Në mbledhjen e sotme të Qeverisë së Kosovës u miratua programi për performancë të lartë sportive “Super Sportistët”, i cili sipas zëvendësministres së Ministrisë për Kulturë, Rini dhe Sport, Daulina Osmani do të ndikoj në performancën e talentëve të rinjë të sportit në vend.

Zëvendësministrja e Sportit, Daulina Osmani, në fjalën e saj para kabinetit qeveritar ka theksuar se Programi “Super Sportistët” synon të rris numrin e sportistëve me potencial për medalje në gara ndërkombëtare, numrin e sporteve me të cilat garojmë, si dhe numrin e medaljeve.

“Për ciklin Olimpik 2024-2028, buxheti i programit është 4 milionë euro ndërsa për cilësinë e këtij programi janë angazhuar profesionistë të dëshmuar nga fusha e sportit, në krye me kryemjeshtrin Driton Toni Kuka, Edmond Azemi, ish sportist i dalluar, anëtar, Arsim Maxhera, gazetar sportiv, Kushtrim Krasniqi nga KOK dhe Shkëlqim Sadriu nga MKRS”, thuhet në njoftimin e MKRS.

Në njoftim thuhet se “Super Sportistët” ka për qëllim të indentifikoj dhe të përzgjedhë top talentët e Kosovës dhe të ndihmojë në zhvilimin e tyre përmes mbështetjes financiare dhe trajnimit të specializuar.

Kjo përfshinë sigurimin e resurseve të nevojshme për trajnimin e tyre, pjesëmarrjen në stërvitje profesionale, përkujdesin dhe zhvillimin shëndetësor, furnizimin me paisje profesionale dhe inovative për zhvillim të potencialit si dhe mbikqyrjen e progresit sportiv dhe mirëqenien e sportistit përgjatë karrierës së tyre profesionale./KultPlus.com