Poezi nga: Maria Wine
Përktheu: Qerim Raqi

Tani kemi bërë dashuri derisa perëndimi i diellit është bërë i stërkuq
jemi ledhatuar derisa lumenjtë
kanë gjetur qetësinë e tyre
jemi puthur derisa majat e gonxheve kanë çelur
dhe nën qepallat e syve tanë epshorë
janë përkundur e kanë lundruar të dehur zambakët
tani kemi luajtur simfoninë e dashurisë
derisa trupat tanë violina
kanë shpërthyer vazhdimisht në zgjime të reja
tani kemi përdorur fjalën për të mbjellë
dhe heshtjen për të korrë
melodi e dallgëve të detit ka pikuar
çaste qetësie dhe gëzimi
në shtrëngimin e duarve tona
Tani kemi lozur lojën e dashurisë
si lojë dhe seriozitet

Kemi qeshur me kënaqësinë për të dhënë
dhe kënaqësinë për të marrë
kemi bërë dashuri përtej kohës, lirshëm
kemi pushtuar qiejt më të thellë të gëzimeve
dhe në çastet tona më të guximshme
kemi prekur përjetësinë