Nga Alketa Spahiu

Mos u dashuro në Esmeraldën

Të thashë, me butësi,

kapiten i falangave me bajoneta Erosi,

mos u dashuro në Esmeraldën

në rrotullimet e saj ngjyrë galaksie mëngjesi,

në tundimin e saj me nuanca meleze

në ecejaket e saj të purpurta valsore

që ngjajnë me diellin kur rrotullohet rreth tokës,

po, Galile,

në ujëra të cekëta

nuk notojnë buzëqeshjet e simfonisë.

Mos u dashuro në Esmeraldën

nëse ke një pasaportë, rrënjë të thella

status të lartë shoqëror, apo pushtet

të shtetit të monotonisë,

vetëm apolidët meritojnë

të shijojnë parajsën fiskale të hireve të saj

vallëzimet si retë që dërgojnë nur

e jo shi

dhe magjinë e natës së Notre- Dame-it.

Esmeralda jeton bukurinë e momentit

pi ujë nga gota e praruar e qiellit parisien

vallëzon me katër vello dhe shumë byzylykë

lirat e kostumit të saj

nuk ankorohen në porte fikse,

nuk është franceze, as egjiptiane

e as aborigjene

trupi i saj valëvitet si një nimfë profane

që për Halloween ka zgjedhur të maskohet

si vallëtare orientale,

Esmeralda vallëzimet i ka të lira

dashurinë të vështirë si një vulë papale.

Mos u dashuro në Esmeraldën,

nëse nuk do të udhëtosh pa biletë

horizonteve ekzotike të dashurive të pamundura

ku allellujat e të dielës

janë zëvendësuar me melodi tamburësh,

dashuria e saj ka akciza të larta,

si kalimi nëpër rrugën  e mëndafshit.

Esmeralda vazhdon të vallëzoj hirshëm,

shkujdesshëm,

si aurora që përndrit Champes- Elysees

Hygotë e shikojnë

me neps agjëruesi,

luten për shputat e saj të njoma

dhe kokën e pabindur

që nuk ndjek ritmet e konformizmit./ KultPlus.com