Salla Koncertale dhe Muzeu i Artit të Kryeqytetit po bëhen realitet, kështu ka njoftuar sot i pari i Prishtinës, Përparim Rama.

Sipas Ramës, tashmë po hidhen hapat e parë për krijimin e dy hapësirave të rëndësishme kulturore të Kryeqytetit, Sallën Koncertale e Muzeun e Artit.

“Jam shumë i lumtur që po hedhim hapat e parë për krijimin e dy hapësirave të rëndësishme kulturore të Kryeqytetit, Sallën Koncertale e Muzeun e Artit. Gjatë takimit me arkitektin e njohur botëror, Kengo Kuma, diskutuam detajet e fundit për realizimin e këtij projekti tjetër të madh drejt transformimit të Prishtinës’, shprehet Rama.

Gjithashtu është bërë e ditur se arkitektura unike e ndërtesës ikonë të Kryeqytetit, do të ruhet tërësisht si pjesë e trashëgimisë sonë. Por në të njëjtën kohë do të krijohetë një Sallë Koncertale e Muze të Artit super modern.

“Ne po realizojmë një kërkesë të kahmotshme të artistëve tanë, që të kenë një ambient të përshtatshëm ku do të mund të shprehin artin e tyre, në kushte shumë më të favorshme, ashtu siç do të bëjnë artistët me renome botërore.

E kam premtuar dhe po e bëj realitet”, thotë Rama. /KultPlus.com