Arkeologët kanë bërë, së fundmi, një zbulim mahnitës, duke gjetur një tortë me lajthi dhe bajame gati 80-vjeçare, e cila mendohet të jetë përgatitur gjatë Luftës së Dytë Botërore dhe të jetë djegur e karbonizuar pas sulmeve ajrore me bomba.

Torta, e cila ishte ende e mbështjellë me letër dylli, u zbulua në një bodrum në qytetin-port të Lübeck, – një qytet historik gjerman që gjatë luftës u rrafshua nga një sulm britanik. Përveç tortës, u gjetën edhe sende të tjera, si pjata, filxhanë dhe lugë për shërbimin e kafesë.

Ekspertët Lisa Renn dhe Doris Mührenberg vunë në dukje se torta ende ka afërsisht të njëjtën formë si kur ishte e pjekur. Ajo gjithashtu ka ruajtur mbushjen e saj me fruta të thata, si dhe dekorimet e sheqerit. Torta ka të ngjarë të jetë djegur gjatë sulmit ajror të vitit 1942, i cili ndodhi midis 28 dhe 29 marsit.

Sipas studiuesve, është e mundur që torta dhe kafeja e gjetur do të përdoreshin për një festival ose ndoshta për festën e së Dielës së Palmës, çka tregon më shumë për jetën sociale dhe kulturore të qytetit në ato kohë të vështira lufte./KultPlus.com