E rrethuar nga mali madhështor i Dajtit dhe liqeneve përreth saj, Tirana ofron një larmishmëri aktivitetesh në natyrë. Por, vizitorët nuk kanë nevojë t’u largohen kufijve të kryeqytetit shqiptar për të shijuar aventurat, shkruan Elisa Morton e faqes së specializuar për udhëtimet partner-britishairways.culturetrip.com., në shkrimin me titull ”Nga natyra te aventurat e qytetit – Si Tirana ofron më të mirën e të dyjave”.

Dikur një emblemë e kaosit urbanistik postkomunist, Tirana bashkëkohore ka gjetur pikënisjen nga peizazhet e mrekullueshme që e rrethojnë. Hapësira, liria dhe ndjenja e aventurës e karakterizojnë këtë qytet në zhvillim, shtuar bollëkun e hapësirave të gjelbërta dhe dizajnin e fokusuar tek njerëzit, kryeqyteti shqiptar po krijon emrin e tij si një destinacion për eksploruesit urbanë.

I njohur gjerësisht si qendra e gravitetit të Tiranës, sheshi “Skënderbej” është një shembull kryesor i ripërtëritjes së qytetit. Ditët pa makina përreth sheshit të gjerë u kanë dhënë hapësirë këmbësorëve. Stola me ngjyra të ndezura dhe ishuj të harlisur nga gjelbërimi ofrojnë relaks për këmbësorët e lodhur, ndërkohë që është gjithashtu një qendër edhe për ata që përdorin patinat.

Narrativa se Tirana po shkëputet nga e kaluara e saj komuniste është ndoshta paksa e keqkuptuar; pasi qyteti është gjithashtu i mbushur me kujtime arkitekturore interesante të para viteve ‘90, që po përfshihen në metamorfozën e Tiranës për t’u shfrytëzuar nga një qytet i ri, pjesa më e madhe e banorëve të rinj të të cilit nuk kanë kujtime nga periudhe komuniste.

Piramida e Tiranës, një strukturë monumentale prej betoni që fillimisht do të bëhej muzeum, është një vend popullor për aventura (ju mund të shihni edhe disa banorë vendas që përpiqen të ngjiten në të). Ndërkohë, Parku i Madh i Tiranës është një shesh lojrash i gjerë dhe i gjelbër ku mund të provosh kajakun apo të zhytesh në një pishinë publike.

Parku është gjithashtu vendi i restorantit “Mullixhiu”, një vend i rafinuar me dekor të ngjashëm me një kasolle druri në fshat. Menuja e provës në këtë restorant “gourmet”, por me çmime të lira ofron një udhëtim nëpër fushat pjellore dhe pyjet. Provoni një sallatë me kunguj dhe hurma, gnocchi me shafran Elbasani ose jufka ala taljatel me djathë nga veriu i largët i Shqipërisë.

Energjia e papërballueshme e Tiranës ka lindur nga e kaluara e saj e pasur dhe prirja për ndryshim – kështu që, ndërkohë që ana rurale mund të provokojë të dashuruarit e hapësirës për të ecur nëpër shtigjet malore, një ditë rreth qytetit garanton një aventurë urbane që nuk do të zhgënjejë.