Rekordet Botërore Guinness kanë njoftuar se një  zog i njohur si Thalassolimoza ka thyer rekordin për migrimin më të gjatë pa ndalesë, duke mbuluar një distancë prej 13,560 kilometrash (8,435 milje) nga Alaska në Tasmania, Australi.

Distanca e përshkuar është e barabartë me 2.5 herë udhëtimin nga Londra në Nju Jork, ose një e treta e perimetrit të plotë të planetit.

Rekordi i mëparshëm u vendos në vitin 2020 nga një zog tjetër i së njëjtës specie dhe Thalassolimoza e këtij viti “e mposhti” atë me 350 kilometra (217 milje).

Eric Waller nga Birdlife Tasmania tha për Guinness World Records se zogu humbi “gjysmën ose më shumë të peshës së tij trupore gjatë fluturimit të vazhdueshëm të ditës dhe natës”.

“Për zogjtë shtegtarë, një kthesë e humbur mund të jetë fatale, sepse ata kalojnë disa javë duke fluturuar mbi oqeane dhe kontinente nga një skaj i planetit në tjetrin”, bëri të ditur agjencia në një deklaratë.

Megjithëse shumica e zogjve migrojnë shumë kilometra në kërkim të ushqimit dhe klimave më të ngrohta, disa kanë aftësinë të transformohen fizikisht për t’iu përgjigjur kushteve mjedisore.

Disa specie mund të ndryshojnë në mënyrë drastike trupin dhe metabolizmin e tyre, të zvogëlojnë madhësinë e organeve të tyre të brendshme, të shtojnë shpejt peshë dhe të djegin rezervat e yndyrës, të flenë pak dhe të kenë shumë veti të tjera të ngjashme me superfuqitë./abcnews.al/ KultPlus.com