Shqipëria do të kthehet epiqendër e turizmit europian nga data 7 deri më 9 prill, ku për herë të parë do të mirëpresë takimin e Komisionit për Europën të Organizatës Botërore të Turizmit.

Komisionin për Europën i Organizatës Botërore të Turizmit ka zgjedhur Tiranën si vendin e kësaj mbledhjeje të rëndësishme, që bëhet një herë në vit. Kjo do të jetë hera e parë që zhvillohet në Tiranë, ku do të mblidhen 40 ministra të Turizmit nga të gjitha vendet e kontinentit Europian.

1 muaj më parë Shqipëria u shpall “Vendi i nderit” në Panairin e Turizmit në Berlin. Pikërisht në këtë edicion të këtij panairi u nënshkrua marrëveshja e organizimit të mbledhjes së 70-të të Komisionit për Evropën të UNWTO në Tiranë, në datat 7-9 prill.

UNWTO e renditi Shqipërinë të parën në Europë për rikuperimin e flukseve turistike gjatë vitit 2023, ndërsa gjatë dy muajve të parë të vitit 2024 vendi ynë u vizitua nga 1 milion vizitorë të huaj, sipas të dhënave të publikuara nga Ministria e Turizmit dhe Mjedisit. / atsh / KultPlus.com