2 prilli, Dita Ndërkombëtare e Librit për Fëmijë do të shënohet edhe në Prishtinë nga organizata “Etea”, e cila do të organizojë një diskutim për librat e autores  për fëmijë Erinë Rrahmani, shkruan KultPlus.

Erina Rrahmani është autore e katër librave për fëmijë: “Gjithçka mund të ndodhë” “Natën e mirën hënë” “Sytë e botës” “Ëndrra prej letre”.

Autorja Rrahmani është anëtare e Karvanit të Shkrimtarëve për Fëmijë ‘Agim Deva’ prej vitit 2006 ndërsa në vitin 2017, ajo ka fituar Çmimin “Ymer Elshani” për “Librin më të mirë për fëmijë”.

Një vit pas, në 2018-en, ajo u shpërblye me “Çmimin për Librin më të mirë për Fëmijë” në Panairin e Fierit në Shqipëri, vlerësuar nga juria në përbërje të  Nasho Jorgaqi e Klara Kodra.

Vjershat e saj janë pjesë e antologjive të shkrimtarëve për fëmijë dhe janë botuar në revista letrare në Kosovë e Shqipëri. Erina Rrahmani është ndër të vetmet autorë të rinj për fëmijë të këtij brezi.

Manifestimi i posaçëm letrar për veprën e saj do të mbahet më  2 Prill 2019 në Bibliotekën “Hivzi Sylejmani” në Prishtinë, duke filuar nga ora 12:00./ KultPlus.com