovimin e të Drejtave të Gravë në Drenas, nëpërmjet një sesioni informues, shkruan KultPlus.

Ky aktivitet është organizuar për të informuar dhe ngritur ndërgjegjësimin për kancerin e gjirit, ndërkaq folës ishte radiologu Shkëlzen Gashi i cili detajisht shpalosi zbulimin e hershëm dhe trajtimin e sëmundjes.

“Përmes kësaj fushate vjetore ndërkombëtare duam të shtojmë zërin tonë dhe duke drejtuar thirrjen ndaj të gjitha grave dhe vajzave në shpërndarjen e informacioneve për rëndësinë e shëndetit të gjirit”, thuhet në postimin e Qendrës për Promovimin e të Drejtave të Grave.

Tutje kjo organizatë thekson se ndihma kryesore ndaj grave, respektivisht nënave, motrave dhe shoqeve të prekura është përmes informimit për parandalim dhe vetëdijësim për ato të cilat s’janë prekur nga kjo sëmundje.

Muaji tetor globalisht shënohet për ndërgjegjësim ndaj kancerit të gjirit. / KultPlus.com