Në Thüringen dhe qytete tjera gjermane shfaqet këtë fundjavë oratoriumi “The Armed Man: A Mass for Peace” (Njeriu i armatosur: një meshë për paqen)

Në 30-vjetorin e “Revolucionit paqësor” gjerman, gjegjësisht rrëzimit të Murit të Berlinit, më 9 e 10 nëntor në Thüringen shfaqet oratoriumi “The Armed Man: A Mass for Peace” (Njeriu i armatosur: një meshë për paqen), shkruan thueringer-allgemeine.de.

Fjala është për një vepër komplekse arti skenik që i është kushtuar Kosovës, gjegjësisht viktimave të popullit të Kosovës gjatë luftës së fundit. Autor i “Meshës…” është kompozitori uellsian (Britani e Madhe), Karl Jenkins.

Këtë vepër, e cila tashmë është vënë me dhjetëra herë në skenë nga autorë dhe trupa të ndryshme në Gjermani, Jenkins e ka shkruar në vitin 1999. Ajo është vënë për herë të parë në skenë në prill të vitit 2000 me kërkesën e Muzeut të armëve në Londër, në kuadrin e aktiviteteve të shënimit të kalimit në mileniumin e ri.

Vepra është kompozuar për kor, orkestër harqesh, instrumente me frymë dhe për bateri. Ajo përmban tekste të meshës latine me psalme, poezi të Rudyard Kipling, Jonathan Swift, por edhe tekste nga Mahabharata si dhe një tekst të një dëshmitari të bombardimit me bomba atomike të Hiroshimës.

Në disa nga inskenimet e këtij oratoriumi është futur edhe kënga e muezinit, e kënduar në mënyrë autentike nga një klerik mysliman.

“The Armed Man: A Mass for Peace” është oratoriumi i luajtur më së shumti në botë në këtë shekull, për të gjallë të autorit.

Në bazë të gjithë veprës qëndron një këngë franceze e ushtarëve nga shekulli 15.

Shfaqja e parë jepet më 9 nëntor në Neustädter Katharinenkirche në Eschwenge me fillim në orën 18. Ndërsa repriza e saj më 10 nëntor, në Mühllhäuser Kornamatkirche. /albinfo.ch /KultPlus.com