Po ju sjellim disa thënie të njohura për bukurinë.

Aristoteli: Bukuria është dhuratë e Zotit.

Shën Agustini: Sigurisht që bukuria është një dhuratë e mirë e Zotit, por duket se vetë Zoti mendoi se kjo, bukuria pra, nuk është ndonjë e mirë e madhe, përderisa ai e dha atë edhe tek njerëz të ligë.

Grigori i 1-rë: Në çastin që një vajzë fillon e nuk ka më ndrojtje dhe nuk skuqet më, atëherë ajo ka humbur pjesën më tërheqëse dhe më fuqiplotë të bukurisë së vet.

Platoni: Bukuria e stilit, e harmonisë, e hijeshisë dhe e një ritmi të mirë, varen nga thjeshtësia.

Ovidi: Njësoj si mund të gabojë një mëndje kur ajo gjykon nën veprimin e pijes së verës, ose një sy, kur ai sheh në errësirë, ashtu mund të gabojë edhe një shpirt, kur ai është i dehur prej një bukurie.

Shën Joan Klimakusi: Njoh dikë që kur pa një grua me një bukuri goditëse, ju lut Krijuesit për të. Duket pra se pamja e saj e ndriçoi atë burrë, që t’i drejtohej Zotit me përdëllim.

Safo: Ç’ka është e bukur është e mirë dhe, kush është i mirë, shpejt do të konsiderohet edhe si i bukur.

Horaci: Asgjë e bukur nuk është e bukur, po qe se shikohet nga të gjitha këndvështrimet.

Plutarku: Kur në mesnatë kandili shuhet, të gjitha gratë, kanë një bukuri që s’thuhet.

Sokrati: Të lutem o Zot, më bëjë të bukur përbrenda.

Arkimedi: Bukuria individuale i hap rrugën njeriut, më tepër sesa një rekomandim. /Shqipëroi: Ilia V. Ballauri/KultPlus.com