Presidenti Ilir Meta është duke ndjekur me shqetësim gjendjen e emergjencës që është shpallur në Bibliotekën Kombëtare.

Një ditë më parë, kati i nëndheshëm i hapësirave depozituese të koleksioneve bibliotekare (libra, revista, gazeta), janë dëmtuar/lagur materialet bibliotekare të sistemuara në nivelet e ulëta të sallës.

Rreth 12 mijë materiale rezultojnë të lagura nga shiu, dhe për të minimizuar dëmet, punonjës të bibliotekës janë përpjekur për t’i tharë me tharëse flokësh, dhe mjete rrethanore.

Nisur nga kjo situatë, Kreu i Shtetit ka bërë apel që institucionet përgjegjëse të marrin masa urgjente në mënyrë që të parandalojnë përsëritjen e një situate të ngjashme në të ardhmen.

Postimi i plotë

Presidenti i Republikës, Sh.T.Z Ilir Meta, po ndjek me shqetësim situatën e krijuar në Bibliotekën Kombëtare, këtë institucion të rëndësishëm të trashëgimisë tonë të pasur kulturore. Në vijmësi Kabineti i tij po ndjek nga afër situatën dhe është në komunikim me Drejtoreshën e Bibliotekës Kombëtare.

Presidenti i Republikës u bën thirrje institucioneve përgjegjëse të marrin masa urgjente në mënyrë që të parandalojnë përsëritjen e një situate të ngjashme në të ardhmen.

Duke kërkuar mirëkuptimin e të gjithë faktorëve politikë, socialë e mediatikë, Presidenti bën thirrje që të gjithë bashkë të kontribuojmë për të ruajtur vlerat e pasura të fondit të Bibliotekës sonë Kombëtare./ dita